દિલ્હીમાં પોલીસ ધરણા પર બેસી ગઈ, DCP મનાવવા આવ્યા પણ રોડ પરથી ન હટ્યા, જાણો શું છે મામલો

દેશની રાજધાની દિલ્હીમાં સોમવારે (2 નવેમ્બર) એક અલગ જ નજારો જોવા મળ્યો હતો. દિલ્હી પોલીસ હેડક્વાર્ટર નજીક રસ્તાઓ પર પોલીસકર્મીઓ વિરોધ પ્રદર્શન કરી રહ્યા હતા અને તેમને રોકવાનું કામ પણ પોલીસ જ કરી રહી હતી. આજે સવારે આ દ્રશ્ય જેણે પણ જોયું તે આશ્ચર્યચકિત થઈ ગયું. સામાન્ય લોકો એકબીજાને પૂછતા જોવા મળ્યા કે ભાઈ, આખરે દિલ્હીમાં થઈ શું રહ્યું છે?

પૂર્વ દિલ્હીના શાહદરા પોલીસ સ્ટેશનમાં પોલીસ અને કડકડડૂમા કોર્ટના વકીલો વચ્ચે વિવાદ થયો હતો. આ વિવાદના કારણે પોલીસ દ્વારા 26 ઓક્ટોબરે વકીલો સામે FIR નોંધવામાં આવી હતી. સામે પક્ષે, 27 ઓક્ટોબરે વકીલોએ પોલીસ વિરુદ્ધ કામકાજ બંધ રાખીને હડતાળ પાડી હતી. આક્ષેપ છે કે બે દિવસ ચાલેલી હડતાળ બાદ દબાણમાં આવીને પોલીસે ACP મનસ્વી વસિષ્ઠ અને પોલીસ સ્ટેશનના ઇન્ચાર્જની બદલી કરી દીધી હતી. આ નિર્ણયના વિરોધમાં જ સોમવારે દિલ્હી પોલીસના જવાનો રસ્તા પર ઉતરી આવ્યા છે.

જોતજોતામાં દિલ્હી પોલીસના જવાનોના આ પ્રોટેસ્ટમાં પોલીસકર્મીઓની સંખ્યા સતત વધવા લાગી હતી. ગુસ્સે ભરાયેલા પોલીસકર્મીઓ પોતાની ડ્યુટી છોડીને પ્રદર્શનમાં સામેલ થવા પહોંચી ગયા હતા. આ દરમિયાન કેટલીક મહિલા પોલીસકર્મીઓ અત્યંત આક્રોશિત થઈ ગઈ હતી અને તેમણે જોરદાર સૂત્રોચ્ચાર કર્યા હતા.

ઇતિહાસમાં એવું પહેલીવાર બન્યું હોવાનું કહેવાય છે કે દિલ્હી પોલીસ મુખ્યાલયમાં જ પોલીસના વિરોધમાં પોલીસના જવાનો નારેબાજી કરતા નજરે પડ્યા હતા. જોકે, પોલીસ જવાનોનો વિરોધ વધતો જોઈને ઉચ્ચ અધિકારીઓ તેમની સાથે વાતચીત કરવા મજબૂર બન્યા હતા.

https://twitter.com/Polytikles/status/2117194642525728987

દિલ્હીમાં તીસ હજારી કોર્ટ પરિસરમાં થયેલા વિવાદ બાદ આ બીજી વખત છે જ્યારે દિલ્હી પોલીસના જવાનો પોતાના અધિકારો અને સન્માનની રક્ષા માટે રસ્તા પર ઉતર્યા છે. પોલીસકર્મીઓએ સીધા પોલીસ હેડક્વાર્ટરની બહાર વિરોધ પ્રદર્શન કર્યું છે.

નવી દિલ્હીના DCP સચિન શર્મા પ્રદર્શન કરી રહેલા અધિકારીઓને વાતચીત કરવા માટે પોલીસ હેડક્વાર્ટરની અંદર આવવા મનાવવાનો પ્રયાસ કર્યો હતો, પણ પ્રદર્શન કરી રહેલા પોલીસકર્મીઓએ અંદર આવીને વાત કરવાની ના પાડી દીધી હતી. DCPએ પોલીસકર્મીઓને ડ્યૂટી યાદ અપાવી હતી, પણ પોલીસકર્મીઓ રોડ પર બેસી ગયા હતા. માહિતી મળી રહી છે કે નવી દિલ્હી ડિસ્ટ્રિક્ટના ઓન-ડ્યુટી પોલીસ અધિકારીઓ પણ આ પ્રોટેસ્ટમાં જોડાઈ ગયા છે. વકીલો સાથે થયેલા વિવાદ અને એક વકીલ પર થયેલા કથિત હુમલા બાદ ACP સહિત બે અધિકારીઓની બદલી કરવામાં આવી હતી, જેના કારણે પોલીસકર્મીઓમાં ભારે નારાજગી જોવા મળી રહી છે.

https://twitter.com/RajatJain/status/2117165704185032986

રાજધાની દિલ્હીમાં આજનું દ્રશ્ય જોઈને તો દરેક કોઈ આશ્ચર્યચકિત થઈ ગયું હતું, જ્યારે વિરોધ કરી રહેલા પોલીસ જવાનોને પોલીસ જ રોકતી જોવા મળી હતી.

પોલીસ કમિશનર અનુરાગ કુમાર સાથેની બેઠકમાં ACP મનસ્વી વસિષ્ઠે કેટલીક માંગણીઓ મૂકી હતી,

1. વકીલો વિરુદ્ધ દર્જ કરાયેલો કેસ રદ ન થવો જોઈએ.
2. બાર કાઉન્સિલના સભ્યનું નામ કેસમાંથી હટાવવામાં ન આવે.
3. આજે જે પણ પોલીસકર્મીઓ આ પ્રદર્શનમાં સામેલ થયા છે તેમની વિરુદ્ધ કોઈ પણ કાનૂની કાર્યવાહી થવી જોઈએ નહીં.

જો પોલીસ વિભાગ સસ્પેન્શનથી લઈને અન્ય કોઈ સખત કાર્યવાહી કરવા માંગતું હોય તો તે માત્ર મારી સામે જ કરવામાં આવે.