ઉત્તર પ્રદેશના આગ્રા કેન્ટ રેલ્વે સ્ટેશન પર, રેલ્વેના બે વિભાગો વચ્ચે વિવાદ ફાટી નીકળ્યો, જેના કારણે સમગ્ર સ્ટેશન પરિસરમાં ભાગ દોડ થઇ ગઈ. હીરાકુડ એક્સપ્રેસ ટ્રેનના સ્ટોપ દરમિયાન શરૂ થયેલો વિવાદ ઝડપથી મારામારીના ઝઘડામાં પરિણમ્યો. રેલ્વે પ્રોટેક્શન ફોર્સ (RPF)ના કેટલાક કર્મચારીઓએ ડેપ્યુટી સ્ટેશન સુપરિન્ટેન્ડેન્ટ (ડેપ્યુટી SS) પર હુમલો કર્યો, તેને જમીન પર પછાડી દીધો અને બંને હાથ પકડીને પ્લેટફોર્મ પર ખેંચ્યો. ઘટનાનો વીડિયો અને ફોટોગ્રાફ્સ સામે આવ્યા પછી, રેલ્વે વહીવટીતંત્ર હરકતમાં આવ્યું. 4 RPF કર્મચારીઓને સસ્પેન્ડ કરવામાં આવ્યા છે, જ્યારે આ મામલાની તપાસ માટે 3 સભ્યોની સમિતિની રચના કરવામાં આવી છે.
નોર્થ સેન્ટ્રલ રેલ્વેના આગ્રા ડિવિઝનના મુખ્ય જનસંપર્ક અધિકારી ડૉ. શિવમ શર્માએ એક વીડિયો જાહેર કરીને જણાવ્યું હતું કે, આ મામલાને ગંભીરતાથી લેવામાં આવ્યો છે અને તાત્કાલિક વિભાગીય કાર્યવાહી કરવામાં આવી છે. તેમણે ઉમેર્યું હતું કે તપાસ રિપોર્ટ આવ્યા પછી રેલ્વે નિયમો અનુસાર આગળની કાર્યવાહી કરવામાં આવશે. અહેવાલો અનુસાર, ટ્રેન નંબર 20808 હીરાકુડ એક્સપ્રેસને આગ્રા કેન્ટ સ્ટેશન પર રોકવામાં આવી ત્યારે એક મુસાફર ઘાયલ થયો છે એવી સૂચના મળી હતી. કહેવામાં આવે છે કે આવી પરિસ્થિતિના પ્રતિભાવમાં, ડેપ્યુટી સ્ટેશન સુપરિન્ટેન્ડેન્ટે ટ્રેનને થોડા સમય માટે રોકવાનો નિર્ણય લીધો. આનાથી ડેપ્યુટી સ્ટેશન સુપરિન્ટેન્ડેન્ટ અને RPF કર્મચારીઓ વચ્ચે દલીલ શરૂ થઈ. પ્રત્યક્ષદર્શીઓના જણાવ્યા અનુસાર, થોડીવારમાં જ દલીલ એટલી બધી વધી ગઈ કે જેના કારણે ડેપ્યુટી સ્ટેશન સુપરિન્ટેન્ડેન્ટ અને RPF કર્મચારીઓ વચ્ચે મારામારી શરુ થઇ ગઈ. એવો આરોપ છે કે આ દરમિયાન ડેપ્યુટી સ્ટેશન સુપરિન્ટેન્ડેન્ટ પર હુમલો પણ કરવામાં આવ્યો હતો.
આખી ઘટના દરમિયાન ત્યાં હાજર લોકોએ તેનો વીડિયો બનાવી લીધો હતો, જેની તસવીરો હવે સામે આવી છે. તસવીરોમાં કેટલાક RPF કર્મચારીઓ ડેપ્યુટી સ્ટેશન સુપરિન્ટેન્ડેન્ટને પ્લેટફોર્મ પર ખેંચી જતા દેખાય છે, જ્યારે રેલવે કર્મચારીઓ અને મુસાફરો નજીકમાં હતા. કેટલાક લોકો દરમિયાનગીરી કરવાનો પ્રયાસ કરતા પણ જોવા મળે છે.
