2019માં ફ્રાન્સિસ કોનોલીનું જીવન સંપૂર્ણપણે બદલાઈ ગયું જ્યારે તે અને તેના પતિ, પેડીએ વિશાળ યુરોમિલિયન્સ જેકપોટ જીત્યો. તેમના હાથમાં લગભગ 115 મિલિયન પાઉન્ડ, એટલે કે આશરે 1,470 કરોડ રૂપિયા આવ્યા.
આ મોટી રકમ કોઈપણ પરિવારની જીવનભરની જરૂરિયાત કરતાં વધુ છે. અચાનક કરોડપતિ બન્યા પછી, ફ્રાન્સિસની સામે પણ આ જ પ્રશ્ન હતો, આટલા બધા પૈસાનું શું કરવું. પરંતુ તેમણે ઝડપથી પોતાની પ્રાથમિકતાઓ નક્કી કરી લીધી.
મીડિયા સૂત્રોના અહેવાલ મુજબ, ફ્રાન્સિસે તેની મોટાભાગની સંપત્તિ ફક્ત તેના પરિવાર માટે બચાવીને ન રાખી, આ ઉપરાંત અહેવાલમાં જણાવાયું છે કે, તે અને તેના પતિએ પહેલાથી જ લોટરીમાં જીતેલી લગભગ અડધી રકમ વિવિધ સખાવતી કાર્યોમાં દાન કરી દીધી છે. ભારતીય નાણાંની દ્રષ્ટિએ આ રકમ સેંકડો કરોડ રૂપિયા જેટલી થાય છે. તેણે જરૂરિયાતમંદોને મદદ કરવા અને સ્થાનિક સમુદાયો માટે કામ કરવાને પ્રાથમિકતા આપી. આ હેતુ માટે, ફ્રાન્સિસે એક ચેરિટેબલ ટ્રસ્ટ પણ બનાવ્યું, જે વિવિધ સામાજિક કાર્યોને ટેકો આપે છે.
ફ્રાન્સિસ પાસે આટલા બધા પૈસા પોતાની પાસે રાખવાનું કોઈ ચોક્કસ કારણ નહોતું. તે માને છે કે માનવ જરૂરિયાતોની પણ એક મર્યાદા હોય છે. એકવાર તેના બાળકોનું ભવિષ્ય સુરક્ષિત થઈ ગયું અને તેમની પાસે આરામથી જીવવા માટે પૂરતા પૈસા હતા, તો તેને બાકીના પૈસાનો સંગ્રહ કરવાનો કોઈ અર્થ નહોતો. તેણે જણાવ્યું કે 'જરૂર પૂરતા' પૈસાની વ્યાખ્યા વ્યક્તિએ વ્યક્તિએ અલગ અલગ હોઈ શકે છે. કેટલાક માટે, કરોડો રૂપિયા પણ ઓછા પડતા હોય શકે છે, જ્યારે અન્ય લોકો માટે, થોડી રકમ પણ આરામથી જીવવા માટે પૂરતી હોઈ શકે છે.
આ બાબતે ફ્રાન્સિસનો દ્રષ્ટિકોણ તદ્દન અલગ છે. મીડિયા સૂત્રોના જણાવ્યા અનુસાર, ફ્રાન્સિસ કહે છે કે, જો કોઈ વ્યક્તિની મહત્વાકાંક્ષા વિશ્વના સૌથી ધનિક વ્યક્તિ બનવાની અથવા અગ્રણી વ્યક્તિઓ અને નેતાઓને પ્રભાવિત કરવાની હોય, તો તેણે પોતાના પૈસા પોતાની પાસે રાખવા જોઈએ. પરંતુ તે તેના જીવનનો હેતુ નહોતો. તેના માટે, સંપત્તિનો અર્થ ફક્ત તેના બેંક બેલેન્સમાં વધારો કરવાનો નહોતો, પરંતુ તેનો ઉપયોગ બીજાઓના જીવનને સુધારવા માટે પણ કરવાનો હતો. આ વિચારથી તેણે તેની સંપત્તિનો ઘણો મોટો ભાગ સમાજ સેવામાં સમર્પિત કરવાનું નક્કી કર્યું.
ફ્રાન્સિસ અમેરિકન ગાયિકા અને અભિનેત્રી ડોલી પાર્ટનથી પણ તેના સામાજિક કાર્ય માટે પ્રેરિત છે. ડોલી પાર્ટન લાંબા સમયથી બાળકોના શિક્ષણ અને અન્ય સામાજિક કાર્યોમાં ખુબ મોટું યોગદાન આપી રહી છે. ફ્રાન્સિસ માટે પણ, પૈસા કમાવવા કરતાં બીજાના ફાયદા માટે પોતાની સંપત્તિનો ઉપયોગ કરવાનું વધુ મહત્વનું બની ગયું. આ જ કારણ છે કે લોટરી જીત્યા પછી, તેઓ તેમના જીવનનો મહત્વપૂર્ણ સમય દાન કરવા અને લોકોને મદદ કરવા માટે પસાર કરી રહ્યા છે.
