માલિકે નોકરીમાંથી કાઢી મૂક્યો તો રોષે ભરાયેલા કર્મચારીએ ગેરેજમાં પાર્ક કરેલી 22 બાઇકને આગ લગાવી દીધી

મહારાષ્ટ્રના નાગપુરમાં એક ચોંકાવનારી ઘટના સામે આવી છે, જેમાં નોકરીમાંથી છૂટા કરી દીધા બાદ એક કર્મચારીએ કથિત રીતે ગેરેજમાં પાર્ક કરેલી 22 બાઇકને આગ લગાડી દીધી હતી. આગજનીની આ સનસનીખેજ ઘટના ગુરુવારે રાત્રે નાગપુરના સાન્યાલ નગરમાં આવેલા 'દેવેશ હોન્ડા' ગેરેજમાં બની હતી. અહેવાલો અનુસાર, નોકરીમાંથી કાઢી મુકાયા બાદ રોષે ભરાયેલા એક કર્મચારીએ ત્યાં પાર્ક કરેલી લગભગ 22 બાઇકને આગ ચાંપી દીધી હતી.

આગની ઝપેટમાં આવવાખી અનેક વાહનોને નુકસાન થયું છે. આ સમગ્ર ઘટના CCTVમાં કેદ થઈ ગઈ છે, જેમાં આરોપી આગ લગાવતો જોવા મળે છે. ઘટનાની જાણ થતા જ કપિલ નગર પોલીસ ઘટનાસ્થળે પહોંચી હતી અને તપાસ શરૂ કરી હતી. આ અંગે કેસ નોંધીને આગળની કાર્યવાહી હાથ ધરવામાં આવી છે. આગજની પાછળનું કારણ અને નુકસાનનું આંકલન પોલીસ તપાસ પૂર્ણ થયા બાદ જ સ્પષ્ટ થઇ શકશે.

આગ બાદનો વીડિયો પણ સામે આવ્યો છે, જેમાં બાઇક બળીને રાખ થઈ ગયેલી જોવા મળે છે; કેટલીક બાઇક અડધી બળી ગયેલી જોવા મળી રહી છે. આ ઘટનામાં ગેરેજ માલિકને મોટું નુકસાન થયું છે અને પોલીસ હાલ આરોપીની શોધખોળ કરી રહી છે.

આ પહેલાં, છત્રપતિ સંભાજીનગરની એક હોસ્પિટલના NICU વોર્ડમાં ભીષણ આગ લાગી હતી. સદભાગ્યે, 9 નવજાત શિશુઓને સમયસર બચાવી લેવામાં આવ્યા હતા; બચાવ કામગીરીનો વીડિયો પણ સામે આવ્યો હતો. અહેવાલ મુજબ, એર કન્ડીશનરમાં શોર્ટ સર્કિટને કારણે આગ લાગી હતી, જેનાથી હોસ્પિટલમાં અફરાતફરી મચી ગઈ હતી. NICUમાં દાખલ કરાયેલા નવ નવજાત શિશુઓને તાત્કાલિક સુરક્ષિત રીતે બહાર કાઢીને અન્ય હોસ્પિટલોમાં ખસેડવામાં આવ્યા હતા. ફાયર બ્રિગેડની 5 ગાડીઓ ઘટનાસ્થળે પહોંચીને આગ પર કાબૂ મેળવ્યો હતો.