આ કેસમાં આરોપો એક પક્ષ પૂરતા મર્યાદિત નથી. જ્યારે ડેપ્યુટી સ્ટેશન સુપરિન્ટેન્ડેન્ટ પર હુમલો કરવાનો આરોપ મૂકવામાં આવ્યો છે, ત્યારે RPF કોન્સ્ટેબલ જીતેન્દ્રએ પણ ડેપ્યુટી સ્ટેશન સુપરિન્ટેન્ડેન્ટ પર હુમલો કરવાનો આરોપ લગાવ્યો છે. બંને પક્ષો એકબીજા પર હુમલો કરવાનો આરોપ લગાવી રહ્યા છે. આ કારણોસર, રેલ્વે વહીવટીતંત્રે નિષ્પક્ષ તપાસ કરવાનો નિર્ણય લીધો છે.
આ ઘટના પછી, પ્રાથમિક તારણોના આધારે, રેલવે પ્રશાસને 4 RPF કર્મચારીઓને તાત્કાલિક અસરથી સસ્પેન્ડ કર્યા છે. સસ્પેન્ડ કરાયેલા કર્મચારીઓમાં ASI મેઘરાજ મીણા, ASI બાલ્કિશન, કોન્સ્ટેબલ જીતેન્દ્ર અને કોન્સ્ટેબલ બદન સિંહનો સમાવેશ થાય છે. રેલવે જણાવે છે કે, આ કાર્યવાહી પ્રાથમિક તપાસના આધારે કરવામાં આવી હતી. અંતિમ તપાસ રિપોર્ટ આવ્યા પછી વધુ વિભાગીય અને જરૂરી કાનૂની કાર્યવાહી કરવામાં આવશે.
રેલવે પ્રશાસને સમગ્ર મામલાની નિષ્પક્ષ તપાસ કરવા માટે 3 સભ્યોની સમિતિની રચના કરી છે. સમિતિમાં ASC આગ્રા કેન્ટ, સ્ટેશન ડિરેક્ટર આગ્રા કેન્ટ અને AOM આગ્રાનો સમાવેશ થાય છે. તપાસ સમિતિ CCTV ફૂટેજ, વીડિયો, પ્રત્યક્ષદર્શીઓના નિવેદનો અને બંને પક્ષોના દાવાઓના આધારે રિપોર્ટ તૈયાર કરશે. આ રિપોર્ટમાં સ્પષ્ટ કરવામાં આવશે કે વિવાદ કેવી રીતે શરૂ થયો અને હિંસા માટે કોણ જવાબદાર હતું. આગ્રા કેન્ટ ઉત્તર ભારતના સૌથી વ્યસ્ત રેલ્વે સ્ટેશનોમાંનું એક છે. આવા સ્ટેશન પર બે રેલ્વે વિભાગો વચ્ચે ખુલ્લા વિવાદથી મુસાફરો પણ આશ્ચર્યચકિત થઈ ગયા. ઘટના દરમિયાન, સ્ટેશન થોડા સમય માટે અરાજકતાની સ્થિતિમાં હતું, અને ઘટનાસ્થળે મોટી સંખ્યામાં લોકો એકઠા થઈ ગયા હતા. રેલવે અધિકારીઓ માને છે કે, મુસાફરોની સલામતી અને ટ્રેન સંચાલન જેવા સંવેદનશીલ કાર્યોમાં સામેલ વિભાગો વચ્ચે વધુ સારું સંકલન જરૂરી છે. આવા વિવાદો માત્ર રેલવેની છબીને જ અસર કરતા નથી, પરંતુ મુસાફરોને નકારાત્મક સંદેશ પણ આપે છે. બધાની નજર હાલમાં તપાસ સમિતિના રિપોર્ટ પર છે. રિપોર્ટ આવ્યા પછી ખુલાસો થશે કે ટ્રેન નંબર 20808 હીરાકુડ એક્સપ્રેસના સ્ટોપ દરમિયાન થયેલી હિંસક ઝઘડાનું કારણ શું હતું અને સમગ્ર ઘટના માટે કોણ જવાબદાર હતું.
