કાનપુરમાં એક ઘરની બહાર એક મહિલા ઊભી હતી; જેની કહાની હજારો કિલોમીટર દૂર થાઈલેન્ડમાં શરૂ થઈ હતી. તે કાનપુરમાં કોઈ પ્રવાસી તરીકે આવી નહોતી. તેની પાસે લગ્નની તસવીરો, કેટલાક દસ્તાવેજો અને એક પ્રશ્ન હતો કે, જે વ્યક્તિને પોતાનો પતિ માનીને વર્ષો સુધી તેની સાથે સંબંધમાં રહી હતી, તે આખરે અચાનક તેનાથી દૂર કેમ થઇ ગયો?
આ મહિલાનું નામ અપસોર્ન છે. તે થાઈલેન્ડની રહેવાસી છે અને ત્યાં એક રેસ્ટોરાં ચલાવે છે. તેનો દાવો છે કે લગભગ 4 વર્ષ પહેલાં, સોશિયલ મીડિયા દ્વારા તેની મુલાકાત કાનપુરના ટેનરી (ચામડાના ઉદ્યોગ)ના વેપારી મોહમ્મદ ઈરફાન સાથે થઈ હતી. વાતચીત વધી, મુલાકાતો થઈ અને આખરે તેમના લગ્ન થયા. ત્યારબાદ, ઈરફાન કાનપુર પાછો ફર્યો અને અપસોર્નથી અંતર બનાવી લીધું. હવે તે આ સંબંધ અંગેના જવાબો મેળવવા માટે કાનપુર પહોંચી હતી. તેના આરોપો મુજબ, આ કહાનીમાં પ્રેમ સાથે લાખો રૂપિયા, બે મોંઘી સ્પોર્ટ્સ બાઇક, લગ્ન, ધર્મ પરિવર્તન માટેનું દબાણ અને અચાનક તૂટેલા સંપર્કની કડીઓ જોડાતી ગઇ.
અપસોર્નનો દાવો છે કે તે એક પરિચિત વ્યક્તિ સાથે કાનપુરના લાટુશ રોડ પર આવેલા ઈરફાનના ઘરે ગઈ હતી. તેને આશા હતી કે ચાર વર્ષના સંબંધ પછી રૂબરૂ મુલાકાત કરવાથી તમામ ગેરસમજો દૂર થઈ જશે. જોકે, મહિલાના જણાવ્યા અનુસાર, ત્યાં પહોંચતા જ પરિસ્થિતિએ નવો વળાંક લઇ લીધો. તેનો દાવો છે કે તેને જાણવા મળ્યું કે ઈરફાન પહેલેથી જ પરિણીત છે અને ત્રણ બાળકો પણ છે. મહિલાનો આરોપ છે કે શરૂઆતમાં ઈરફાને તેને ઓળખવાનો પણ ઇનકાર કર્યો હતો. બાદમાં, તેને ઓળખી લીધા પછી વિવાદ વધી ગયો. થાઈલેન્ડમાં શરૂ થયેલો સંબંધ હવે કાનપુર પોલીસ સ્ટેશન સુધી પહોંચી ચૂક્યો હતો.
અપસોર્નના જણાવ્યા અનુસાર, ઈરફાન વ્યવસાયના કામકાજ માટે થાઈલેન્ડ આવતો-જતો હતો. તે દરમિયાન જ બંનેની મુલાકાત સોશિયલ મીડિયા દ્વારા થઈ હતી. પહેલા વાતચીત થઈ અને પછી મુલાકાતોનો દોર શરૂ થયો. તેમનો સંબંધ એટલો ગાઢ બન્યો કે લગભગ બે વર્ષ પહેલાં તેમણે થાઈ પરંપરાઓ મુજબ લગ્ન કરી લીધા. મહિલાનું કહેવું છે કે તે આ સંબંધને માત્ર સોશિયલ મીડિયાની મિત્રતા કરતા કંઈક વિશેષ માનતી હતી; તે ઇરફાનને પોતાનો પતિ માનતી હતી અને ભવિષ્યમાં સાથે રહેવાની યોજના પણ બનાવી હતી. તેણે લગ્નના ફોટોગ્રાફ્સ, કાર્ડ્સ અને અન્ય દસ્તાવેજો પોલીસને સોંપ્યા છે. પરંતુ, તેના જણાવ્યા મુજબ જ્યારે ભારતમાં સાથે રહેવાની વાત આવી ત્યારે પરિસ્થિતિ બદલાઈ ગઇ.
