રાષ્ટ્રીય રાજધાની દિલ્હીથી એક વીડિયો સામે આવ્યો છે અને સોશિયલ મીડિયા પર તેની ખૂબ ચર્ચા થઈ રહી છે. વીડિયોમાં, પૂર્વ દિલ્હીના પટપડગંજ (વોર્ડ નંબર 197)ના BJP કાઉન્સિલર રેણુ ચૌધરી એક પબ્લિક પાર્કમાં વિદેશી ફૂટબોલ કોચને જાહેરમાં ધમકી આપતા અને તેના પર બૂમો પાડતા જોવા મળ્યા હતા. આ વિવાદની હકીકત એ છે કે, ભારતમાં રહેતા હોવા છતાં, એ વિદેશી નાગરિકે હજુ સુધી હિન્દી શીખી ન હતી. કાઉન્સિલરે કોચને અલ્ટીમેટમ આપ્યું હતું, અને ધમકી પણ આપી હતી કે, જો તે એક મહિનાની અંદર હિન્દી નહીં શીખે તો પાર્ક છીનવી લેવામાં આવશે.
વાયરલ વીડિયોમાં, રેણુ ચૌધરી સ્થાનિક રહેવાસીઓ અને બાળકોને તાલીમ આપી રહેલા આફ્રિકન કોચ સાથે આક્રમક રીતે વાત કરતી જોવા મળે છે. તે બૂમ પાડીને વાત કરતા કહે છે કે, 'તમે મારી વાત પ્રત્યે ગંભીર છો જ નહીં, તમે આ સાંભળીને પણ કઈ કહેતા નથી, તમે હિન્દી કેમ નથી શીખ્યા?' તે આજુ બાજુમાં ઉભેલા લોકોને કહે છે કે, 'જો આ માણસ આગામી એક મહિનાની અંદર હિન્દી નહીં શીખે, તો તેને પાર્કમાં ઘુસવા જ નહીં દેવાનો.' કાઉન્સિલરે ખૂબ જ કઠોર શબ્દોનો ઉપયોગ કરતા કહ્યું, 'જો તમે અહીંથી પૈસા લઈ રહ્યા છો, તો મોઢેથી હિન્દી બોલતા પણ શીખો.'
https://twitter.com/mrjethwani_/status/2002776766356865360
વિવાદ ફક્ત ભાષા પૂરતો જ મર્યાદિત નહોતો. વીડિયોના બીજા ભાગમાં, કાઉન્સિલર કોઈ પર આંગળી ચીંધતા અને ચેતવણી આપતા જોવા મળે છે કે પાર્ક કોઈપણ સંજોગોમાં રાત્રે 8 વાગ્યા સુધીમાં બંધ કરી દેવો જોઈએ. તેમણે કડક શબ્દોમાં કહ્યું કે, જો પાર્કમાં કોઈ 'ગુનાહિત પ્રવૃત્તિ' થાય છે, તો ત્યાં હાજર લોકો તેના માટે જવાબદાર રહેશે. એવું કહેવામાં આવી રહ્યું છે કે, કાઉન્સિલરે લગભગ આઠ મહિના પહેલા આ મુદ્દો ઉઠાવ્યો હતો, પરંતુ સ્થાનિક રહેવાસીઓની વિનંતી પર, તેમણે કોચને તાલીમ ચાલુ રાખવાની મંજૂરી આપી હતી.
વીડિયો વાયરલ થતાંની સાથે જ લોકોએ BJP કાઉન્સિલરના વર્તનની આકરી ટીકા કરી. સોશિયલ મીડિયા યુઝર્સે તેને 'શરમજનક કૃત્ય' અને 'ગુંડાગીરી' ગણાવી. એક યુઝરે લખ્યું કે, 'આવા કાર્યો કરીને, તે બિન-હિન્દીભાષી રાજ્યોમાં હિન્દીભાષીઓ સાથેના દુર્વ્યવહારને યોગ્ય ઠેરવી રહી છે.' લોકો કહે છે કે, જનપ્રતિનિધિ બનવાની તેમની ઇચ્છામાં, તેમણે નૈતિકતા અને દેશના બંધારણનો અનાદર કર્યો છે. કેટલાક યુઝર્સે તેને જાતિવાદી માનસિકતાનું ઉદાહરણ આપીને તેને શરમજનક ગણાવ્યું છે.
5.jpg)
9.jpg)
