'હું 19 વર્ષની અને મારો પતિ 40 વર્ષનો...' દલીલ સાંભળતા હાઈકોર્ટે મહિલાને પ્રેમી સાથે જવા દીધી

‘હું પુખ્ત છું. હું કોઈ ગેરકાયદેસર કેદમાં નથી. હું મારી ઇચ્છાથી અહીં રહું છું. હું પતિ અને મારા માતા-પિતા સાથે પણ રહેવા માંગતી નથી. હું 19 વર્ષની છું, જ્યારે મારો પતિ 40 વર્ષનો છે. આ 21 વર્ષના આ અંતરને કારણે, અમે અમારા વૈવાહિક જીવનમાં સુમેળ સ્થાપિત કરી શક્યા નથી. મારી સાથે દુર્વ્યવહાર પણ થયો.’ મધ્યપ્રદેશ હાઈકોર્ટ (ગ્વાલિયર બેન્ચ)ની બે જજોની બેન્ચ સમક્ષ જ્યારે એક મહિલાએ આ નિવેદન આપ્યું, ત્યારે કોર્ટે તેને તેના પ્રેમી સાથે જવાની પરવાનગી આપી દીધી.

મધ્ય પ્રદેશ હાઈકોર્ટની ગ્વાલિયર બેન્ચમાં સુનાવણી દરમિયાન મહિલાના પતિ, માતા-પિતા અને પ્રેમી હાજર હતા. મહિલા પોતાના વલણ પર અડગ રહી અને કોર્ટને સ્પષ્ટપણે જણાવ્યું કે તે તેના પ્રેમી સાથે જ જવા માંગે છે. ઈન્ડિયા ટૂડેનાના અહેવાલ મુજબ, ન્યાયાધીશ આનંદ પાઠક અને ન્યાયાધીશ પુષ્પેન્દ્ર યાદવની ડિવિઝન બેન્ચે મહિલાની ઇચ્છાને સૌથી ઉપર રાખીને તેને તેના પ્રેમી સાથે જવાની પરવાનગી આપી.

હાઈકોર્ટના આ આદેશથી ફરી એકવાર સાબિત થયું કે એક પુખ્ત વ્યક્તિને તે નક્કી કરવાનો અધિકાર છે કે તેણે ક્યાં અને કોની સાથે રહેવાનું છે. પતિ, અવધેશે મધ્ય પ્રદેશ હાઈકોર્ટની ગ્વાલિયર બેન્ચમાં હેબિયસ કોર્પસ અરજી દાખલ કરી હતી. પોતાની અરજીમાં તેણે આરોપ લગાવ્યો હતો કે તેની પત્નીને અનુજ કુમાર નામના યુવક દ્વારા ગેરકાયદેસર રીતે પોતાની પાસે રાખી છે.

પોલીસે મહિલાને શોધી કાઢીને સલામતી માટે તેને 'વન સ્ટોપ સેન્ટર'માં રાખી, અને ત્યારબાદ તેને કોર્ટ સમક્ષ રજૂ કરી. સુનાવણી દરમિયાન, જ્યારે કોર્ટે તેની ઇચ્છાઓ પૂછી, ત્યારે તેણે સ્પષ્ટપણે કહ્યું કે તે પુખ્ત છે અને પોતાની ઇચ્છાથી તેના પ્રેમી સાથે રહેવા માંગે છે. તેણે એમ પણ કહ્યું કે તેના અને તેના પતિ વચ્ચે 21 વર્ષનો વય તફાવત છે, જેને કારણે લગ્ન જીવનમાં સુમેળ સાધી શકાયું નથી.

કોર્ટના નિર્દેશ પર સરકારી વકીલ અંજલી જ્ઞાનાનીએ મહિલાની કાઉન્સેલિંગ કરી હતી. ત્યારબાદ પણ તેણે તેના પ્રેમી સાથે રહેવાની પોતાની ઇચ્છાનો પુનરોચ્ચાર કર્યો. પ્રેમી અનુજે પણ કોર્ટને ખાતરી આપી કે તે મહિલાની સંપૂર્ણ કાળજી લેશે અને તેની સાથે કોઈપણ પ્રકારનું ઉત્પીડન નહીં કરે. આ પરિસ્થિતિઓને ધ્યાનમાં રાખીને કોર્ટે કહ્યું કે અરજીનો હેતુ જ સમાપ્ત થઈ ચૂક્યો છે.