ગુજરાતમાં 17 જિલ્લામાં ભારે પવન સાથે માવઠાની આગાહી, હવામાન વિભાગનું ‘યલો એલર્ટ’

ફેબ્રુઆરી મહિનામાં રાજ્યના વાતાવરણમાં આવેલા અચાનક પલટાએ ખેડૂતો અને સામાન્ય જનતાની ચિંતામાં વધારો કર્યો છે. 20 ફેબ્રુઆરીના કમોસમી વરસાદ બાદ, આજે (23 ફેબ્રુઆરી) વહેલી સવારથી જ રાજ્યના અનેક ભાગોમાં મેઘરાજાએ એન્ટ્રી કરી છે. હવામાન વિભાગે આગામી કલાકો માટે રાજ્યના 17 જિલ્લાઓમાં ભારે પવન સાથે વરસાદની આશંકા વ્યક્ત કરી ‘યલો એલર્ટ’ જારી કર્યું છે.

વહેલી સવારથી અનેક વિસ્તારોમાં વરસાદી માહોલ

આજે વહેલી સવારે ભરૂચ જિલ્લાના અંકલેશ્વર અને જંબુસરમાં વરસાદી ઝાપટાં પડ્યા હતા. ત્યારબાદ રાજધાની ગાંધીનગર અને અમદાવાદમાં પણ વાતાવરણ પલટાયું હતું. અમદાવાદના એસ.જી. હાઈવે, સિંધુ ભવન રોડ, ગોતા અને ચાંદલોડિયા જેવા વિસ્તારોમાં ઠંડા પવન સાથે કમોસમી વરસાદ નોંધાયો છે, જેના કારણે વાતાવરણમાં ગુલાબી ઠંડી પ્રસરી ગઈ છે.

કયા જિલ્લાઓ માટે એલર્ટ?

હવામાન વિભાગે આગામી સમય માટે નીચે મુજબના વિસ્તારોમાં વરસાદની આગાહી કરી છે:

• મધ્ય અને ઉત્તર ગુજરાત: અમદાવાદ, ગાંધીનગર, ખેડા, સાબરકાંઠા, મહેસાણા, પાટણ, અરવલ્લી, મહીસાગર.
• દક્ષિણ ગુજરાત: ભરૂચ, સુરત, તાપી, નર્મદા, વલસાડ, ડાંગ, દમણ અને દાદરા નગર-હવેલી.
• સૌરાષ્ટ્ર-કચ્છ: જૂનાગઢ, અમરેલી, ગીર સોમનાથ અને ભાવનગરમાં પણ ઝાપટાંની પૂરેપૂરી શક્યતા છે.

ખેડૂતોમાં ફાળ: ઊભા પાકને નુકસાનની ભીતિ

કમોસમી વરસાદ અને પવનને કારણે ખેતીના પાક પર જોખમ તોળાઈ રહ્યું છે. ખાસ કરીને કાપણી માટે તૈયાર થયેલા ઘઉં, કપાસ, તુવેર અને શાકભાજીના પાકને મોટાપાયે નુકસાન થવાની ભીતિ ખેડૂતો વ્યક્ત કરી રહ્યા છે. માવઠાને કારણે ખેડૂતોની આખા વર્ષની મહેનત પર પાણી ફરી વળે તેવી સ્થિતિ સર્જાઈ છે.

બેવડી ઋતુ અને તાપમાનનો મિજાજ

હવામાન વિભાગના જણાવ્યા અનુસાર, 24 ફેબ્રુઆરીથી વાતાવરણ શુષ્ક બનશે. જોકે, આગામી દિવસોમાં લઘુતમ તાપમાનમાં 2-3 ડિગ્રીનો ઘટાડો થતા ઠંડીનું જોર ફરી વધી શકે છે. હાલમાં:

• અમદાવાદમાં મહત્તમ તાપમાન: 34.3 ડિગ્રી સેલ્સિયસ
• ગાંધીનગરમાં મહત્તમ તાપમાન: 33.5 ડિગ્રી સેલ્સિયસ બપોરે ગરમી અને રાત્રે ઠંડી એમ લોકોને બેવડી ઋતુનો સામનો કરવો પડી રહ્યો છે. હાલમાં ઉત્તર-પશ્ચિમ દિશાના સૂકા પવનો ફૂંકાઈ રહ્યા હોવાથી આગામી પાંચ દિવસમાં તાપમાનનો પારો વધુ ગગડવાની શક્યતા છે.