મધ્ય પૂર્વમાં ચાલી રહેલા તણાવ વચ્ચે, સરકારે ભારતની ઉર્જા સુરક્ષામાં વિશ્વાસ વ્યક્ત કર્યો છે. સરકારી સૂત્રોના જણાવ્યા અનુસાર, ભારત પાસે હાલમાં 25 દિવસનો કાચા તેલનો ભંડાર છે. આ ઉપરાંત, 25 દિવસનો પેટ્રોલ અને ડીઝલનો સ્ટોક પણ ઉપલબ્ધ છે. એકંદરે, દેશમાં લગભગ 8 અઠવાડિયાનો કાચા તેલ અને પેટ્રોલિયમ ઉત્પાદનનો ભંડાર હાજર છે.
સૂત્રોએ જણાવ્યું હતું કે, ભારતના કાચા તેલનો માત્ર 40 ટકા હિસ્સો જ હોર્મુઝ સ્ટ્રેટ દ્વારા આવે છે. બાકીના 60 ટકા અન્ય સ્ત્રોતોમાંથી આયાત કરવામાં આવે છે. જેના કારણે પુરવઠા પર કોઈ એક માર્ગ બંધ થઇ જતા કોઈ અસર પડતી નથી. ભારત તેના અગાઉના કરારો મુજબ રશિયા પાસેથી કાચા તેલની આયાત કરવાનું ચાલુ રાખ્યું છે. સરકાર જણાવે છે કે, દેશ LPG અને LNGના સંદર્ભમાં પણ આરામદાયક સ્થિતિમાં છે. સરકાર મધ્ય પૂર્વમાં બદલાતી જતી પરિસ્થિતિ પર નજીકથી નજર રાખી રહી છે અને જરૂર પડ્યે જરૂરી પગલાં લેશે.
આ દરમિયાન, PM નરેન્દ્ર મોદીએ મંગળવારે ઓમાનના સુલતાન હૈથમ બિન તારિક અને કુવૈતના ક્રાઉન પ્રિન્સ શેખ સબાહ અલ-ખાલિદ અલ-હમદ અલ-મુબારક અલ-સબાહ સાથે વાત કરી અને પશ્ચિમ એશિયામાં ચાલી રહેલા સંઘર્ષ વચ્ચે તેમના દેશો પર થયેલા હુમલાઓ અંગે ચિંતા વ્યક્ત કરી, અધિકારીઓએ આ જાણકારી આપી હતી. ટેલિફોન વાતચીત દરમિયાન, PM નરેન્દ્ર મોદીએ ત્યાં રહેતા ભારતીય સમુદાયના કલ્યાણ અને સલામતી અંગે પણ ચર્ચા કરી.
એક અધિકારીએ જણાવ્યું કે, 'PM નરેન્દ્ર મોદીએ મંગળવારે બપોરે ગલ્ફ ક્ષેત્રના બે મહત્વપૂર્ણ નેતાઓ સાથે વાત કરી. તેમણે ઓમાનના સુલતાન હૈથમ બિન તારિક અને કુવૈતના ક્રાઉન પ્રિન્સ શેખ સબાહ અલ-ખાલિદ અલ-હમદ અલ-મુબારક અલ-સબાહ સાથે ફોન પર વાત કરી.' બંને નેતાઓ સાથેની વાતચીત દરમિયાન, PM નરેન્દ્ર મોદીએ તેમના દેશોમાં થયેલા હુમલાઓ અંગે ચિંતા વ્યક્ત કરી અને ત્યાં રહેતા ભારતીય સમુદાયના કલ્યાણ અને સલામતી અંગે ચર્ચા કરી. આ ફોન વાતચીત અમેરિકા અને ઇઝરાયલ દ્વારા ઇરાન સામે શરૂ કરાયેલા સંયુક્ત હુમલાઓ પછી થઈ હતી.
ઈરાન-ઇઝરાયલ તણાવને કારણે મંગળવારે સતત ત્રીજા દિવસે તેલના ભાવમાં વધારો થયો. તણાવને કારણે હોર્મુઝ સ્ટ્રેટ બંધ થઈ ગયું છે, જેના કારણે મધ્ય પૂર્વના મુખ્ય ઉત્પાદન ક્ષેત્રમાંથી પુરવઠામાં વિક્ષેપ પડવાની આશંકા વધી ગઈ છે. ઈરાની બ્રિગેડિયર જનરલ ઇબ્રાહિમ જબારીએ સરકારી ટેલિવિઝન પર જણાવ્યું હતું કે, 'તેલની કિંમત 81 ડૉલર પ્રતિ બેરલ પર પહોંચી ગઈ છે, અને વિશ્વ ચોક્કસપણે તેના ઓછામાં ઓછા 200 ડૉલર સુધી પહોંચવાની રાહ જોઈ રહ્યું છે.'
10.jpg)
