મધ્ય પ્રદેશના અલીરાજપુરથી ચોંકાવનારી ખબર સામે આવી છે. જ્યાંના સોંડવા પોલીસ સ્ટેશનના ઈન્ચાર્જ અને તેમના અન્ય સાથી પોલીસકર્મીઓ પર 240 સોનાના સિક્કા ચોરી કરવાનો આરોપ લાગ્યો છે. આ દરેક સિક્કાનું વજન લગભગ 7.89 ગ્રામ છે. આ દરેક સિક્કાની ભારતમાં કિંમત લગભગ 44 હજાર રૂપિયા છે. જ્યારે આંતરરાષ્ટ્રીય બજારમાં આ એક સિક્કાની કિંમત 3 લાખ રૂપિયા છે. એટલે કે TI અને તેમના સાથી પોલીસકર્મીઓ પર જે સિક્કાઓ ચોરી કરવાનો આરોપ છે, તેની કિંમત 7 કરોડ રૂપિયાથી વધારે છે. આ વાત સામે આવ્યા પછી આરોપીઓની મુશ્કેલીઓ વધી ગઇ છે.
ઉલ્લેખનીય છે કે, આ ભાંડો ત્યારે ફૂટ્યો જ્યારે બેજડા ગામની એક મહિલાએ 23 જુલાઈના રોજ આવો જ એક સિક્કો પોલીસને સોંપ્યો. પોલીસ આ સિક્કા વિશે જાણવા એક જ્વેલર પાસે પહોંચી ગઈ. જ્વેલરે તપાસ પછી પોલીસને જણાવ્યું કે આ સોનાનો સિક્કો છે. આ સિક્કા પર જૉર્જ-5 લખ્યું છે. વિશેષજ્ઞોએ જણાવ્યું કે આ ભારતની આઝાદી પહેલાના સિક્કા છે. જેને 1922 માં બ્રિટિશોએ બહાર પાડ્યા હતા.
આ સોનાના સિક્કા બેજડા ગામની એક મહિલા મજૂરને મળી આવ્યા હતા. તેણે જણાવ્યું કે આ સિક્કા ગુજરાતના નવસારી જિલ્લામાંથી મળી આવ્યા. નવસારીના બીલિમોરામાં તે મજૂરી કરવા ગઈ હતી. આ સિક્કા મળ્યા પછી તે ગામ પાછી આવી ગઈ. તેણે જણાવ્યું કે બિલીમોરામાં શબ્બીર બલિયાવાલાનું ઘર જર્જરિત થયું હતું. તે ઘરને તોડી પાડવાનું હતું. તેનો કોન્ટ્રાક્ટ વલસાડના સરફરાઝે લીધો હતો. સરફરાઝ આ મકાનને તોડવા માટે અલીરાઝપુરથી મજૂરો લઈ ગયો હતો. જ્યારે આ ઘરને તોડી રહ્યા હતા તો ત્યારે આ સિક્કા મહિલાના હાથે આવ્યા. તેણે આ વિશે કોઈને કશું જણાવ્યું નહીં.
રમકુબાઈ નામની મહિલા મજૂરને આ સિક્કા મળી આવ્યા હતા. મહિલાએ જણાવ્યું કે તેને મકાનમાં કામ કરતા સમયે આ સિક્કા મળી આવ્યા હતા અને ચૂપચાપ તે સિક્કા ગામ લઈને આવી ગઈ. પણ ગામમાં આ ખબર ફેલાઈ ગઇ કે મેં સિક્કા ઘરમાં દાટી દીધા છે.
ખબર ફેલાતા 4 પોલીસકર્મી મહિલાના ઘરે પહોંચ્યા અને તેને ધમકાવી અને સિક્કા શોધીને સાથે લઈ ગયા. મહિલાએ ત્યાર પછી આ ઘટના અંગેની ફરિયાદ પોલીસમાં કરી. ગ્રામીણોને આ વાત વિશે જાણ થઇ તો તેમણે પોલીસ સ્ટેશન ઘેરી લીધું અને પ્રદર્શન કર્યું. તપાસ પછી આ ચારેય પોલીસ કર્મીઓને સસ્પેન્ડ કરી દેવામાં આવ્યા છે.
15.jpg)
