સાયબર ગુનેગારો હવે 'ડિજિટલ ધરપકડ'ના નામે લોકોને ડરાવી ધમકાવી રહ્યા છે અને છેતરપિંડી કરી રહ્યા છે. તેઓ વીડિયો કોલ પર પોતાને CBI, ED અથવા પોલીસ અધિકારીઓ તરીકેની ઓળખ બતાવે છે અને નકલી કોર્ટના ઓર્ડર બતાવીને પૈસા પડાવી લે છે. ખાસ કરીને વૃદ્ધ લોકોને તેઓ તેમના નિશાન બનાવે છે. અંબાલાના એક નિવૃત્ત દંપતીએ ભારતના મુખ્ય ન્યાયાધીશ (CJI)ને પત્ર લખીને દાવો કર્યો હતો કે, સુપ્રીમ કોર્ટના નકલી આદેશનો ઉપયોગ કરીને તેમની સાથે રૂ. 1 કરોડની છેતરપિંડી કરવામાં આવી છે. આ ફરિયાદે સુપ્રીમ કોર્ટને હચમચાવી નાખી. કોર્ટે પોતે જ કેસની સુનાવણી શરૂ કરી અને દેશભરમાં ડિજિટલ ધરપકડના કેસોને ગંભીરતાથી લીધા છે.
27 ઓક્ટોબર, 2025ના રોજ, સુપ્રીમ કોર્ટે તમામ રાજ્યોને ડિજિટલ ધરપકડના કેસોમાં નોંધાયેલી FIRની વિગતો એક અઠવાડિયાની અંદર કોર્ટમાં સબમિટ કરવાનો નિર્દેશ આપ્યો. ન્યાયાધીશ સૂર્યકાંતની આગેવાની હેઠળની બેન્ચે જણાવ્યું હતું કે, તે તમામ ડિજિટલ ધરપકડના કેસોની તપાસ CBI જેવી એક જ કેન્દ્રીય એજન્સીને સોંપવાની તરફેણ કરે છે. આ પછી, સોલિસિટર જનરલ તુષાર મહેતાએ જણાવ્યું હતું કે, બધા કેસ CBIને સોંપવાથી તપાસની ગતિમાં અવરોધ આવી શકે છે. કારણકે, મોટાભાગના કિસ્સાઓમાં, આ રેકેટ દેશની બહારથી ચલાવવામાં આવી રહ્યા છે.
જસ્ટિસ સૂર્યકાંતની બેન્ચે સૂચન કર્યું હતું કે, ડિજિટલ ધરપકડના બધા જ કેસ CBI જેવી એક જ કેન્દ્રીય એજન્સીને સોંપવામાં આવે. આનાથી તપાસમાં એકરૂપતા આવશે અને પરિણામો ઝડપથી મળશે. જોકે, સોલિસિટર જનરલ તુષાર મહેતાએ આનો વિરોધ કર્યો હતો. તેમણે કહ્યું હતું કે, 'મોટાભાગના રેકેટ વિદેશથી કાર્યરત થઇ રહ્યા છે. બધા કેસ CBIને સોંપવાથી તપાસની ગતિ ધીમી પડી શકે છે.' મહેતાએ એ પણ નિર્દેશ કર્યો હતો કે, સાયબર ક્રાઈમના કેસોમાં પહેલાથી જ વિલંબ થઈ રહ્યો છે. કોર્ટે SGને પૂછ્યું, 'શું CBI આટલા બધા કેસ સંભાળી શકે છે? જો આ અંગે તમને કોઈ મદદની જરૂર હોય, તો કૃપા કરીને અમને જણાવો.' આ અંગેનો નિર્ણય આગામી સુનાવણીમાં લેવામાં આવશે.
અંબાલાના એક વૃદ્ધ દંપતીની વાર્તા દિલ હલાવી નાંખે તેવી છે. 3 થી 16 સપ્ટેમ્બર, 2025 દરમિયાન, કૌભાંડીઓએ તેમને વીડિયો કોલ પર ધમકી આપી હતી. નકલી PMLA ઓર્ડર, EDનું ધરપકડ વોરંટ અને નકલી કોર્ટ મોનિટરિંગ ઓર્ડરનો ઉપયોગ કરીને, તેઓએ રૂ. 1.05 કરોડની છેતરપિંડી કરી હતી. આ કેસમાં અંબાલા સાયબર બ્રાન્ચમાં બે FIR નોંધવામાં આવી હતી. કોર્ટે કહ્યું, 'આ વરિષ્ઠ નાગરિકો સામે અત્યાચાર છે. દેશભરમાં આવી છેતરપિંડી બંધ થવી જોઈએ.'
15.jpg)