મહિલાનો આરોપ છે કે ભારતમાં ઇરફાન સાથે રહેવા માટે તેના પર ઇસ્લામ ધર્મ અપનાવવાનું દબાણ કરવામાં આવ્યું હતું. તેનો દાવો છે કે તેને કહેવામાં આવ્યું હતું કે જો તે તેની સાથે ભારતમાં રહેવા માંગતી હોય, તો તેણે ઇસ્લામ કબૂલ કરવો પડશે અને બુર્ખો પહેરવો પડશે. અપસોર્ન જણાવે છે કે તેણે ધર્મ પરિવર્તન કરવાનો સ્પષ્ટ ઇનકાર કર્યો હતો, અને અહીંથી જ તેમના સંબંધોમાં તિરાડ પડવાની શરૂઆત થઈ. તેના આરોપો મુજબ, ત્યારબાદ તેણે ઇરફાન પાસે પોતાના પૈસા પાછા માંગવાનું શરૂ કર્યું. શરૂઆતમાં તેને ગોળગોળ વાતનો સામનો કરવો પડ્યો અને બાદમાં, કથિત રીતે તેણે તેનો ફોન ઉઠાવવાનો પણ બંધ કરી દીધો.
આ કહાનીનો સૌથી ચોંકાવનારો હિસ્સો મોંઘી સ્પોર્ટ્સ બાઇક્સ સાથે જોડાયેલો છે. અપસોર્નનો દાવો છે કે ઇરફાનને હાઇ-એન્ડ બાઇક્સનો શોખ હતો. તેણે તેના જન્મદિવસના પ્રસંગે બે સ્પોર્ટ્સ બાઇક્સ ખરીદવા માટે પૈસા આપ્યા હતા. એવો દાવો કરવામાં આવ્યો છે કે પ્રથમ બાઇક પર લગભગ રૂ.21 લાખ અને બીજી બાઇક પર લગભગ રૂ.34 લાખ ખર્ચવામાં આવ્યા હતા, જેથી કુલ રકમ લગભગ રૂ.55 લાખ થઈ ગઇ. મહિલાનું કહેવું છે કે તેણે આ પૈસા તેમના સંબંધો અને વિશ્વાસના આધારે ખર્ચ્યા હતા. આજે, એ જ રકમ સમગ્ર વિવાદનો મુખ્ય મુદ્દો બની ગઈ છે. શું બાઇક્સ ખરેખર મહિલાના પૈસાથી ખરીદવામાં આવી હતી? શું પૈસા ઇરફાનને આપવામાં આવ્યા હતા? શું આ સાબિત કરવા માટે બેંકિંગ રેકોર્ડ્સ ઉપલબ્ધ છે? અને સૌથી મોટો પ્રશ્ન એ છે કે, જો તેઓ સંબંધમાં હતા, તો પૈસા પાછા માંગ્યા પછી વાતચીત કેમ બંધ થઈ ગઈ? પોલીસ આ પ્રશ્નોની તપાસ કરી રહી છે.
ઇરફાનના સોશિયલ મીડિયા એકાઉન્ટ્સ પર મોંઘી સ્પોર્ટ્સ બાઇક્સ સાથેના તેના વીડિયો જોવા મળ્યા છે. મહિલાનો દાવો છે કે આ બાઇક્સ ખરીદવા માટે એ જ પૈસાનો ઉપયોગ કરવામાં આવ્યો હતો. એક વીડિયોમાં ઇરફાન બાઇક સાથે જોવા મળે છે; તે સોશિયલ મીડિયા પર પોતાની જીવનશૈલી સાથે જોડાયેલા વીડિયો વારંવાર પોસ્ટ કરતો રહ્યો છે. અપસોર્ન એવો પણ દાવો કરે છે કે ઇરફાન પાસે મોંઘી કાર પણ છે. જોકે, પોલીસ તપાસ બાદ જ સ્પષ્ટ થશે કે બાઇક ખરીદવા માટે કોના પૈસાનો ઉપયોગ કરવામાં આવ્યો હતો અને તે કોના નામે નોંધાયેલી છે.
અપ્સોર્નનો આરોપ છે કે ઇરફાન પાછળ પૈસા ખર્ચવાને કારણે તેની પાસે રકમ ઓછી પડવા લાગી હતી. તેણે દાવો કર્યો છે કે થાઈલેન્ડમાં આવેલી પોતાની રેસ્ટોરાં બેંકમાં ગીરો મૂકીને તેણે લોન લીધી. ત્યારબાદ પણ રકમ પૂરી ન થઈ, ત્યારે તેણે પોતાની બહેન અને સંબંધીઓ પાસેથી પૈસા ઉછીના લીધા. મહિલાના જણાવ્યા અનુસાર, તે સતત ઇરફાનને આર્થિક મદદ કરતી રહી, પરંતુ જ્યારે તેણે પોતાના પૈસા પાછા માંગવાનું શરૂ કર્યું ત્યારે કથિત રીતે તેમના સંબંધોમાં તિરાડ પડવા લાગી હતી.
