ગુજરાત કેડરના IPS અધિકારી સારા રિઝવીના ઇન્ટર-સ્ટેટ ડેપ્યુટેશનનો સમયગાળો કેન્દ્ર સરકારે 2 વર્ષ માટે લંબાવી દીધો છે. સારા રિઝવી 2008 બેચના IPS અધિકારી છે. તેમનું મૂળ કેડર ગુજરાત છે. હાલમાં તેઓ જમ્મુ-કાશ્મીર પોલીસ મુખ્યાલયમાં DIG પ્રશાસન તરીકે તૈનાત છે. મુંબઈમાં જન્મેલા સારાને શરૂઆતમાં અંગત કારણોસર ગુજરાતથી જમ્મુ-કાશ્મીરમાં ઇન્ટર કેડર પ્રતિનિયુક્તિ પર મોકલવામાં આવ્યા હતા. સરકારે હવે આ સમયગાળો 2 વર્ષ માટે લંબાવી દીધો છે. અગાઉ તેમને 3 વર્ષની પ્રતિનિયુક્તિ મળી હતી. તેઓ ઓક્ટોબર 2022માં જમ્મુ-કાશ્મીર ગયા હતા.
સારા રિઝવીના નામે અનોખો રેકોર્ડ છે. તેઓ ગુજરાતના પ્રથમ મુસ્લિમ મહિલા IPS અધિકારી છે. તેમણે UPSC પરીક્ષાની તૈયારી માટે ઉર્દૂ માધ્યમનો ઉપયોગ કર્યો હતો અને તેમને Modern Educational Social & Cultural Organisation (MESCO)નો સહયોગ મળ્યો હતો. સારા રિઝવીએ મુંબઈથી સ્નાતક પૂર્ણ કર્યું છે. સારા કોમર્સમાં સ્નાતક છે. તેઓ ચાર્ટર્ડ એકાઉન્ટન્ટ બનવા માંગતા હતા, પરંતુ એક લેક્ચરે તેમની જિંદગીનો માર્ગ બદલી નાખ્યો.
તેઓ ડૉ. કે.એમ. આરિફથી એટલા પ્રભાવિત થયા કે તેમણે UPSC પરીક્ષા આપવાનો નિર્ણય લીધો. તેઓ બીજા પ્રયાસમાં સિવિલ સર્વિસિસમાં પસંદગી પામ્યા. જમ્મુ-કાશ્મીરમાં તૈનાત સારા રિઝવી જમ્મુ-કાશ્મીરના ઉધમપુર-રિયાસીના DIG તરીકે સેવા આપી ચૂક્યા છે. આ સિવાય તેઓ DIG જમ્મુ (IR) અને DIG જમ્મુ આર્મ્ડનો વધારાનો હવાલો પણ સંભાળી ચૂક્યા છે.
જમ્મુ-કાશ્મીરમાં ઘણી મહત્ત્વપૂર્ણ જવાબદારીઓ સંભાળી ચૂકેલા રિઝવીએ 2008માં મુન્નવર ખાન સાથે લગ્ન કર્યા હતા. તેઓ તે સમયે RPFમાં ટ્રેઇની આસિસ્ટન્ટ સિક્યોરિટી કમિશનર હતા. IPS અધિકારી બન્યા બાદ સારા રિઝવીએ ગુજરાતમાં ડ્યૂટી કરી ચૂક્યા છે. તેમનું પહેલું પોસ્ટિંગ જામનગરમાં હતું. ત્યારબાદ તેમને રાજકોટના ગોંડલમાં મોકલવામાં આવ્યા હતા.
ગોંડલ એક સમયે ગેંગવૉર માટે પ્રખ્યાત રહી ચૂક્યું છે. તેમને ગોંડલના ASP બનાવવામાં આવ્યા હતા. મુંબઈમાં જન્મેલા અને ઉછરેલા સારા રિઝવી એક પ્રતિષ્ઠિત પરિવારમાંથી આવે છે. તેમના પિતા અફઝલ અહમદ, વિજ્ઞાનમાં સ્નાતક છે. તેમના માતા નિગાર રિઝવી, અલીગઢ મુસ્લિમ યુનિવર્સિટીમાં ભણ્યા છે. સારાનો ભાઈ સિવિલ એન્જિનિયર છે અને તેની બહેન સમીરા, કમ્પ્યુટર ગ્રેજ્યુએટ છે અને દુબઈમાં રહે છે.
