મહારાષ્ટ્રના નાગપુરમાં 23 કરોડ રૂપિયાનું ગોલ્ડ લોન કૌભાંડ સામે આવ્યું છે. હેરાનીની વાત એ છે કે, ICICI બેંકની વિવિધ શાખાઓમાં નકલી સોનાના દાગીનાને અસલી બતાવીને ગીરવે મૂકવામાં આવ્યા હતા અને બેન્કમાંથી લગભગ 23 કરોડની લોન લેવામાં આવી હતી. આ બાબતે બેંક દ્વારા દાખલ કરવામાં આવેલી ફરિયાદના આધારે ધંતોલી પોલીસે છેતરપિંડીનો કેસ નોંધ્યો છે અને વધુ તપાસ શરૂ કરી છે.
આ સમગ્ર છેતરપિંડીનો અંજામ જાન્યુઆરી 2023 થી ઓક્ટોબર 2025 વચ્ચે આપવામાં આવ્યો હતો. બેંકે જ્યારે તેના 'ગોલ્ડ લોન' પોર્ટફોલિયોનું આંતરિક ઓડિટ કરાવ્યું ત્યારે આ છેતરપિંડીનો પર્દાફાશ થયો હતો. ઓડિટ દરમિયાન, જાણવા મળ્યું કે 9 અલગ-અલગ બેંક શાખાઓમાં ગીરવે મૂકવામાં આવેલા દાગીના હકીકતમાં સોનાના નથી, પરંતુ નકલી છે. અહેવાલો અનુસાર, કુલ 195 ખાતાધારકોએ છેતરપિંડી કરીને આ લોન લીધી છે.
બેંકની સત્તાવાર ફરિયાદ બાદ ધંતોલી પોલીસે આરોપીઓ સામે છેતરપિંડી સંબંધિત કલમો હેઠળ કેસ નોંધ્યો છે. પોલીસ હાલમાં તપાસ કરી રહી છે કે શું કોઈ બેંકની અંદરના કર્મચારીઓ અથવા અધિકારીઓ આ સિન્ડિકેટનો ભાગ હતા, કારણ કે સોનાની શુદ્ધતા ચકાસવા માટે જવાબદાર વેલ્યુઅર્સની મંજૂરી વિના આટલી મોટી લોન મેળવવી અશક્ય છે. હાલમાં, પોલીસ એ તમામ 195 શંકાસ્પદ ખાતાધારકો અને સંકળાયેલ વેલ્યુઅર્સની યાદી તૈયાર કરી રહી છે, જેથી તપાસ આગળ વધી શકે.
નાગપુર પોલીસના જણાવ્યા અનુસાર, ICICI બેંકના ઝોનલ ઓફિસના કર્મચારી ધનંજય રમેશ થીટેની ફરિયાદના આધારે ધંતોલી પોલીસ સ્ટેશનમાં કેસ નોંધવામાં આવ્યો છે. બેંક દ્વારા કરાવવામાં આવેલા ગોલ્ડ લોન ઓડિટમાં બહાર આવ્યું છે કે મણિભવન શાખા સહિત કુલ 9 અલગ-અલગ શાખાઓમાં ગીરવે મૂકવામાં આવેલું સોનું નકલી છે.
એવો આરોપ છે કે જાન્યુઆરી 2023 થી ઓક્ટોબર 2025 દરમિયાન, 159 ખાતાધારકોએ બેંકના વેલ્યુઅર્સ અને ઓડિટર્સ સાથે મળીને આ ષડયંત્રને અંજામ આપ્યું. નકલી દાગીનાને અસલી ગણાવીને, બેંકમાંથી આશરે ₹23,19,64,751 ની લોન મેળવવામાં આવી હતી. પોલીસે આરોપીઓ સામે કલમ 406, 409, 420, 468, 120(B), અને 34 હેઠળ કેસ નોંધ્યો છે અને તપાસ શરૂ કરી દીધી છે.
27.jpg)
