પેપર લીક મુદ્દે કોકરોચ જનતા પાર્ટી (CJP) દ્વારા ચલાવવામાં આવેલા આંદોલનનો અંત કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા સાથે થયો. દિલ્હીના જંતર મંતર ખાતે એક મહિનાથી ચાલી રહેલા વિરોધ પ્રદર્શનનો અંત આવ્યો છે. આ આંદોલનમાં, મધ્યમ વર્ગના પરિવારોના બાળકો અને વિદ્યાર્થીઓએ પરંપરાગત રાજકીય પક્ષોથી અલગ થઈને સફળતાપૂર્વક પોતાનો અવાજ ઉઠાવ્યો અને સરકાર પર દબાણ બનાવવામાં સફળ રહ્યા.
BJP અને NDA સાથે સંકળાયેલા વરિષ્ઠ નેતાઓના બાળકો પણ વિદ્યાર્થી આંદોલનમાં પોતાનો અવાજ ઉઠાવતા જોવા મળ્યા છે. આસામ ગણ પરિષદ (AJP)ના નેતા અને આસામ સરકારના મંત્રીની પુત્રી વિદ્યાર્થી આંદોલનના સમર્થનમાં બહાર આવી, NDA સરકારને કઠેડામાં ઉભી કરી.
ઓડિશાના એક વરિષ્ઠ BJP સાંસદ અને ઉત્તર પ્રદેશના ભૂતપૂર્વ MLAની પુત્રી સોશિયલ મીડિયા પર વિદ્યાર્થી આંદોલનને ટેકો આપતી જોવા મળી છે. પેપર લીક સામે યુવાનોના વિરોધ અને BJP નેતાઓના બાળકોની ભાગીદારીએ સરકાર પર દબાણ વધાર્યું હતું. આ સ્પષ્ટપણે દર્શાવે છે કે, BJP સમર્થકો પણ પેપર લીક મુદ્દે સરકારથી ગુસ્સે હતા.
23 જુલાઈના રોજ, દિલ્હીના જંતર-મંતર ખાતે CJPના ચાલી રહેલા વિદ્યાર્થી આંદોલનના સમર્થનમાં ગુવાહાટીમાં વિદ્યાર્થીઓ અને યુવાનો રસ્તા પર ઉતર્યા હતા. આસામ સરકારના મંત્રી અને AJP નેતા કેશવ મહંતની પુત્રી દિબિશાએ પણ આ વિરોધ પ્રદર્શનમાં ભાગ લીધો હતો.
ભુવનેશ્વરના BJP સાંસદ અપરાજિતા સારંગીની પુત્રી અર્ચિતા સારંગીએ શનિવારે ધર્મેન્દ્ર પ્રધાનના રાજીનામાની ઉજવણી કરતી એક ઇન્સ્ટાગ્રામ સ્ટોરી શેર કરી હતી. ઉત્તર પ્રદેશના BJPના ભૂતપૂર્વ ધારાસભ્ય વિક્રમ સિંહની પુત્રી યશસ્વી રાજે સિંહે પણ સોશિયલ મીડિયા પર પાર્ટીની ટીકા કરી હતી. ત્રણેય BJP નેતાઓની પુત્રીઓ Gen-Zની છે, એટલે કે 1997થી 2012ની વચ્ચે જન્મેલી પુત્રીઓ.
આસામ ગણ પરિષદના નેતા અને હેમંત સરકારમાં મંત્રી કેશવ મહંતની પુત્રી દિબિશા BJPનો વિરોધ કરવા ગુવાહાટીની શેરીઓ પર ઉતરી હતી. UKમાં શિક્ષિત વિદ્યાર્થી દિબિશા 20 જુલાઈના રોજ દિલ્હીના જંતર-મંતર ખાતે વિદ્યાર્થીઓ સામે પોલીસ કાર્યવાહીનો વિરોધ કરવા માટે રસ્તા પર ઉતરી હતી. આ વિરોધ પ્રદર્શન દરમિયાન, તેને PM મોદી વિરુદ્ધ સૂત્રોચ્ચાર કરતી અને ન્યાયની માંગણી કરતી સાંભળી શકાય છે.
બીજા એક વીડિયોમાં, દિબિશા કહેતી સાંભળી શકાય છે કે, 'આ ખૂબ જ દુઃખદ છે, અને હું વ્યક્ત કરી શકતી નથી કે જે હિંસા થઈ રહી છે તે જોઈને મને કેટલું ખરાબ લાગે છે. વિદ્યાર્થીઓ શાંતિપૂર્ણ રીતે વિરોધ કરવા માંગતા હતા, પરંતુ પરિસ્થિતિ હિંસક બની ગઈ. લાઠીચાર્જ થયો, ટીયર ગેસ, બધું જ થયું. પરંતુ હું કહેવા માંગુ છું કે મને તે બધા વિદ્યાર્થીઓ પર ખૂબ ગર્વ છે જેઓ તે દિવસે બહાર આવ્યા અને તેમની બહાદુરી બતાવી, અને તેઓએ જ મને પ્રેરણા આપી.'