આટલી મોટી રકમ મેળવ્યા છતાં, ફ્રાન્સિસ અને તેના પતિએ તેમના રોજિંદા જીવનમાં કોઈ મોટો ફેરફાર કર્યો નથી. તેઓ ઉત્તરપૂર્વ ઇંગ્લેન્ડમાં પ્રમાણમાં સરળ અને સાદગીપૂર્ણ જીવન જીવે છે. તેમની પાસે હવે આરામદાયક ઘર છે અને વેકેશન પર ખર્ચ કરવાની વધુ છૂટ છે, પરંતુ તેઓ દરેક વસ્તુ પર વિચાર્યા વગર ખર્ચ કરવાનું પસંદ કરતા નથી. અહેવાલ મુજબ, તેઓ ક્યારેક સેકન્ડ હેન્ડ લક્ઝરી વસ્તુઓ ખરીદવાનું પણ પસંદ કરે છે. મોંઘી ઘડિયાળો અને વપરાયેલી કાર ખરીદવી પણ તેમના માટે સરળ છે.
ફ્રાંસિસના મતે, લોટરી જીત્યા પછી તેમની મૂળભૂત જીવનશૈલીમાં બહુ ફેરફાર થયો નથી. ફરક માત્ર એટલો છે કે તે હવે તેને ગમતી વસ્તુઓ વધુ આરામથી કરી શકે છે. તે કહે છે કે જો તે નાની હોત, તો તેણે વધુ પૈસા રાખવાનું વિચાર્યું હોત. પરંતુ જ્યારે તેણે લોટરી જીતી ત્યારે તે 50 વર્ષથી વધુ ઉંમરની હતી. તેને એમ પણ લાગ્યું કે તેના બાળકોની જરૂરિયાતો પૂરી થાય છે, તેથી પૈસાનો ઉપયોગ ફક્ત સંગ્રહ કરવા કરતાં યોગ્ય રીતે કરવો વધુ સારું છે.
ફ્રાન્સિસની સમાજસેવા હજુ અટકી નથી. તેના 60મા જન્મદિવસે, 7 રમતવીરો વિવિધ પડકારોનો સામનો કરીને ભંડોળ એકત્ર કરવા જઈ રહ્યા છે. આ ઝુંબેશમાંથી મળેલી રકમનો ઉપયોગ તેના PFC ટ્રસ્ટ દ્વારા સારા કાર્યો માટે કરવામાં આવશે. આનો અર્થ એ થયો કે જે મહિલાનું જીવન લોટરી ટિકિટ દ્વારા બદલાઈ ગયું હતું તે હવે તે જ સંપત્તિનો ઉપયોગ બીજાના જીવનમાં પરિવર્તન લાવવા માટે કરી રહી છે.
ફ્રાન્સિસ મૂળ ઉત્તરી આયર્લેન્ડમાં ઉછરી હતી. નાનપણથી જ, તેને અન્ય લોકોને મદદ કરવાનો શોખ હતો. પાછળથી, 1990માં, તે કામ માટે હાર્ટલપૂલ ગઈ. તે સમયે, તેનો ઇરાદો ફક્ત એક કે બે વર્ષ માટે ત્યાં રહેવાનો હતો. પરંતુ જીવનમાં એવો વળાંક આવ્યો કે તે 25 વર્ષથી વધુ સમય ત્યાં રહી અને તેને પોતાનું ઘર બનાવી લીધું. હવે, તે તેના દત્તક લીધેલા શહેર અને આસપાસના સમુદાય માટે ખુબ મોટા પ્રમાણમાં સમાજ સેવા કરવાને પોતાનું સૌભાગ્ય માને છે.
ફ્રાન્સિસ કોનોલીની વાર્તા એટલા માટે ખાસ નથી, કારણ કે તેણે રૂ. 1,470 કરોડની લોટરી જીતી હતી. મુદ્દો એ છે કે આટલી મોટી રકમ મેળવ્યા પછી પણ, તેણે સ્વીકાર્યું નહીં કે બધી સંપત્તિ તેની છે. તેના પરિવારની જરૂરિયાતો પૂરી કર્યા પછી, તેણે બાકીના પૈસા સામાજિક કાર્ય માટે વાપરવાનું પસંદ કર્યું. કદાચ આ જ કારણ છે કે તેની વાર્તા ફક્ત લોટરી જીતવા કરતાં વધુ છે, આ તેમની વિચારસરણીની વાર્તા બની ગઈ છે, જેમાં પૈસાનું અસલી મૂલ્ય એ રીતે નક્કી થાય છે કે, તેણે જીતેલી આ સંપત્તિ કેટલા લોકોને મદદ કરવાના કામમાં આવી.
5.jpg)
