જમ્મુ-કાશ્મીરના મુખ્યમંત્રી ઓમર અબ્દુલ્લા દ્વારા પત્રકાર નિધિ રાઝદાન સાથે લગ્ન કર્યાની જાહેરાત કર્યાના બે દિવસ બાદ એક ધાર્મિક વિવાદ સામે આવ્યો છે. ઓલ ઈન્ડિયા મુસ્લિમ જમાતના અધ્યક્ષ મૌલાના મુફ્તી શહાબુદ્દીન રઝવી બરેલવીએ આ લગ્નને ઈસ્લામિક સિદ્ધાંતો મુજબ અમાન્ય (ગેરકાયદેસર) જાહેર કર્યા છે.
મૌલાના રઝવીએ જણાવ્યું હતું કે, ઈસ્લામિક સિદ્ધાંતો હેઠળ આ લગ્નને માન્ય ગણી શકાય નહીં કારણ કે શરિયા કાયદા હેઠળ લગ્ન કાયદેસર ગણાવવા માટે બંને વ્યક્તિઓનું મુસ્લિમ હોવું જરૂરી છે. તેમણે ઉમેર્યું હતું કે ઓમર અબ્દુલ્લા મુસ્લિમ છે જ્યારે નિધિ રાઝદાન મુસ્લિમ નથી, તેથી ઈસ્લામિક દ્રષ્ટિકોણથી તેમના લગ્ન અસ્વીકાર્ય છે.
આ મુદ્દે વાત કરતા ધાર્મિક નેતાએ જણાવ્યું હતું કે, ઓમર અબ્દુલ્લાએ નિકાહ પહેલા નિધિ રાઝદાન ઈસ્લામ ધર્મ અંગીકાર કરે તે સુનિશ્ચિત કરવું જોઈતું હતું.
તેમણે દાવો કર્યો હતો કે જો તેમણે ઈસ્લામ ધર્મ અપનાવ્યો હોત અને બંનેએ ઈસ્લામિક રીત-રિવાજો અને પરંપરાઓ અનુસાર લગ્ન કર્યા હોત, તો આ લગ્નને શરિયા હેઠળ માન્ય ગણી શકાયા હોત.
પોતાના વલણની સ્પષ્ટતા કરતા રઝવીએ કહ્યું કે, ઈસ્લામમાં લગ્ન સંબંધિત ચોક્કસ નિયમો અને શરતો નક્કી કરવામાં આવી છે, જેમાં પુરૂષ અને સ્ત્રી બંનેનું મુસ્લિમ હોવું ફરજિયાત છે.
જો બંનેમાંથી એક પણ વ્યક્તિ મુસ્લિમ ન હોય, તો તે લગ્નને કાયદેસર ગણી શકાય નહીં, તેમ કહીને તેમણે આ લગ્ન સામે પોતાનો વિરોધ દોહરાવ્યો હતો.
તેમણે વધુમાં દલીલ કરી હતી કે અબ્દુલ્લાએ લગ્ન આગળ ધપાવતા પહેલા રાઝદાનનું ધર્માંતરણ કરાવવું જોઈતું હતું. આ શરત પૂરી થઈ ન હોવાથી ધાર્મિક નેતાએ આ લગ્નને ઈસ્લામિક સિદ્ધાંતો મુજબ 'નાજાયજ' ગણાવ્યા છે.
આ દંપતીના લગ્નની જાહેરાત બાદ મૌલાના રઝવીના આ નિવેદનને કારણે ધાર્મિક માન્યતાઓ અને વ્યક્તિગત સ્વતંત્રતાનો મુદ્દો ફરી ચર્ચાની એરણે આવ્યો છે. જોકે, મૌલાનાની આ જાહેરાત ઈસ્લામિક ધાર્મિક સિદ્ધાંતોના તેમના પોતાના અર્થઘટનને દર્શાવે છે.
ઉલ્લેખનીય છે કે, ભારતમાં કોઈ પણ લગ્નની કાનૂની માન્યતા દેશના લાગુ પડતા નાગરિક કાયદાઓ હેઠળ નક્કી થાય છે અને માત્ર કોઈ ધાર્મિક ફતવાના આધારે તેને અમાન્ય ઠેરવી શકાતી નથી.
1.jpg)
14.jpg)
5.jpg)