મહીસાગર જિલ્લાના ખાનપુર તાલુકામાં એક ચોંકાવનારો કિસ્સો પ્રકાશમાં આવ્યો છે, જેમાં એક મહિલાએ લગ્નના બહાને એક પરિવાર સાથે ₹11.30 લાખની છેતરપિંડી આચરી છે. આ ઘટનાએ પંથકમાં ભારે ચર્ચા જગાવી છે.
ખાનપુરના યુવક માટે લગ્નની શોધ ચાલી રહી હતી ત્યારે વચેટિયાઓ દ્વારા એક યુવતીનો સંપર્ક કરાવવામાં આવ્યો હતો. વિધિવત રીતે લગ્ન પણ સંપન્ન થયા હતા. લગ્ન નક્કી થયા બાદ અને લગ્ન દરમિયાન જુદા જુદા બહાને કટકે કટકે કુલ ₹11.30 લાખ પડાવવામાં આવ્યા હતા.
ભાંડો ક્યારે ફૂટ્યો?
લગ્નના થોડા જ દિવસોમાં નવી પરણેલી દુલ્હન રહસ્યમય રીતે ગાયબ થઈ ગઈ હતી. જ્યારે પરિવારજનોએ તપાસ કરી અને વચેટિયાઓનો સંપર્ક સાધવાની કોશિશ કરી, ત્યારે તેમને સમજાયું કે તેઓ છેતરપિંડીનો ભોગ બન્યા છે. ભોગ બનનાર પરિવારે આ અંગે પોલીસ ફરિયાદ નોંધાવી છે. પોલીસ તપાસમાં સામે આવ્યું છે કે આ એક આખું સંગઠિત નેટવર્ક હોઈ શકે છે, જે ભોળા યુવકોને લગ્નની લાલચ આપી નાણાં પડાવવાનું કામ કરે છે.
આ કિસ્સો તે લોકો માટે લાલબત્તી સમાન છે જેઓ અજાણ્યા વચેટિયાઓ દ્વારા લગ્ન નક્કી કરતા હોય છે. લગ્ન જેવી સામાજિક બાબતોમાં યોગ્ય તપાસ કરવી અત્યંત જરૂરી છે.
6.jpg)
