નિતેશ તિવારી દ્વારા દિગ્દર્શિત આગામી ફિલ્મ ‘રામાયણ’માંથી ભગવાન રામનો લુક હનુમાન જયંતિ પર સામે આવ્યો હતો. ટીઝરમાં યુદ્ધના સીન અને શાનદાર VFX પણ જોવા મળ્યું, જેની ઘણા લોકોએ પ્રશંસા કરી હતી. જો કે, સોશિયલ મીડિયા પર કેટલાક યુઝર્સે આરોપ લગાવ્યો કે ફિલ્મના સીન્સને હોલિવુડ ફિલ્મોની નકલ છે.
ટીઝરમાં બતાવવામાં આવેલા યુદ્ધના સીન (લંકામાં) કેટલાક યુઝર્સને હોલિવુડ ફિલ્મો જેવા લાગ્યા. કેટલાક લોકોએ તેને ‘ગેમ ઓફ થ્રોન્સ’ અથવા અન્ય હોલિવુડ ફિલ્મોમાંથી પ્રેરિત ગણાવ્યા. રાક્ષસોની ડિઝાઇન અને કેટલાક શોટ્સને ‘લોર્ડ ઓફ ધ રિંગ્સ’ જેવી હોલિવુડ ફિલ્મોની કોપી ગણાવ્યા.
સોશિયલ મીડિયા પ્લેટફોર્મ X પર એક યુઝરે લખ્યું કે, ‘રામાયણ’ ફિલ્મનું ટીઝર ગઈકાલે રીલિઝ કરવામાં આવ્યું હતું. બજેટ 4,000 કરોડ રૂપિયા છે, જ્યારે આ નાના ટીઝરમાં ઘણા શોટ્સ એવા છે જે હોલિવુડની ફિલ્મોમાંથી નકલ કરવામાં આવ્યા હોય તેવું લાગે છે. પ્રશ્ન એ છે કે શું આટલી મોંઘી ફિલ્મમાં કોપી કરેલા શોટ્સથી દર્શકોને મુર્ખ બનાવવામાં આવી રહ્યા છે?
જ્યારે અન્ય એક યુઝરે લખ્યું કે, ‘રામાયણ’માં સીન ‘ગેમ ઓફ થ્રોન્સ’, ‘ધ ડાર્ક નાઈટ એન્ડ ડ્યૂન: પાર્ટ ટૂ’ જેવી ફિલ્મો સાથે મળતા આવે છે, ત્યારે બીજા યુઝરે તેનો વિરોધ કર્યો અને કહ્યું કે, ‘બાહુબલી’માં પણ ઘણા સીન એવા છે જે વિવિધ હોલિવુડ ફિલ્મો સાથે સામ્યતા ધરાવે છે.
'રામાયણ: પાર્ટ-1'ની સ્ટાર કાસ્ટ ખૂબ જ જોરદાર છે, જેમાં રણબીર કપૂર સાથે સાંઈ પલ્લવી માતા સીતાના રૂપમાં, યશ રાવણની ભૂમિકામાં, સની દેઓલ હનુમાન અને રવિ દુબે લક્ષ્મણના રૂપમાં જોવા મળશે. આ ફિલ્મની સૌથી ખાસ વાત એ છે કે ભારતીય કહાનીઓને વૈશ્વિક મંચ પર લઈ જવા માટે વિશ્વભરના નિષ્ણાતોને એકસાથે લાવવામાં આવ્યા છે. ફિલ્મનું સંગીત સુપ્રસિદ્ધ હંસ ઝિમર અને એ.આર. રહેમાને મળીને તૈયાર કરી રહ્યા છે.
