સુનિલ ગાવસ્કર બન્યા 'ગંભીર', કોચ-કેપ્ટન પર થયા ગુસ્સે, કહ્યું- દુબેને કંઈ નહોતું

ભારત અને ઇંગ્લેન્ડ વચ્ચેની ચોથી T20માં કન્કશન સબસ્ટિટ્યુટને લઈને ઘણો વિવાદ થયો હતો. હાર પછી, ઇંગ્લેન્ડે તેના પર ઘણો હોબાળો મચાવ્યો. હવે ફરી એકવાર આ વિવાદ ગરમાયો છે. ભારતના દિગ્ગજ સુનીલ ગાવસ્કરે આ બાબતે પ્રતિક્રિયા આપી છે. ગાવસ્કર માને છે કે, હર્ષિત રાણા અને શિવમ દુબે વચ્ચે લાઈક ટુ લાઈક જેવું કંઈ પણ નથી. તેમણે તો એમ પણ કહ્યું કે, શિવમ દુબેને કંઈ થયું જ ન હતું.

ટેલિગ્રાફમાં પોતાની કોલમમાં સુનીલ ગાવસ્કરે કહ્યું, 'પુણેમાં રમાયેલી ચોથી T20 મેચમાં બોલ શિવમ દુબેના હેલ્મેટ પર વાગ્યો, પરંતુ તે પછી પણ તે અંત સુધી રમી રહ્યો હતો. આ સ્પષ્ટપણે દર્શાવે છે કે, તેને માથામાં ઈજા થઈ ન હતી. આ કારણોસર, 'કન્ક્શનના કારણે સબસ્ટિટ્યૂટને મંજૂરી આપવી જ ખોટી હતી. તે બેટિંગ પૂરી કરી ચુક્યો હતો. હવે તેનો સબસ્ટિટ્યૂટ ફક્ત ફિલ્ડિંગ જ કરી શકે છે, બોલિંગ નહીં.'

ટેસ્ટ ક્રિકેટમાં 10,000 રન બનાવનારા આ અનુભવી ખેલાડીએ આગળ કહ્યું, 'શિવમ દુબે અને હર્ષિત રાણા વચ્ચે લાઈક ટુ લાઈક જેવું કંઈ હતું જ નહીં. મજાકમાં કોઈ એમ કહી શકે કે, તેમની ઊંચાઈ અને ફિલ્ડિંગ સમાન છે અને તેમનું શરીર પણ એક સમાન છે.' ફિલ્ડિંગ પણ એ જ છે. નહીં તો, જ્યાં સુધી તેમની વાત છે, ત્યાં સુધી તેમની વચ્ચે લાઈક ટુ લાઈક જેવું કોઈ સમાનતા હતી જ નહીં. ઇંગ્લેન્ડ પાસે ગુસ્સે થવાનું દરેક કારણ છે. આ ભારતીય ટીમ એક શાનદાર ટીમ છે અને ભારતીય ટીમ એવી નથી કે, તેની જીતને કલંકિત કરવાની જરૂર છે.'

ચોથી T20માં ભારતીય ઓલરાઉન્ડર શિવમ દુબેના માથા પર બોલ વાગ્યો હતો, જેના કારણે તે મેચમાં ફિલ્ડિંગમાં આવી શક્યો ન હતો. નિયમો મુજબ, ભારતે તેના સ્થાને હર્ષિત રાણાને ટીમમાં સામેલ કર્યો. ઇંગ્લેન્ડની ટીમ અને કેવિન પીટરસને આ નિર્ણય પર નારાજગી વ્યક્ત કરી અને તેને ભારતનું 'વ્યૂહાત્મક પગલું' ગણાવ્યું.

કેવિન પીટરસનનું માનવું હતું કે, ભારતે કન્કશન સબસ્ટિટ્યૂટ નિયમોનો ફાયદો ઉઠાવ્યો હતો. તેમણે કહ્યું કે દુબેની જગ્યાએ રાણાનો સમાવેશ 'લાઈક ટુ લાઈક' વિકલ્પ નહોતો, પરંતુ તેનાથી ભારતને બોલિંગમાં એક વધારાનો વિકલ્પ મળ્યો. હાર પછી, ઇંગ્લિશ કેપ્ટન જોસ બટલરે પણ આ અંગે નારાજગી વ્યક્ત કરી અને કહ્યું કે, આ કોઈ 'લાઈક ટુ લાઈક' જેવું રિપ્લેસમેન્ટ ન હતું.