બિહારમાં ગયા વર્ષે વિધાનસભાની ચૂંટણીઓ પછી, બધાની નજર આ વર્ષની ચૂંટણીઓ પર છે. પશ્ચિમ બંગાળ અને આસામમાં 2026માં ચૂંટણી યોજાવાની છે. આસામમાં માર્ચ-એપ્રિલમાં ચૂંટણીઓ યોજાવાની છે, અને ત્યાં રાજકીય ગતિવિધિઓ પણ તેજ થઈ ગઈ છે. આસામમાં, શાસક ભારતીય જનતા પાર્ટી (BJP) સત્તા જાળવી રાખવા માટે બિહાર ફોર્મ્યુલા પર કામ કરી રહી છે.
BJP આસામમાં 10 વર્ષથી સત્તામાં છે અને આ વખતે તેઓ જીતની હેટ્રિક મેળવવાનું લક્ષ્ય રાખે છે. CM હિમંતા બિસ્વા સરમા પણ મતદારોને આકર્ષવા માટે કંઇકને કંઇક નવી વસ્તુઓનો લાવવાનો પ્રયાસ કરી રહ્યા છે, ક્યારેક નિવેદનો દ્વારા તો ક્યારેક જાહેરાતો દ્વારા. ચૂંટણીના લગભગ ત્રણ મહિના પહેલા, આસામ સરકારે નવા વર્ષના પહેલા દિવસે એક નવી લાભાર્થી યોજનાની જાહેરાત કરી, જેનો હેતુ સ્નાતક અને અનુસ્નાતક પુરુષ વિદ્યાર્થીઓને લાભ આપવાનો હતો. આ સાથે જ તેમણે તેમની મુખ્ય ઓરુનોદોઈ યોજનાના 37 લાખ મહિલા લાભાર્થીઓ માટે રૂ. 8000ની 'બિહુ ભેટ'ની પણ જાહેરાત કરી.
આ અગાઉ, રાજ્યએ 2024 સુધીમાં બાળલગ્ન નાબૂદ કરવાના પ્રયાસોના ભાગ રૂપે, ઉચ્ચતર માધ્યમિકથી અનુસ્નાતક સ્તર સુધીની મહિલા વિદ્યાર્થીઓને માસિક નાણાકીય સહાય પૂરી પાડવા માટે નિજુત મોઇના યોજના શરૂ કરી હતી.
ત્યારપછી, પુરુષ વિદ્યાર્થીઓ માટે પણ એ જ પ્રકારની યોજનાની માંગનો ઉલ્લેખ કરીને, CM હિમંતા બિસ્વા સરમાએ 1 ફેબ્રુઆરીથી શરૂ થતી નવી 'બાબુ અસોની (યોજના)' શરૂ કરવાની જાહેરાત કરી, જેના હેઠળ સરકાર પાત્ર અનુસ્નાતક વિદ્યાર્થીઓને રૂ. 2,000 અને પાત્ર અંડરગ્રેજ્યુએટ વિદ્યાર્થીઓને રૂ. 1,000ની માસિક નાણાકીય સહાય પૂરી પાડશે. CM સરમાએ સ્પષ્ટતા કરી કે, આ યોજના માટે વાર્ષિક ઘરગથ્થુ આવક મર્યાદા રૂ. 4 લાખ નક્કી કરવામાં આવશે.
CM સરમા ચૂંટણી પહેલા અનેક જાહેરાતો કરી રહ્યા છે. તેમણે ઓરુનોદોઈ યોજનામાં ફેરફાર કર્યા. ઓરુનોદોઈ એ રાજ્ય સરકારની નાણાકીય સહાય યોજના છે, જે DBT દ્વારા દર મહિને મહિલા લાભાર્થીઓને સીધા પૈસા મોકલે છે. 2020માં શરૂ કરાયેલી આ યોજનામાં હાલમાં આશરે 37 લાખ લાભાર્થીઓ છે, જેમને દર મહિને રૂ. 1,250 મળે છે.
ઓરુનોદોઈ યોજનામાં થયેલા ફેરફારો અંગે, CM સરમાએ કહ્યું, 'અમે જાન્યુઆરીમાં શરૂ થતા ચૂંટણી વર્ષ દરમિયાન ઓરુનોદોઈ રકમનું વિતરણ કરીશું નહીં. તેના બદલે, આવતા મહિને 20 ફેબ્રુઆરીએ, દરેક લાભાર્થીને એડવાન્સ બોહાગ બિહુ ભેટ તરીકે રૂ. 8,000ની એડવાન્સમાં રકમ મળશે. તેના કારણે તેઓ બિહુ સારી રીતે ઉજવી શકશે.'
