મધ્યપ્રદેશના 'મિનિ મુંબઈ' ગણાતા ઇન્દોરમાં લોકાયુક્ત પોલીસે ભ્રષ્ટાચાર સામે એક મોટી સર્જિકલ સ્ટ્રાઈક કરી છે. લોકાયુક્તની ટીમે મહિલા અને બાળ વિકાસ વિભાગના જોઈન્ટ ડાયરેક્ટર લક્ષ્મીનારાયણ કંડવાલના ઘર, જીમ અને ડિપાર્ટમેન્ટલ સ્ટોર સહિતના અનેક સ્થળો પર એકસાથે દરોડા પાડ્યા હતા. દરોડાના પ્રથમ દિવસે જ્યાં 9.5 કરોડની સંપત્તિ હોવાનો અંદાજ હતો, ત્યાં તપાસ આગળ વધતા આ સરકારી અધિકારી અને તેમના પરિવારની કુલ અપ્રમાણસર મિલકતનો આંકડો 11 કરોડ રૂપિયા સુધી પહોંચી ગયો છે.
લોકાયુક્ત પોલીસની પૂછપરછ દરમિયાન જ્યારે 61 વર્ષના અધિકારી લક્ષ્મીનારાયણ કંડવાલને તેમની કાયદેસરની આવક અને આ અઢળક સંપત્તિ વચ્ચેના આભ-જમીનના તફાવત વિશે પૂછવામાં આવ્યું, ત્યારે તેમણે અત્યંત હાસ્યાસ્પદ દલીલ કરી હતી. કંડવાલે દાવો કર્યો હતો કે તેમની પત્ની ઘરે બેસીને સિલાઈ અને ગૂંથણકામ કરે છે, અને આ કરોડો રૂપિયાની સંપત્તિ તે સિલાઈની કમાણીમાંથી જ ભેગી કરવામાં આવી છે! લોકાયુક્ત ઈન્સ્પેક્ટર આશુતોષ મિઠાસે જણાવ્યું કે આ દાવાની સત્યતા તપાસવા માટે હવે કંડવાલની પત્નીના પાછલા કેટલાક વર્ષોના ઈન્કમ ટેક્સ રિટર્ન (ITR) અને બેંક ખાતાઓની ઝીણવટભરી તપાસ કરવામાં આવશે.
ઈન્સ્પેક્ટર આશુતોષ મિઠાસે માહિતી આપી હતી કે તેમને કંડવાલ વિરુદ્ધ એક ફરિયાદ મળી હતી, જેમાં આક્ષેપ કરાયો હતો કે તેમણે પોતાની કાયદેસરની આવક કરતા ઘણી વધારે સંપત્તિ એકઠી કરી લીધી છે. તપાસ અધિકારીના જણાવ્યા અનુસાર, કંડવાલની કુલ જાણીતી કાયદેસરની આવક અંદાજે 2.8 કરોડ રૂપિયા છે, જેમાં તેમની આખી નોકરી દરમિયાન મળેલો 2.5 કરોડ રૂપિયાનો સરકારી પગાર અને 30 લાખ રૂપિયાની ખેતીની આવક સામેલ છે. તેની સામે તપાસમાં અત્યાર સુધી કંડવાલ અને તેમના પરિવારની 10.83 કરોડ રૂપિયાની ચલ અને અચલ સંપત્તિ મળી આવી છે.
ક્યાંથી શું મળ્યું? લોકાયુક્તની તપાસમાં ચોંકાવનારો ખુલાસો
અધિકારીઓએ કંડવાલના વિવિધ ઠેકાણાઓ પરથી મળેલી સામગ્રીનો વિગતવાર આંકડો જાહેર કર્યો છે:
લોકાયુક્ત અધિકારીએ કહ્યું કેકંડવાલ અને તેના પરિવારે પોતાની 2.8 કરોડ રૂપિયાની કાયદેસરની આવકની સરખામણીએ અંદાજે 11 કરોડ રૂપિયાનો ખર્ચ કર્યો છે. આ આંકડો એક સરકારી અધિકારીની કાયદેસરની આવક કરતા લગભગ ચાર ગણો વધારે છે.
પુત્રો સંભાળે છે મોલ, જીમમાંથી આવે છે મસમોટું ભાડું
પૂછપરછ દરમિયાન કંડવાલે પત્નીની સિલાઈની કમાણીનો દાવો કરવા ઉપરાંત અન્ય વિગતો પણ આપી હતી. તપાસમાં સામે આવ્યું છે કે જે ડિપાર્ટમેન્ટલ સ્ટોર (મોલ) પર દરોડો પડ્યો છે, તેનું સંચાલન કંડવાલના બે પુત્રો કરે છે. જ્યારે જીમમાંથી તેમને દર મહિને અંદાજે 1.25 લાખ રૂપિયા ભાડા પેટે મળે છે. હાલ લોકાયુક્ત પોલીસ દ્વારા કંડવાલ અને તેમના પરિવારના તમામ બેંક ખાતાઓ ફ્રીઝ (ટ્રાન્ઝેક્શન પર રોક) કરી દેવામાં આવ્યા છે. બેંકો પાસેથી વિગતો મળ્યા બાદ તેમની સંપત્તિનું વધુ વિગતવાર મૂલ્યાંકન કરવામાં આવશે.
6 મહિના પછી નિવૃત્તિ હતી, હવે જેલના આંટા ખાવા પડશે
પોલીસ અધિકારીના જણાવ્યા અનુસાર, લક્ષ્મીનારાયણ કંડવાલ આગામી લગભગ છ મહિનામાં સરકારી સેવાઓમાંથી નિવૃત્ત થવાના હતા. જોકે નિવૃત્તિ પહેલા જ તેઓ લોકાયુક્તના સકંજામાં આવી ગયા છે. હાલ તેમની સામે ભ્રષ્ટાચાર નિવારણ (સુધારો) અધિનિયમ હેઠળ ગુનો નોંધીને આગળની સઘન તપાસ હાથ ધરવામાં આવી છે.
