સાંસદના પુત્રએ કારથી મહિલાને કચડી નાખી, ધરપકડ પહેલા જ જામીન મળી ગયા

તેલંગાણાની રાજધાની હૈદરાબાદમાં પૂરપાટ ઝડપે દોડતી એસ્ટન માર્ટિન કારની ટક્કરથી એક 26 વર્ષીય મહિલાનું મોત થઇ ગયું. આ અકસ્માત હૈદરાબાદના માધાપુર વિસ્તારમાં એક મોલની બહાર થયો હતો. પોલીસના જણાવ્યા અનુસાર, કાર આંધ્ર પ્રદેશના રાજ્યસભા સાંસદ લિંગમનેની રમેશનો પુત્ર 23 વર્ષીય લિંગામનેની સંજુશ ચલાવી રહ્યો હતો. મૃતક મહિલાની ઓળખ ભારતી મુખી (26) તરીકે થઈ છે.

ભારતી મોલમાં સેલ્સવુમન તરીકે કામ કરતી હતી. પોલીસે જણાવ્યું હતું કે 16 ઓગસ્ટના રોજ બપોરે 3 વાગ્યાની આસપાસ ભારતી તેના સાથીદાર સાથે નજીકની હોટલમાં ખોરાક લેવા ગઈ હતી. તે મોલમાં પાછી ફરી રહી હતી. આ દરમિયાન તે રસ્તો ક્રોસ કરી રહી હતી, ત્યારે કારે તેને ટક્કર મારી દીધી. ટક્કર જોરદાર હતી કે, ભારતીના માથામાં ગંભીર ઈજા થઈ હતી. અકસ્માત બાદ તેને તે જ કારમાં એપોલો હોસ્પિટલમાં લઈ જવામાં આવી હતી, પરંતુ ડૉક્ટરોએ તેને મૃત જાહેર કરી દીધી.

https://twitter.com/YSRCPEurope/status/2090461945216307520?s=20

આ ઘટના અંગે તેના સ્ટોર મેનેજર પંજલા અશ્વિન કુમારે FIR દાખલ કરાવી છે. ફરિયાદ અને તપાસના આધારે, પોલીસે ભારતીય ન્યાય સંહિતા (BNS)ની કલમ 106(1) હેઠળ સંજુશ વિરુદ્ધ કેસ નોંધ્યો છે. આ કલમ બેદરકારીથી કોઇનું મૃત્યુ થવા સાથે જોડાયેલી છે અને તેમાં પાંચ વર્ષ સુધીની જેલ અને દંડની સજા છે.

પોલીસનું કહેવું છે કે તપાસમાં પુરાવા મળ્યા છે કે અકસ્માત સમયે સંજુશ કાર ચલાવી રહ્યો હતો. અધિકારીઓ હવે વાહનની ગતિ અને અકસ્માતની કેવા સંજોગોમાં થયો તેની તપાસ કરી રહ્યા છે. સંજુશની અત્યાર સુધી ધરપકડ કરવામાં આવી નથી; પોલીસે જણાવ્યું કે ગુનો જામીનપાત્ર છે, તેથી તેને નોટિસ ફટકારવામાં આવી છે, અને તપાસ ચાલુ છે.

કોણ છે આરોપી સંજુશ?

ધ ઇન્ડિયન એક્સપ્રેસના અહેવાલ મુજબ, પોલીસે જણાવ્યું હતું કે સંજુશે દારૂ કે ડ્રગ્સના નશામાં ગાડી ચલાવી નહોતી. તેની સામે અગાઉ કોઈ કેસ નોંધાયેલ નથી. સંજુશ બ્લેક રિજ એનર્જી લિમિટેડ નામની કંપનીમાં ડિરેક્ટર છે. તેણે અમેરિકાના ડલ્લાસની યુનિવર્સિટી ઓફ ટેક્સાસમાં કમ્પ્યુટર સાયન્સનો અભ્યાસ કર્યો છે.

સંજુશ આંધ્ર પ્રદેશના રાજ્યસભા સાંસદ અને પવન કલ્યાણની જનસેના પાર્ટીના નેતા લિંગમનેની રમેશનો પુત્ર છે. લિંગમનેની રમેશ જનસેના પાર્ટીનું પ્રતિનિધિત્વ કરતા સાંસદ છે. આંધ્રપ્ર દેશમાં, જનસેના પાર્ટી તેલુગુ દેશમ પાર્ટી (ટીડીપી) સાથે મળીને સરકાર ચલાવી રહી છે. જોકે, અકસ્માત અંગે સાંસદ તરફથી હજુ સુધી કોઈ સાર્વજનિક પ્રતિક્રિયા આવી નથી.