અશોક ગેહલોત સરકારી કર્મચારીઓને લઇને કર્યો મોટો નિર્ણય, ખુશી વ્યાપી ગઇ

રાજસ્થાન સરકારના કર્મચારીઓને હવે 25 વર્ષની સેવા પૂર્ણ કર્યા બાદ નિવૃત્તિ પછી જ સંપૂર્ણ પેન્શનનો લાભ મળશે. પહેલા આ મર્યાદા 28 વર્ષની હતી. રાજસ્થાનના CM અશોક ગેહલોતની અધ્યક્ષતામાં મંગળવારે રાત્રે રાજ્ય કેબિનેટની બેઠકમાં આ નિર્ણય લેવામાં આવ્યો હતો. આ રીતે, રાજ્યના સરકારી કર્મચારીઓ માટે આ સમાચાર એક સારા સમાચાર તરીકે આવ્યા છે અને રાજ્યના લાખો સરકારી કર્મચારીઓ અને પેન્શનરોને તેનો લાભ મળશે.

એક નિવેદન અનુસાર, CM અશોક ગેહલોત કેબિનેટે રાજસ્થાન સિવિલ સર્વિસીસ (પેન્શન) નિયમો, 1996માં સુધારો કરવાના પ્રસ્તાવને મંજૂરી આપી દીધી છે. આ સાથે, 28 વર્ષની આવશ્યક સેવાને બદલે, કર્મચારીઓને 25 વર્ષની સેવા અને નિવૃત્તિ પૂર્ણ કર્યા પછી જ સંપૂર્ણ પેન્શનનો લાભ મળી શકશે. આ સિવાય 75 વર્ષના પેન્શનરો અને ફેમિલી પેન્શનરોને 10 ટકા વધારાનું પેન્શન ભથ્થું મળશે.

કર્મચારી અથવા પેન્શનરનું મૃત્યુ થવાના કિસ્સામાં, તેના પરિણીત વિકલાંગ પુત્ર/પુત્રી અને પ્રતિ માસ રૂ. 12,500 સુધીની કમાણી કરતા પાત્ર સભ્યો પણ કુટુંબ પેન્શનનો લાભ મેળવી શકશે. આ સુધારાની સૂચના 1 એપ્રિલ, 2023થી લાગુ થશે.

બેઠકમાં કર્મચારીઓના હિતમાં બઢતી, પેન્શન, વિશેષ પગાર, હોદ્દો અંગેના મહત્વના નિર્ણયો લેવામાં આવ્યા હતા. કેબિનેટે રાજસ્થાન સિવિલ સર્વિસીસ (રિવાઈઝ્ડ પે) નિયમો, 2017માં સુધારો કરવાના પ્રસ્તાવને પણ મંજૂરી આપી દીધી છે. આનાથી કર્મચારીઓના વિશેષ પગારમાં વધારો થશે. અત્રે ઉલ્લેખનીય છે કે, રાજસ્થાનના CM અશોક ગેહલોતે 2023-24ના બજેટમાં આની જાહેરાત કરી હતી.

CM અશોક ગેહલોત કેબિનેટે વીર ગુર્જર વિકાસ અને ચેરિટેબલ ટ્રસ્ટ, ભીલવાડા અને રેગર સમાજ, બિકાનેરને જમીન ફાળવવાના પ્રસ્તાવને પણ મંજૂરી આપી છે. આ સાથે કેબિનેટે મેડિકલ કોલેજ દૌસાનું નામ બદલીને 'પંડિત નવલ કિશોર શર્મા મેડિકલ કોલેજ દૌસા' કરવાના પ્રસ્તાવને પણ મંજૂરી આપી દીધી છે.

મંત્રીમંડળે હવે કોઈપણ ભરતી વર્ષમાં પછાત વર્ગ અને અત્યંત પછાત વર્ગના લાયક ઉમેદવારો ઉપલબ્ધ ન થવાના કિસ્સામાં અનુસૂચિત જાતિ અને અનુસૂચિત જનજાતિ કેટેગરીની જેમ તેમની ખાલી જગ્યાઓ આગામી ત્રણ વર્ષ માટે આગળ મોકલવાનો નિર્ણય લીધો છે. આ સાથે, આ વર્ગના ઉમેદવારોને રોજગારીની વધુ તકો મળી શકશે.