કેપ્ટન તરીકે પહેલી વન-ડેમાં ઐયરને મળી 244 રનની કારમી હાર... જાણો હાર બાદ શ્રેયસ ઐય્યરે શું કહ્યું?

ન્યૂઝીલેન્ડ સામેની ચોથી વન-ડેમાં ટીમ ઈન્ડિયાનું પ્રદર્શન ખૂબ નબળું રહ્યું. ન્યૂઝીલેન્ડે જે પીચ પર પ્રથમ બેટિંગ કરતા 333 રન બનાવ્યા હતા, તે જ પીચ પર ભારતીય ટીમ માત્ર 89 રન પર ઢેર થઇ ગઇ. સવાલ એ છે કે, એવું તો શું થઈ ગયું કે ભારતના અનુભવી બેટ્સમેનો પણ ક્રિઝ પર ટકી શકવું મુશ્કેલ થઇ ગયું? શ્રેયસ ઐય્યરે જણાવ્યું કે શા માટે ભારતીય બેટિંગ લાઇનઅપ ગંજીપાનાંના મહેલની જેમ ધરાશાયી થઈ ગઈ. આખરે એવું શું થયું?

શ્રેયસ ઐય્યરે જણાવ્યું કે, પહેલી ઇનિંગ અને બીજી ઇનિંગની પીચમાં ખૂબ મોટા તફાવત જોવા મળ્યો. તેણે કહ્યું કે, આવી હાર જોવી ખૂબ મુશ્કેલ છે. પરંતુ પિચની બાબતમાં પ્રથમ ઇનિંગ અને બીજી ઇનિંગ વચ્ચે ખૂબ મોટો તફાવત હતો. પરંતુ હેનરીએ યોગ્ય જગ્યાએ બોલિંગ કરી અને તેનો શ્રેય તેને મળવો જોઇએ.

શ્રેયસ ઐય્યરે કહ્યું કે તેને લાગ્યું હતું કે પીચ બેટિંગ માટે સારી હતી, પરંતુ બીજી ઇનિંગમાં કંઇક અલગ જ જોવા મળ્યું. અમે વિચાર્યું કે કે વિકેટ બેટિંગ માટે સારી હતી, અમે જોયું કે, તેમણે 330 રન બનાવ્યા. જાહેર છે કે, અમારાથી કેટલાક કેચ છૂટ્યા, પરંતુ મેચમાં આવું થાય છે. અમે ડ્રેસિંગ રૂમમાં ગયા અને વિચાર્યું કે સરળતાથી જીતી જઇશું, પરંતુ બોલ જે રીતે અંદર-બહાર 'સીમ' થઈ રહ્યો હતો, તે અનપેક્ષિત હતું. પરંતુ પીચનું સંપૂર્ણપણે અલગ હોય તેમ લાગતું હતું. અમે ખૂબ જ સારા બોલ પર વિકેટ ગુમાવી, તમામ સારા બૉલ હતા. અમે આ મેચને ભૂલીને આગળ વધવા માંગીશું. અમે જોઇશું અમારી બોલિંગ અને બેટિંગમાં ક્યાં ભૂલ થઈ. સાથે આગામી મેચમાં નવા માઇન્ડસેટ સાથે ઉતરીશું.

પોસ્ટ મેચ પ્રેઝન્ટેશનમાં મિશેલ સેન્ટનરે ન્યૂઝીલેન્ડના પ્રદર્શન અંગે વાત કરતા કહ્યું કે, હાં, હું ખૂબ ખુશ છું. ફરીથી બોલિંગ ન કરવી પડી એટલે ખુશ છું! મને લાગે છે કે ખેલાડીઓએ પાવરપ્લેમાં જ તેમના પર દબાણ બનાવી દીધું હતું, જે સારી વાત રહી. ત્યારબાદ, યંગી (વિલ યંગ)એ પોતાનું કામ કર્યું અને સીફર્ટે પણ વચ્ચે વચ્ચે સારી ઇનિંગ રમી, જેનાથી અમને એક સારા સ્કોર સુધી પહોંચી ગયા.

તેણે કહ્યું કે, અમને લાગે છે કે કદાચ અમે થોડા વધુ રન બનાવી શકતા હતા, પરંતુ મેટ હેનરીએ નવા બૉલ સાથે સારી બોલિંગ કરી. અમે 360ના સ્કોર બાબતે વિચારી રહ્યા હતા. આખી ઇનિંગ દરમિયાન અમારો ઇરાદો ખૂબ સારો હતો. જો અમે દરેક ભાગીદારીને લગભગ 20 બોલ આગળ લઇ જઇ શકતા, તો કદાચ અમે 50 ઓવર પૂરી કરી શકતા હતા અને ડેથ ઓવર્સ માટે એક મજબૂત પાયો રાખી શકતા હતા. 6 વિકેટ લેનાર મેટ હેનરી અંગે સેન્ટનરે કહ્યું કે, અદ્ભુત! તે આજે રમવા માટે માંગતો હતો. મને લાગે છે છે કે નવા બોલ સાથે, અને એવી પિચ પર જ્યાં બોલરોને થોડી મદદ મળી રહી હોય, તે દુનિયાનો શ્રેષ્ઠ બોલર છે. પહેલી જ ઓવરમાં 3 મોટી વિકેટ લેવાથી અમે મજબૂત સ્થિતિમાં આવી ગયા.

ઉલ્લેખનીય છે કે, ભારત અને ન્યૂઝીલેન્ડ વચ્ચે પાંચમી અને અંતિમ વન-ડે રવિવારે રમાશે. આ મેચમાં જીત મેળવવાથી ટીમ ઈન્ડિયા વન-ડે સીરિઝ પોતાના નામે કરી લેશે. આગામી મેચ પણ આ જ મેદાન પર રમાવાની છે, ત્યારે જોવાનું એ રહેશે કે ટીમ ઈન્ડિયા કેવી રીતે વાપસી કરે છે.