સોશિયલ મીડિયા પર વ્યૂઝ અને લાઈક્સ મેળવવાની ભૂખ અત્યારે લોકોના માથે કઈ હદે સવાર છે, તેનો એક અત્યંત ચોંકાવનારો કિસ્સો બેંગલુરુથી સામે આવ્યો છે. અહીં એક પરિવારે 'હ્યુમન પાર્સલ' (પાર્સલમાં માણસ) બનાવીને રિલ શૂટ કરવાનો પ્રયાસ કર્યો હતો, જેના કારણે કુરિયર ઓફિસના કર્મચારીઓમાં ભારે હડકંપ મચી ગયો હતો.
શું હતી સમગ્ર ઘટના?
બેંગલુરુની એક કુરિયર ઓફિસમાં એક પરિવાર એક ખૂબ જ મોટું બોક્સ લઈને પહોંચ્યો હતો. જ્યારે કર્મચારીઓને આ મોટા પેકેટ પર શંકા ગઈ અને તેમણે પૂછપરછ કરીને બોક્સ ખોલ્યું, તો અંદરનું દ્રશ્ય જોઈને તેઓ સ્તબ્ધ થઈ ગયા. એ બોક્સની અંદર એક વૃદ્ધ વ્યક્તિ (મહિલાના પિતા) બંધ હાલતમાં મળી આવ્યા હતા. તપાસમાં જાણવા મળ્યું કે આ સમગ્ર કાવતરામાં એક મહિલા, તેનો પતિ, સાસુ અને દિયર સામેલ હતા.
રિલ બનાવવાનો વિચિત્ર આઈડિયા
પરિવારની પૂછપરછ કરતા જાણવા મળ્યું કે તેઓ રમઝાન અને ઉગાડી (દક્ષિણ ભારતીય નવું વર્ષ) ના તહેવારો દરમિયાન થતી ભીડ પર એક રિલ બનાવવા માંગતા હતા. તેમનો આઈડિયા એવો હતો કે- તહેવારો પર બસોની ટિકિટ મળવી એટલી મુશ્કેલ છે કે માણસને 'કુરિયર' દ્વારા મોકલવા સિવાય બીજો કોઈ વિકલ્પ બચ્યો નથી. આ સંદેશ દર્શાવવા માટે તેમણે પોતાના જ પિતાને જોખમમાં મૂકીને પાર્સલમાં પેક કરી દીધા હતા.
https://twitter.com/MissionAmbedkar/status/2034186275977404910
વૃદ્ધની હાલત લથડી છતાં પરિવારની દાદાગીરી
જ્યારે કુરિયર ઓફિસમાં બોક્સ ખોલવામાં આવ્યું ત્યારે વૃદ્ધની સ્થિતિ ઘણી ખરાબ હતી. તેમને શ્વાસ લેવામાં ભારે તકલીફ થઈ રહી હતી. કર્મચારીઓએ તરત જ દરમિયાનગીરી કરીને વૃદ્ધને બહાર કાઢ્યા હતા. આશ્ચર્યની વાત તો એ છે કે, સ્થિતિ આટલી ગંભીર હોવા છતાં પરિવારના સભ્યો કર્મચારીઓ સાથે દલીલ કરી રહ્યા હતા કે તેઓ ખૂબ દૂરથી આવ્યા છે, તેથી તેમનું 'પાર્સલ' સ્વીકારવામાં આવે.
પોલીસ કાર્યવાહી અને માફીનામું
ઘટનાની જાણ થતા જ પોલીસ કાફલો સ્થળ પર પહોંચી ગયો હતો અને સમગ્ર પરિવારને પોલીસ સ્ટેશન લઈ જવામાં આવ્યો હતો. પોલીસે તમામ સભ્યોના નિવેદન નોંધ્યા હતા. બાદમાં પરિવારે પોતાની ભૂલ સ્વીકારી હતી અને એક માફીનામું વીડિયો પણ જાહેર કર્યો હતો, જેમાં તેમણે માન્યું હતું કે તેમનું આ કૃત્ય અત્યંત બિનજવાબદાર હતું. પોલીસે પરિવારને કડક ચેતવણી આપીને છોડી દીધા છે કે ભવિષ્યમાં આવા જીવલેણ સ્ટંટ કે રિલ બનાવવાનો પ્રયાસ ન કરવામાં આવે.
16.jpg)
