જે મહિલા આ દુનિયામાં જ નથી તેના ખાતામાંથી બેંકના મેનેજરે 30 લાખ ઉપાડી લીધા

મુંબઈની સાયબર પોલીસે બેંક સાથેની કથિત છેતરપિંડીના કેસમાં એક ખાનગી બેંકની ચોપાટી શાખાના ભૂતપૂર્વ મેનેજર અને એક કર્મચારીની ધરપકડ કરી છે. તેમના પર આરોપ છે કે તેમણે એક મૃત મહિલા ગ્રાહકના બેંક ખાતામાંથી અંદાજે ₹29.83 લાખ કાઢી લીધા હતા. આ કામ માટે, કથિત રીતે બનાવટી 'કસ્ટમર રિક્વેસ્ટ ફોર્મ'નો ઉપયોગ કરીને ગ્રાહકનો રજિસ્ટર્ડ મોબાઈલ નંબર અને ઈમેલ ID બદલી નાખવામાં આવ્યા હતા. સેન્ટ્રલ સાયબર પોલીસે સોમવારે આ મામલે ભૂતપૂર્વ બ્રાન્ચના હેડ રાહુલ પંજવાની અને બેંક કર્મચારી અભિષેક વર્માની ધરપકડ કરી હતી.

આ કેસ ત્યારે પ્રકાશમાં આવ્યો જ્યારે બેંકને સ્વર્ગસ્થ ગ્રાહક વિમલા પાટીલના ખાતા સાથે જોડાયેલા મોબાઈલ નંબર અને ઈમેલ IDમાં અનધિકૃત ફેરફારો અંગે ફરિયાદ મળી. બેંકની આંતરિક તપાસમાં જાણવા મળ્યું કે આ ફેરફારો જુલાઈ 2025માં તારદેવ શાખામાં સબમિટ કરાયેલા 'કસ્ટમર રિક્વેસ્ટ ફોર્મ' દ્વારા કરવામાં આવ્યા હતા. તપાસ દરમિયાન, બેંક અધિકારીઓને માલૂમ પડ્યું કે ફોર્મ પરની સહી બેંકના રેકોર્ડમાં રહેલી વિમલા પાટીલની સહી સાથે મેળ ખાતી નહોતી.

તપાસ દરમિયાન કર્મચારી અભિષેક વર્માએ કથિત રીતે બેંકને જણાવ્યું હતું કે રાહુલ પંજવાનીએ તેને આ ફેરફારો કરવા માટે સૂચના આપી હતી. મોબાઈલ નંબર અને ઈમેલ ID બદલ્યા પછી, આરોપીઓએ કથિત રીતે મૃત ગ્રાહકના ખાતા સુઘી પહોંચ મેળવી લીધી. ત્યારબાદ, ખાતામાં રહેલી બે ફિક્સ્ડ ડિપોઝિટ (FDs) સમય પહેલાં બંધ કરી દેવામાં આવી હતી. આ બે FDનું કુલ મૂલ્ય અંદાજે ₹14.87 લાખ હતું, જે કથિત રીતે વિવિધ માધ્યમો દ્વારા અન્ય ખાતાઓમાં ટ્રાન્સફર કરવામાં આવ્યું હતું.

પોલીસના જણાવ્યા અનુસાર, રકમ ટ્રાન્સફર કરવા માટે RTGS, NEFT, UPI, IMPS અને મોબાઈલ બેંકિંગ જેવા માધ્યમોનો ઉપયોગ કરવામાં આવ્યો હતો. વ્યવહારોની તપાસમાં જાણવા મળ્યું છે કે RTGS ટ્રાન્સફર દ્વારા ત્રણ અલગ-અલગ ₹5-5 લાખ એટલે કે કુલ ₹15 લાખ લાખ અન્ય બેંકના ખાતામાં મોકલવામાં આવ્યા હતા. નાણાંની હેરફેર (મની ટ્રેલ) અંગેની તપાસમાં અમુક જ્વેલરી આઉટલેટ્સના કનેક્શન પણ સામે આવ્યા છે. સેન્ટ્રલ સાયબર પોલીસે બંને આરોપીઓની ધરપકડની પુષ્ટિ કરી છે.