પટના મ્યુનિસિપલ કોર્પોરેશને શહેરને સુંદર અને સ્વચ્છ બનાવવાની દિશામાં મહત્ત્વપૂર્ણ અને કડક પગલાં લીધા છે. હવે પાન, ગુટખા અથવા અન્ય તમાકુ ઉત્પાદનો ખાધા પછી જાહેરમાં થૂંકનારાઓ સામે હવે અસરકારક કાર્યવાહી કરવામાં આવશે. આવા વ્યક્તિઓને 500નો દંડ કરવામાં આવશે અને તેમની તસવીરો સમગ્ર શહેરમાં સ્થાપિત વેરિયેબલ મેસેજ ડિસ્પ્લે (VMD) સ્ક્રીન પર પ્રસારિત કરવામાં આવશે. આવા વ્યક્તિઓને ‘નગરશત્રુ’ની શ્રેણીમાં રાખવામાં આવશે.
પટના સ્માર્ટ સિટી લિમિટેડના મ્યુનિસિપલ કમિશનર અને મેનેજિંગ ડિરેક્ટર યશપાલ મીણાના નિર્દેશ પર આ ખાસ ઝુંબેશ શરૂ કરવામાં આવી રહી છે. મ્યુનિસિપલ કોર્પોરેશનના જણાવ્યા અનુસાર, ખુલ્લામાં થૂંકવાની પ્રવૃત્તિથી ન માત્ર શહેરની સ્વચ્છતા અને સુંદરતા પ્રભાવિત થાય છે, પરંતુ જનસ્વસ્થ્ય માટે પણ ગંભીર જોખમી બની શકે છે. ચોક-ચારરસતા, ફ્લાઈઓવર, રસ્તાઓ અને જાહેર સ્થળો પર થૂંકવાથી ઘણા સ્થળો ‘રેડ સ્પોટ’ બનવાની કગાર પર છે, જેને રોકવા માટે કડકાઇ જરૂરી છે.
શહેરમાં 415 સ્થળોએ સ્થાપિત આશરે 3,300 CCTV કેમેરા ઇન્ટિગ્રેટેડ કમાન્ડ એન્ડ કંટ્રોલ સેન્ટર (ICCC) સાથે જોડાયેલા છે. આ કેમેરા સમગ્ર શહેરનું સતત નિરીક્ષણ કરે છે. મ્યુનિસિપલ કમિશનરે ICCCને ખુલ્લામાં થૂંકનારા અથવા જાહેર સ્થળોએ કચરો ફેંકનારાઓને ઓળખવા અને તેમના ફોટોગ્રાફ્સ VMD સ્ક્રીન પર પ્રદર્શિત કરવા નિર્દેશ આપ્યો છે.
સાથે જ ખુલ્લામાં પેશાબ કરનારાઓ સામે શિક્ષાત્મક કાર્યવાહી પણ કરવામાં આવશે. મ્યુનિસિપલ એન્ફોર્સમેન્ટ ટીમોને સ્થળ પર જ દંડ વસૂલવાની સૂચના આપવામાં આવી છે.
આ ઝુંબેશ હેઠળ, મલ્ટી-મોડલ હબથી પટના જંક્શનને જોડતા ભૂગર્ભ સબવેમાં ખુલ્લામાં થૂંકવા બદલ આશરે 250 લોકોને દંડ ફટકારવામાં આવ્યો છે. મ્યુનિસિપલ કોર્પોરેશનનું માનવું છે કે આ પહેલ ન માત્ર શહેરની સ્વચ્છતામાં સુધારો લાવશે, પરંતુ સ્વચ્છ સર્વેક્ષણમાં પટનાનું રેન્કિંગ સુધારવામાં પણ ફાળો આપશે.
મ્યુનિસિપલ કોર્પોરેશને જનતાને સહકાર માટે પણ અપીલ કરી છે. જો કોઈ જાહેર સ્થળે કચરો નાખતું જોવા મળે, તો તેમને તાત્કાલિક ટોલ-ફ્રી નંબર 155304 પર જાણ કરવા વિનંતી કરવામાં આવી છે. કોર્પોરેશનનું કહેવું છે કે, જનસહયોગથી જ સ્વચ્છ, સુંદર અને સ્વસ્થ પટનાનું નિર્માણ શક્ય છે.
