રાજસ્થાનના ચુરુ જિલ્લામાં શનિવારે બપોરે એક વિશાળ અને ભયાનક ધૂળની ડમરીઓ (વાવાઝોડું) ત્રાટકી હતી, જેના કારણે સમગ્ર આકાશ ધૂળની ચાદરથી ઢંકાઈ ગયું હતું અને દિવસ દરમિયાન જ રાત જેવો અંધારપટ છવાઈ ગયો હતો. આ ઘટનાના સામે આવેલા ચોંકાવનારા દ્રશ્યોમાં રેતીના ઘટ્ટ અને વિશાળ વાદળો ઘરોને પોતાની ઝપેટમાં લેતા અને વિઝિબિલિટી (દ્રશ્યતા) ને સંપૂર્ણપણે નહિવત કરતા જોઈ શકાય છે. આ વીડિયો જોઈને તમને ટોમ ક્રૂઝની ફિલ્મ મિશન ઈમ્પોસિબલની યાદ આવી જશે, જેમાં દુબઈમાં એક સીનના શૂટિંગમાં સેમ ટુ સેમ આવું જ દૃશ્ય જોવા મળ્યું હતું.
બપોરે આશરે 2 વાગ્યે ત્રાટકેલા આ ધૂળના વાવાઝોડાને કારણે ચુરુ અને સરદારશહર સહિતના કેટલાય વિસ્તારોમાં વિઝિબિલિટી ઘટીને માત્ર થોડાક મીટરની જ રહી ગઈ હતી. રસ્તાઓ પર વાહનોની ગતિ અટકી ગઈ હતી અથવા તો સાવ ધીમી પડી ગઈ હતી. વાહનચાલકોને આ ગીચ ધૂળના વાદળો વચ્ચે રસ્તો શોધવા માટે પોતાના વાહનોની હેડલાઇટ્સ ચાલુ કરવાની ફરજ પડી હતી.
આ વાવાઝોડું કલાકના અંદાજે 70 કિલોમીટરની ઝડપે ફૂંકાયેલા પવન સાથે આવ્યું હતું અને આશરે અડધા કલાક સુધી ચાલ્યું હતું. હવામાનમાં આવેલા આ અચાનક પલટાને કારણે સ્થાનિક બજારોમાં ભારે નાસભાગ અને અરાજકતાનો માહોલ સર્જાયો હતો; તીવ્ર પવન અને ચારેય તરફ ઉડતી ધૂળથી બચવા માટે લોકો સુરક્ષિત સ્થળો અને ઘરો તરફ દોડી ગયા હતા.
જો કે, આ ધૂળની ડમરીઓ બાદ ચુરુ જિલ્લાના કેટલાક ભાગોમાં વરસાદી ઝાપટાં પડ્યા હતા, જેના કારણે લોકોને અસહ્ય ગરમીમાંથી મોટી રાહત મળી હતી. હવામાન વિભાગના અધિકારીઓના જણાવ્યા અનુસાર, આ ધૂળના વાવાઝોડા અને ત્યારબાદ પડેલા વરસાદને કારણે તાપમાનમાં 8 ડિગ્રી સેલ્સિયસ સુધીનો મોટો ઘટાડો નોંધાયો છે. બીજી તરફ, આ તીવ્ર વાવાઝોડાને કારણે કેટલાક વિસ્તારોમાં વૃક્ષો, પાક અને વીજળીની લાઈનોને નુકસાન થયું હોવાની આશંકા પણ સેવાઈ રહી છે.
4.jpg)
13.jpg)
11.jpg)