રાજ્યના પરિવારોની સંભાળ રાખતા, CM સરમાએ જાહેરાત કરી કે, આ મહિનાથી, રાજ્યના દરેક રેશનકાર્ડ ધારક રૂ. 100 પ્રતિ એક કિલો મસૂર, ખાંડ અને મીઠું ખરીદી શકશે. ગયા વર્ષે નવેમ્બરમાં, સરકારે લાભાર્થીઓ માટે રૂ. 117ના સંયુક્ત ભાવે આ ત્રણ વસ્તુઓનું સબસિડીવાળું રાશન શરૂ કર્યું હતું. આસામ સરકારે પહેલાથી જ ઘણી નાણાકીય સહાય યોજનાઓની જાહેરાત કરી છે, જે લોકોને સહાય પૂરી પાડે છે.
CM સરમા આ યોજનાઓની ખૂબ જ ચાલાકીથી જાહેરાત કરી રહ્યા છે. BJP 'બિહુ ભેટ' દ્વારા આસામી મતદારોને આકર્ષવાનો પ્રયાસ કરી રહી છે. તેઓએ નવા વર્ષ પર બિહુ માટે એક મોટી જાહેરાત કરી. માઘ બિહુ જાન્યુઆરીના મધ્યમાં ઉજવવામાં આવે છે અને આ આસામના સૌથી મોટા તહેવારોમાંનો એક છે. આ પછી, એપ્રિલના મધ્યમાં બોહાગ બિહુ પણ ઉજવવામાં આવશે, જે આસામી નવા વર્ષ તરીકે ઉજવવામાં આવે છે. આ એવો સમયગાળો હશે જ્યારે રાજ્યમાં ચૂંટણી પ્રક્રિયા તેની ટોચ પર હશે. એવી અપેક્ષા રાખવામાં આવે છે કે, આ સમય દરમિયાન આસામમાં ચૂંટણીની તારીખો આવી શકે છે.
આસામ પહેલા, બિહારમાં પણ આવું જ પગલું લેવામાં આવ્યું હતું, અને CM નીતિશ કુમારને તેનો ફાયદો થયો હતો. 26 સપ્ટેમ્બરના રોજ, ચૂંટણીની તારીખોની જાહેરાત પહેલાં, PM નરેન્દ્ર મોદીએ બિહારમાં મહિલાઓના રોજગારને પ્રોત્સાહન આપવા માટે મુખ્યમંત્રી મહિલા રોજગાર યોજનાની જાહેરાત કરી હતી. આ અંતર્ગત, દરેક પરિવારની દરેક મહિલાને રૂ. 10,000નો હપ્તો મળવાનો હતો. ત્યારપછી, ઓક્ટોબરના પહેલા અઠવાડિયામાં, CM નીતિશ કુમારે રાજ્યની 21 લાખ પાત્ર મહિલાઓના ખાતામાં સીધા રૂ. 10,000 ટ્રાન્સફર કર્યા.
આ રૂ. 10,000ની યોજનાએ બિહારની ચૂંટણીમાં મહિલા મતદારો પર નોંધપાત્ર અસર કરી, જેના પરિણામે CM નીતિશ કુમારના નેતૃત્વ હેઠળના NDA માટે ઐતિહાસિક જીત થઈ. CM નીતિશ કુમારે સત્તા પર બે દાયકા લાંબી પકડ જાળવી રાખવામાં પણ સફળતા મેળવી. જ્યારે લાલુ પ્રસાદ યાદવની પાર્ટી, રાષ્ટ્રીય જનતા દળ (RJD) વિપક્ષમાં ફક્ત 25 બેઠકો પર સમેટાઈ ગઈ.
હવે, આસામમાં CM હિમંતા બિસ્વા સરમાને આશા છે કે મહિલાઓના ખાતામાં રોકડ ટ્રાન્સફર યોજના અહીં પણ અસરકારક સાબિત થશે. તેથી, ઘણા લોકપ્રિય વચનો સાથે, તેઓ બિહુના અવસર પર મહિલાઓને રૂ. 8,000 મોકલવાનું વચન આપી રહ્યા છે. આ સાથે જ તેઓ યુવાનો પર પણ નજર રાખી રહ્યા છે. બિહાર ફોર્મ્યુલા આસામમાં કેટલી અસરકારક સાબિત થશે તે જોવાનું બાકી છે.
