ફેબ્રુઆરીમાં એક બપોરે, જ્યારે સુપ્રીમ કોર્ટમાં સુનાવણી પુરી થવાની હતી, ત્યારે 19 વર્ષીય વિદ્યાર્થીએ કોર્ટ પાસે 10 મિનિટનો સમય માંગ્યો. આ વિદ્યાર્થી વકીલ નહોતો, પરંતુ ડૉક્ટર બનવાની ઇચ્છા રાખતો NEET પાસ કરનાર ઉમેદવાર હતો. થોડીવારમાં જ આખી પરિસ્થિતિ પલટી ગઈ. કોર્ટે રાષ્ટ્રીય તબીબી આયોગ (NMC) અને મધ્યપ્રદેશ સરકારને આર્થિક રીતે નબળા વર્ગ (EWS)ના લાયક વિદ્યાર્થીઓને MBBS અભ્યાસક્રમોમાં કામચલાઉ પ્રવેશ આપવાનો આદેશ આપ્યો.
મીડિયા સૂત્રોના અહેવાલ મુજબ, સુપ્રીમ કોર્ટે બંધારણની કલમ 142 હેઠળ પોતાની વિશેષ સત્તાઓનો ઉપયોગ કરીને આ આદેશ બહાર પાડ્યો છે. મધ્યપ્રદેશના જબલપુરના 12મા ધોરણના સ્નાતક અથર્વ ચતુર્વેદી (19), બે વાર NEET પરીક્ષા પાસ કરી હતી અને 530 ગુણ મેળવ્યા હતા. તેમ છતાં, રાજ્ય સરકારે ખાનગી મેડિકલ કોલેજોમાં EWS અનામત લાગુ ન કરી હોવાથી તેને બેઠક ન મળી.
વિદ્યાર્થીએ પોતે સુપ્રીમ કોર્ટમાં આ મુદ્દો ઉઠાવ્યો અને સ્પેશિયલ લીવ પિટિશન (SLP) દાખલ કરી. મીડિયા રિપોર્ટ્સ અનુસાર, અથર્વ જબલપુરથી ઓનલાઈન અરજી દાખલ કરી અને ઓનલાઈન સુનાવણી દરમિયાન વકીલ વિના કોર્ટમાં હાજર થયો. જ્યારે CJI સૂર્યકાંતે તેમને પૂછ્યું કે, શું તેઓ પોતે આ કેસની દલીલ કરશે, ત્યારે અથર્વ સંમત થયા.
'મને ફક્ત 10 મિનિટ આપો, સાહેબ,' તેમણે કહ્યું, અને પોતાની દલીલ મુકવાની શરૂ કરી. અથર્વએ દલીલ કરી કે, બંધારણની મૂળભૂત ભાવના EWS જેવા વંચિત વર્ગોને તકો પૂરી પાડવાની છે. તેમણે સુપ્રીમ કોર્ટના અગાઉના નિર્ણયોનો પણ ઉલ્લેખ કર્યો.
મીડિયા સૂત્રોના જણાવ્યા અનુસાર, જ્યારે રાજ્યના વકીલે ખાનગી કોલેજો અંગેની પેન્ડિંગ નીતિનો ઉલ્લેખ કર્યો, ત્યારે મુખ્ય ન્યાયાધીશે કહ્યું, 'જો ખાનગી કોલેજો અનામત નીતિનું પાલન ન કરે, તો તેમને બંધ કરો. તેના પર તાળું લગાવી દો! તે ખૂબ જ સરળ છે. અનામત નીતિને કેવી રીતે અવગણી શકાય?'
વકીલે આગળ કહ્યું, 'અમારી ચિંતા એ છે કે વિદ્યાર્થીનું શોષણ પાછળથી ન થાય.' આના પર મુખ્ય ન્યાયાધીશે જવાબ આપ્યો, 'તે ખાનગી કોલેજને અમારી સમક્ષ લાવો!' જ્યારે રાજ્યના વકીલે આગ્રહ કર્યો કે માર્ગદર્શિકા બનાવવાની પ્રક્રિયા ચાલુ છે, ત્યારે મુખ્ય ન્યાયાધીશે કહ્યું, 'આ છોકરા (અરજદાર)ના ભવિષ્યને બગાડો નહીં.'
કોર્ટે થોડીવારમાં પોતાનો આદેશ આપ્યો. તેણે સ્વીકાર્યું કે ફક્ત નીતિગત ખામીઓને કારણે લાયક વિદ્યાર્થીને પ્રવેશ નકારી શકાય નહીં. સુનાવણી દરમિયાન, બેન્ચે જણાવ્યું હતું કે, રાજ્ય સરકારે ખાનગી કોલેજોમાં EWS અનામત લાગુ કરી નથી તેના આધારે પ્રવેશ નકારી શકાય નહીં. ત્યારપછી, કોર્ટે 2025-26 સત્ર માટે કામચલાઉ પ્રવેશનો આદેશ આપ્યો, જે ફી ચૂકવવાને આધીન છે.
કોર્ટે રાજ્ય સરકારને સાત દિવસની અંદર કોલેજ ફાળવવાનો પણ નિર્દેશ આપ્યો. જો કે, ખાનગી મેડિકલ કોલેજોમાં EWS શ્રેણી માટે નિશ્ચિત ફીનો અભાવ વિદ્યાર્થીના પરિવાર માટે નાણાકીય ચિંતાઓ ઉભી કરે છે. અથર્વના પિતા મનોજ ચતુર્વેદી વ્યવસાયે વકીલ છે. અથર્વ સરકારી શાળામાં અભ્યાસ કરતો હતો અને જબલપુર સરકારી એન્જિનિયરિંગ કોલેજ માટે પણ પસંદ થયો હતો. આમ છતાં, તેણે તબીબી ક્ષેત્ર પસંદ કર્યું.
આ અગાઉ, મધ્યપ્રદેશ હાઈકોર્ટે તેમની અરજી ફગાવી દીધી હતી, જેમાં આ જ પ્રકારની બીજી એક અરજી પહેલાથી જ ફગાવી દેવામાં આવી હતી, અને રાજ્ય સરકારને ખાનગી મેડિકલ કોલેજોમાં EWS બેઠકો વધારવા માટે એક વર્ષનો સમય આપ્યો હતો, જે હજુ સુધી સમાપ્ત થયો નથી. જો કે, ન્યાયાધીશ અથર્વની દલીલોથી પ્રભાવિત થયા હતા અને તેમની પ્રશંસા કરતા કહ્યું હતું કે, 'તમારે વકીલ બનવું જોઈએ, ડૉક્ટર નહીં. તમે ખોટા ક્ષેત્રમાં છો.'
હાઈકોર્ટે તેમની અરજી ફગાવી દીધા પછી, અથર્વ સુપ્રીમ કોર્ટમાં ગયા. આ કેસ ફક્ત એક વિદ્યાર્થી માટે રાહતનો નથી, પરંતુ નીતિગત અસ્પષ્ટતાને કારણે પ્રવેશ નકારવામાં આવેલા EWS ઉમેદવારોનો પણ છે.
5.jpg)
