ગુજરાતના પાટનગરમાં ભ્રષ્ટાચાર વિરોધી બ્યૂરો (ACB)એ એક મોટી સફળતા હાંસલ કરી છે. ગાંધીનગર કોર્ટ પાર્કિંગ પાસે ફિલ્મી ઢબે ઓપરેશન પાર પાડીને ACBએ નાયબ મામલતદાર અને નિવૃત્ત પટાવાળાને લાખોની લાંચ લેતા રંગેહાથ ઝડપી પાડ્યા છે. આ કાર્યવાહીથી સરકારી કચેરીઓમાં ભ્રષ્ટાચાર કરતા બાબૂઓમાં ખળભળાટ મચી જવા પામ્યો છે.
ગાંધીનગર કલેક્ટર કચેરીમાં ભ્રષ્ટાચારના કિસ્સાઓ સતત વધી રહ્યા છે. સૂત્રોના જણાવ્યા અનુસાર છેલ્લા 5 વર્ષમાં આ કચેરી અને તાબાની ઓફિસોના અંદાજે 12થી વધુ કર્મચારીઓ લાંચ લેતા ઝડપાયા છે. અગાઉ પણ નાયબ મામલતદાર અને ક્લાર્ક કક્ષાના અધિકારીઓ ACBની જાળમાં સપડાઈ ચૂક્યા છે.
દિવ્યભાસ્કરના અહેવાલ મુજબ, ગાંધીનગર કલેક્ટર કચેરીમાં જમીન ફાળવણી શાખાના નાયબ મામલતદાર બિપીનચંદ્ર પરમાર અને નિવૃત્ત પટાવાળા દિનેશ વાળંદને ACBએ 4.50 લાખ રૂપિયાની લાંચ લેતા રંગેહાથ ઝડપી પાડ્યા હતા. ACBએ ગાંધીનગર કોર્ટના પાર્કિંગ છટકું ગોઠવ્યું હતું અને તેમાં તેઓ ફસાઈ ગયા. ગાંધીનગર કોર્ટના પાર્કિંગ પાસે ફિલ્મી ઢબે ગોઠવાયેલા છટકા દરમિયાન લાંચની રકમ સ્વીકારતા જ બંનેની ધરપકડ કરવામાં આવી હતી.
એક વ્યક્તિએ તેમના સંબંધીના મકાનનું પ્રોપર્ટી કાર્ડ બનાવવા માટે કલેક્ટર કચેરીમાં અરજી કરી હતી. આ કામમાં કોઈ ભૂલ ન કાઢવા અને સારો અભિપ્રાય આપવા માટે નાયબ મામલતદાર તરફથી પૂર્વ પટાવાળાએ 9.50 લાખ રૂપિયાની માંગણી કરી હતી. રકઝક બાદ પહેલા હપ્તા તરીકે 4.50 લાખ રૂપિયા આપવાના નક્કી થયા હતા. ફરિયાદીએ આ અંગે ACBને જાણ કરતા PI કે.કે. દેસાઈએ તેમની ટીમે સાથે છટકું ગોઠવ્યું હતું.
કોર્ટ પાર્કિંગ પાસે ફરિયાદીની ગાડીમાં બેસી જ્યારે આરોપીઓએ લાંચને લઇને વાતચીત કરી અને પછી લાંચની રકમ સ્વીકારી, ત્યારે જ ACBની ટીમ ત્રાટકી અને બંનેને દબોચી લીધા હતા. ACBએ લાંચની પૂરેપૂરી રકમ રિકવર કરી છે અને હાલ બંને આરોપીઓના નિવાસસ્થાની તપાસની કાર્યવાહી હાથ ધરી છે, જેમાં આવક કરતા વધુ મિલકતો મળવાની શક્યતા છે.
આ અગાઉ સોમવારે અમદાવાદમા 80 હજારનો માસિક પગાર મેળવતો રેલવે ક્લાર્ક 100 રૂપિયાની લાંચ લેતા ACBએ તેની ધરપકડ કરી હતી. ત્યારે ગુજરામાં વધતા જતા ભષ્ટાચારના કિસ્સાઓને ડામવા સરકારે યોગ્ય પગલાં લેવા જરૂરી બની ગયા છે.
4.jpg)