અપ્સોર્નના જણાવ્યા અનુસાર, ઈરફાન ફેબ્રુઆરી 2026માં ભારત પરત ફર્યો હતો. શરૂઆતમાં વિલંબનું કારણ બીમારી હોવાનું જણાવાયું હતું. મહિલા રાહ જોતી રહી, પરંતુ ધીમે-ધીમે વાત ઓછી થતી ગઇ. ફોન કોલ્સનો કોઈ જવાબ મળતો નહોતો અને આખરે સંપર્ક સંપૂર્ણપણે તૂટી ગયો. ત્યારે જ તેણે કાનપુર આવવાનો નિર્ણય કર્યો. તેણે પોલીસને જણાવ્યું કે, તેણે ઘણી વખત સંપર્ક કરવાના નિષ્ફળ પ્રયાસો કર્યા બાદ, ભારત આવીને રૂબરૂમાં આ વાતનો ઉકેલ લાવવા સિવાય તેની પાસે બીજો કોઈ વિકલ્પ બચ્યો નહોતો. જોકે, ઈરફાનનો પરિવારની કહાની એકદમ વિપરિત છે; જ્યાં થાઈ મહિલા છેતરપિંડી, આર્થિક શોષણ અને બળજબરીથી ધર્મ પરિવર્તન કરાવવાના આરોપો લગાવી છે.
ઈરફાનની માતા આ આરોપોને સ્પષ્ટપણે નકારે છે. તેનો દાવો છે કે મહિલા પૈસા માટે તેના પુત્રને ફસાવવાનો પ્રયાસ કરી રહી છે અને તેને બ્લેકમેલ કરી રહી છે. પરિવારનું કહેવું છે કે ઈરફાને વ્યવસાયમાં નુકસાન થયાની વાત કરી હતી. પરિવારના લોકોએ પણ તેની આર્થિક મદદ કરી હતી. મોંઘી મોટરસાઇકલ અંગે તેની માતાનું કહેવું છે કે તેણે તે પોતાની કમાણીથી ખરીદી હતી. તેણે એમ પણ કહ્યું કર્યો કે ઈરફાનના પિતા બાઇકની ખરીદીને લઈને તેનાથી નારાજ રહેતો હતો. થાઈલેન્ડની તેની યાત્રાઓ વિશે પરિવારનો દાવો છે કે તેના પિતાએ તેને ત્યાં જતા રોકતા હતા.
આ કહાનીમાં હવે સૌથી મહત્ત્વપૂર્ણ ભૂમિકા દસ્તાવેજોની છે, જેની પોલીસ તપાસ કરી રહી છે. બે મોટરસાઇકલ કોના નામે નોંધાયેલી છે? કયા ખાતામાંથી ચૂકવણી કરવામાં આવી હતી? મહિલાએ ઈરફાનને કેટલા પૈસા ટ્રાન્સફર કર્યા? શું તેમની વચ્ચેના ટેક્સ્ટ મેસેજ અને કોલ રેકોર્ડ્સ તેના આરોપોની પુષ્ટિ કરે છે? લગ્ન સંબંધિત દસ્તાવેજો શું કહે છે? અને ધર્મ પરિવર્તનના આરોપોના સમર્થનમાં શું પુરાવા છે? આ પ્રશ્નોના જવાબો તપાસની દિશા નક્કી કરશે.
DCP સેન્ટ્રલ અતુલ કુમાર શ્રીવાસ્તવના જણાવ્યા અનુસાર, અપ્સોર્નની ફરિયાદના આધારે મોહમ્મદ ઈરફાન વિરુદ્ધ કેસ નોંધવામાં આવ્યો છે. ધર્મ પરિવર્તન માટે દબાણ, મારામારી અને છેતરપિંડી જેવા આરોપો અંગે કાર્યવાહી કરવામાં આવી રહી છે. તો, ધરપકડ બાદ ઈરફાન મીડિયા સમક્ષ ભાવુક જોવા મળ્યો હતો. તેણે રૂમાલથી પોતાનો ચહેરો ઢાંકી રાખ્યો હતો અને પૂછપરછ દરમિયાન રડવા લાગ્યો હતો.
5.jpg)
