સિંગાપોર વિશ્વભરમાં તેના કડક કાયદા અને શિસ્ત માટે જાણીતું છે, પરંતુ તાજેતરમાં, ત્યાંનો એક કાયદો સોશિયલ મીડિયા પર ચર્ચાનો વિષય બન્યો છે. વાયરલ થયેલા એક વીડિયોમાં, એક ભારતીય કન્ટેન્ટ ક્રિએટરે બતાવ્યું હતું કે, સિંગાપોરમાં રસ્તા પર પડેલી કેરી ઉપાડવી પણ મોંઘી પડી શકે છે. એવો દાવો કરવામાં આવ્યો હતો કે, આમ કરવાથી 5,000 સિંગાપોર ડૉલર અથવા આશરે 3.74 લાખ રૂપિયા સુધીનો દંડ થઈ શકે છે.
પ્રિયંકા સિંહા નામની કન્ટેન્ટ ક્રિએટરે આ વીડિયો ઇન્સ્ટાગ્રામ પર શેર કર્યો છે. વીડિયોમાં ઝાડ પર પાકેલી કેરીઓ દેખાય છે, જ્યારે નીચે રસ્તાના કિનારે બીજી ઘણી કેરીઓ પડેલી જોવા મળે છે. વીડિયોમાં, પ્રિયંકા બતાવે છે કે, દેખાવમાં ગમે તેટલી સ્વાદિષ્ટ કેરી હોય, તેને ત્યાંથી ઉઠાવવી ગેરકાયદેસર હોઈ શકે છે.
પ્રિયંકાએ બતાવ્યું કે, સિંગાપોરમાં, સરકારી જમીન પર વાવેલા ઝાડ પરના ફળ પણ સરકારી મિલકત માનવામાં આવે છે. તેથી, ફક્ત ઝાડ પરથી ફળ તોડવાનું જ નહીં, પણ પરવાનગી વિના તેની જમીન પર પડેલા ફળ પણ ઉઠાવવા એક ગુનો ગણી શકાય છે.
https://www.instagram.com/reel/DYFE1E2JE8D/
સિંગાપોરના રાષ્ટ્રીય વિકાસ મંત્રાલય અનુસાર, રાજ્યની જમીન પરના વૃક્ષો અને તેમના ફળો સરકારના અધિકારક્ષેત્ર હેઠળ આવે છે. સરકારની માલિકીની સંસ્થા, NParks, આ વૃક્ષોનું સંચાલન કરે છે. જે કોઈ આવા વૃક્ષો પરથી ફળ તોડવા અથવા પડી ગયેલા ફળ ઉઠાવવા માંગે છે, તો તેણે પહેલા પરવાનગી લેવી પડતી હોય છે.
કાયદા અનુસાર, જાહેર પાર્કમાં પરવાનગી વિના ફળ તોડવા અથવા ઉઠાવવા પર 5,000 ડૉલર સુધીનો દંડ થઈ શકે છે. જો આ કામ નેચર રિઝર્વ અથવા રાષ્ટ્રીય ઉદ્યાનમાં કરવામાં આવે છે, તો દંડ 50,000 ડૉલર સુધી પહોંચી શકે છે. કેટલાક કિસ્સાઓમાં, જેલની સજા પણ શક્ય છે.
વીડિયો વાયરલ થયા પછી, સોશિયલ મીડિયા પર વિવિધ પ્રતિક્રિયાઓ સામે આવી. એક યુઝરે પૂછ્યું કે, જો પાલતુ પ્રાણી તે ફળ ઉઠાવી લે તો શું થશે. આના પર પ્રિયંકાએ મજાકમાં જવાબ આપ્યો, 'પાલતુ પ્રાણી તમારું છે, તેથી તમારે જ દંડ ભરવો પડશે.' ઘણા લોકોએ પ્રશ્ન કર્યો કે, જો ફળ જમીન પર પડી જ ગયું છે તો તેને એમ જ કેમ બગડવા દેવામાં આવે.
સિંગાપોર અગાઉ પણ તેના અનોખા અને કડક કાયદાઓ માટે સમાચારમાં રહ્યું છે. ત્યાં ચ્યુઇંગ ગમનું વેચાણ અને આયાત પ્રતિબંધિત છે. જાહેર જગ્યાઓ પર કચરો ફેંકવા, થૂંકવા અથવા પબ્લિક ટોયલેટ ફ્લશ ન કરવા પર પણ ભારે દંડ થઈ શકે છે. ત્યાં સુધી કે બસ અને મેટ્રોમાં ખાવા-પીવાને પણ ગેરકાયદેસર ગણવામાં આવે છે.
આ જ કારણ છે કે લોકો મજાકમાં સિંગાપોરને 'ફાઈન સીટી' (દંડનું શહેર)કહે છે, જ્યાં નાની ભૂલની પણ મોટી કિંમત ચૂકવવી પડે છે.
