સરકારે 22 સપ્ટેમ્બરથી આરોગ્ય વીમા પ્રીમિયમ પર 18 ટકા GST નાબૂદ કર્યો, પરંતુ ગ્રાહકોને કોઈ લાભ મળી રહ્યો નથી. મોટાભાગની વીમા કંપનીઓએ તેમના પ્રીમિયમમાં નોંધપાત્ર વધારો કર્યો છે. આ વધારો 10 ટકાથી લગભગ 37 ટકા સુધીનો છે. વાહન અને આરોગ્ય વીમા પોલિસીમાં સૌથી વધુ વધારો જોવા મળી રહ્યો છે.
ટાટા AIG જનરલ ઇન્શ્યોરન્સ કંપનીએ ગયા વર્ષની સરખામણીમાં તેના આરોગ્ય વીમા પ્રિમિયમમાં લગભગ 37 ટકાનો વધારો કર્યો છે. મીડિયા સૂત્રો પાસેથી પ્રાપ્ત થતી માહિતી અનુસાર, કંપની સાથેની તપાસમાં જાણવા મળ્યું છે કે, ગયા વર્ષે પોલિસી માટે પ્રીમિયમ 30,107 રૂપિયા હતું, જેમાં 18 ટકા GST (4,592 રૂપિયા)નો સમાવેશ થતો હતો. GST દૂર કર્યા પછી, આ રકમ 25,515 રૂપિયા હોવી જોઈતી હતી, પરંતુ કંપની હવે 34,899 રૂપિયાની માંગ કરી રહી છે.
આ અંગે પૂછપરછ કરવામાં આવતા, કંપનીએ આ વધારા માટે તબીબી ફુગાવો, બજારના વલણો અને દાવાઓના ખર્ચમાં વધારો જવાબદાર ગણાવ્યો. કંપનીએ જણાવ્યું હતું કે, આ સુધારો IREDAની માર્ગદર્શિકા અનુસાર કરવામાં આવ્યો હતો. જોકે, જ્યારે પૂછવામાં આવ્યું કે શું 37 ટકા વધારા માટે IREDA પાસેથી પરવાનગી લેવામાં આવી હતી, ત્યારે કંપનીના પ્રતિનિધિ અંકિત યાદવે સ્પષ્ટ જવાબ આપ્યો ન હતો. તેમણે ફક્ત એટલું જ કહ્યું કે 'મોંઘવારી સુરક્ષા' હેઠળ રૂ. 416, 'રિસ્ટોર ઇન્ફિનિટી પ્લસ' હેઠળ રૂ. 1,166 અને 'વાર્ષિક પ્રીમિયમ એડજસ્ટમેન્ટ' હેઠળ રૂ. 3,210 ઉમેરવામાં આવ્યા છે.
ઘણી અન્ય કંપનીઓ પણ આ જ રીતે પ્રીમિયમ વધારી રહી છે. ગયા વર્ષે, નિવા બુપા હેલ્થ ઇન્સ્યોરન્સે રૂ. 7.5 લાખના કવરેજવાળી પોલિસી રૂ. 16,731માં ઓફર કરી હતી, જેમાં રૂ. 2,552 GSTનો સમાવેશ થાય છે. આ વખતે, GST દૂર થયા પછી, પ્રીમિયમ રૂ. 14,178 હોવું જોઈએ, પરંતુ કંપનીએ રૂ. 17,155નું નવું પ્રીમિયમ બતાવ્યું છે.
વીમા નિષ્ણાતો કહે છે કે, મોટાભાગની કંપનીઓ પોલિસીમાં નવા રાઇડર્સ (સુવિધાઓ અને કવરેજ) ઉમેરીને પ્રીમિયમ વધારી રહી છે, અને આ ફેરફારો પોલિસીધારકની સંમતિ વિના કરવામાં આવી રહ્યા છે. કેટલાક કિસ્સાઓમાં, હાલના કવરેજને 'નવી સુવિધા'નું લેબલ લગાવીને તેના અલગ અલગ પ્રીમિયમ વસૂલવામાં આવી રહ્યું છે. આમ, GST દૂર કરવા છતાં, ગ્રાહકોના વીમા પ્રીમિયમ પરનો બોજ વધારે વધી ગયો છે.
10.jpg)
15.jpg)
