1.2 અરબ ડૉલર (આશરે 10,000 કરોડ રૂપિયા)ની વેલ્યુવાળી ફિનટેક કંપનીના સ્થાપક દ્વારા કરવામાં આવેલી હોમ લોન અરજીને બેંક દ્વારા નકારી કાઢવામાં આવી હતી. ભારતીય સ્થાપકે જણાવ્યું હતું કે, તેમની હોમ લોન એટલા માટે નકારી કાઢવામાં આવી હતી કે, બેંક કંપનીના સ્થાપકોને 'હાઈ રિસ્ક'ની શ્રેણીમાં મૂકે છે.
રેઝ ફાઇનાન્શિયલ સર્વિસીસના સ્થાપક અને CEO પ્રવીણ જાધવે સોશિયલ મીડિયા પર પોતાની આ મુસીબત પર વ્યંગ કર્યો હતો. તેમણે લખ્યું કે, જે બેંકે તેમની લોન નકારી કાઢી હતી તેણે તાજેતરમાં જ તેમને ટોચના ફિનટેક ઇનોવેટર તરીકે સન્માનિત કર્યા હતા.
જાધવે તેમની X (અગાઉ ટ્વિટર) પોસ્ટમાં લખ્યું, 'એક કંપની સ્થાપકનું જીવન મુશ્કેલ છે! મારી હોમ લોન અરજી એક મોટી ખાનગી બેંક દ્વારા નકારી કાઢવામાં આવી હતી. કારણ એટલું જ હતું કે હું એક કંપનીનો સ્થાપક છું.'
ઓક્ટોબર 2025માં, સ્ટોક ટ્રેડિંગ પ્લેટફોર્મ વેલ્થની પેરેન્ટ કંપની રેઝે હોર્નબિલ કેપિટલની આગેવાની હેઠળ સિરીઝ B ફંડિંગ રાઉન્ડમાં 120 મિલિયન ડૉલર (આશરે 1000 કરોડ રૂપિયા) એકત્ર કર્યા. આ ભંડોળથી મુંબઈ સ્થિત ફિનટેક કંપનીનું મૂલ્યાંકન 1.2 અરબ ડૉલર થઇ ગયું, જેનાથી તે યુનિકોર્ન ક્લબમાં જોડાઈ ગઈ.
Rayzના 3 સહ-સ્થાપકોમાંના એક તરીકે, જાધવ પાસે અસંખ્ય ઉદ્યોગસાહસિક સિદ્ધિઓ છે, છતાં બેંક તેમને 'ઉચ્ચ જોખમ' લેનારા માને છે. તેમની વિશ્વસનીયતા સાબિત કરવા માટે, Rayz ફાઇનાન્શિયલ સર્વિસીસના સ્થાપકે X પર તેમની લાયકાતોની યાદી બતાવવાનું શરૂ કર્યું.
તેમણે જણાવ્યું હતું કે તેઓ 25 વર્ષથી વધુ લાંબા સમયથી બેંકના ગ્રાહક છે. સંપત્તિની દ્રષ્ટિએ, જાધવે કહ્યું કે તેઓ કદાચ બેંકના ટોચના 0.1 ટકા ગ્રાહકોમાં આવે છે. તેમણે ઉમેર્યું, 'આ બેંક સાથેનો સંબંધ (થાપણો/રોકાણ) લોનની રકમના 5-6 ગણો છે.' અને તેમનો CIBIL સ્કોર 800થી વધુ છે, જે ખૂબ સારો માનવામાં આવે છે. આ બધા છતાં, એક મોટી ખાનગી બેંકે તેમની હોમ લોન અરજી ફગાવી દીધી.
મુંબઈ સ્થિત સ્થાપકે મજાકથી લખ્યું, 'અને વિડંબના એ છે કે આ જ બેંકે મને ટોચના ફિનટેક ઇનોવેટર અથવા તેના જેવું કંઈક કહીને સન્માનિત કર્યો હતો...' તેમણે પોતાની પોસ્ટનો અંત એક દુઃખદ મજાક સાથે કર્યો, જેમાં તેમણે કહ્યું કે, તેમના કર્મચારીઓની હોમ લોન અરજીઓ મંજૂર થઈ શકે છે, પરંતુ તેમને આખી જિંદગી ઓફિસમાં જ રહેવું પડશે.
જાધવે કટાક્ષ કર્યો, 'તેઓ અમારી કંપનીના કર્મચારીઓને લોન આપી શકે છે, પરંતુ મને નહીં, કારણ કે એક સ્થાપક તરીકે, હું 'ઉચ્ચ જોખમ' શ્રેણીમાં છું. એવું લાગે છે કે મારે આખી જિંદગી ઓફિસમાં જ રહેવું પડશે...' જોકે, જાધવે પોતાની પોસ્ટમાં બેંકનું નામ જણાવ્યું ન હતું.
3.jpg)