ઓડિશાના BJP સાંસદ અપરાજિતા સારંગીની પુત્રી અર્ચિતા સારંગી, જેમની પ્રદર્શનકારીઓને સમર્થન આપતી ઇન્સ્ટાગ્રામ પોસ્ટ વાયરલ થઈ છે અને ઓનલાઈન વ્યાપક ચર્ચાનો વિષય બની છે. તેણે ધર્મેન્દ્ર પ્રધાનના રાજીનામાની ઉજવણી કરતો એક વીડિયો ઇન્સ્ટાગ્રામ પર પોસ્ટ કર્યો, જેમાં લખ્યું, 'મારો પરિવાર ધર્મેન્દ્ર પ્રધાન સાથે ઉભો છે, પરંતુ હું વિદ્યાર્થીઓ સાથે ઉભી છું.'
અર્ચિતાએ એમ પણ કહ્યું, 'DP (ધર્મેન્દ્ર પ્રધાનના) PA, જે ચોક્કસપણે મારી માતાને મેસેજ કરશે અને મારી પાછલી સ્ટોરી (આ પહેલા પણ બન્યું છે) ડિલીટ કરવાનું કહેશે, પરેશાન ન થશો, હું મારી પોસ્ટ ડિલીટ નહીં કરું. જય જગન્નાથ! જય હિંદ, પણ મેં સ્ટોરી ડિલીટ કરી દીધી છે.'
આ દરમિયાન, ઉત્તર પ્રદેશના ફતેહપુર મતવિસ્તારના બે વખતના ધારાસભ્ય વિક્રમ સિંહની પુત્રી યશસ્વિની રાજે સિંહે કે જેણે લંડન સ્કૂલ ઓફ ઇકોનોમિક્સમાંથી MScની ડિગ્રી મેળવી છે. યશસ્વિની રાજે સિંહે 20 જુલાઈના રોજ જંતર-મંતર પર થયેલા લાઠીચાર્જ માટે સરકારની ટીકા કરતી ઘણી સોશિયલ મીડિયા પોસ્ટ ફરીથી પોસ્ટ કરી હતી. શનિવારે, તેણે તેના X એકાઉન્ટ પર લખ્યું, 'જો કોઈ એક વાત જે હું ચોક્કસ જાણું છું કે, તો તે એ છે કે, PM મોદી અને કેન્દ્રીય ગૃહ પ્રધાન અમિત શાહ સહુથી વધારે બદલાની ભાવનાથી કાર્ય કરશે.'
વિક્રમ સિંહે તેમની પુત્રીની સોશિયલ મીડિયા પોસ્ટ પર ટિપ્પણી કરવાનો ઇનકાર કર્યો હતો, જેમાં વિદ્યાર્થી વિરોધ પ્રદર્શન પર સરકાર અને BJP નેતૃત્વની ટીકા કરવામાં આવી હતી. તેવી જ રીતે, આસામના મંત્રીની પુત્રીના વિરોધ પ્રદર્શનમાં સામેલ થવા અંગે, આસામના CM હિમંતા બિસ્વા શર્માએ કહ્યું, 'મારા બાળકો જે કરે છે તેના માટે મને કેવી રીતે જવાબદાર ઠેરવી શકાય? મારો પોતાનો ભાઈ પણ મારી કોઈપણ વાત સાથે સહમત નથી. મારા બાળકો પણ મારા ઘણા વિચારો સાથે અસંમત છે.'
CM સરમાએ ઉમેર્યું, 'જો મારો પુત્ર કાલે કંઈક ખોટું કહે તો આશ્ચર્ય પામશો નહીં. મારો પુત્ર ભવિષ્યમાં વકીલ બનશે અને એવા લોકોનો પક્ષ લઈ શકે છે, જેમને હું પસંદ નથી કરતો. જ્યારે બાળકો મોટા થઇ જાય છે અને પુખ્તવયના બને છે, ત્યારે તેમના કામોને તેમના માતાપિતા સાથે જોડવા જોઈએ નહીં. તેણે જે કઈ કહ્યું તે ખોટું હતું, પરંતુ અમે તેના વિશે છોકરી સાથે વાત કરીશું. અમે પિતાને શા માટે હેરાન કરીએ?'
BJP સાંસદ અપરાજિતા સારંગીએ તેમની પુત્રીની ઇન્સ્ટાગ્રામ પોસ્ટ અંગે પરિસ્થિતિ સ્પષ્ટ કરતા કહ્યું કે, તે અજાણતા પોસ્ટ કરી હતી. 'તે (અર્ચિતા) Gen-Z છે અને તેણે તેના મિત્રો સાથે મળીને સ્ટોરી પોસ્ટ કરી હતી. જ્યારે મેં તેને પૂછ્યું, ત્યારે તેને તેની ભૂલનો અહેસાસ થયો અને તેણે તેને ડીલીટ કરી દીધી.'
17.jpg)
