જો તમે અવારનવાર રાષ્ટ્રીય ધોરીમાર્ગો પર મુસાફરી કરો છો અને વાર્ષિક ટોલ પાસ બનાવી રાખ્યો છે, તો તમારે હવે 1 એપ્રિલથી આ પાસ માટે વધુ રકમ ચૂકવવી પડશે. હવે રાષ્ટ્રીય ધોરીમાર્ગો પર મુસાફરી વધુ મોંઘી થવા જઇ રહી છે. ખાસ કરીને, રાષ્ટ્રીય ધોરીમાર્ગો માટે ઉપલબ્ધ વાર્ષિક ટોલ પાસ એપ્રિલ 2026થી વધુ મોંઘો થવા જઈ રહ્યો છે. નેશનલ હાઇવે ઓથોરિટી ઓફ ઈન્ડિયા (NHAI)એ વાર્ષિક ટોલ પાસની કિંમતમાં વધારો કર્યો છે.
અગાઉ આ પાસ માટે વાહન ચાલકોએ 3000 રૂપિયા ચૂકવા હતા. નેશનલ હાઇવે ઓથોરિટી ઓફ ઈન્ડિયા (NHAI) અનુસાર, હવે 1 એપ્રિલ 2026 થી વાહનચાલકોએ આ પાસ માટે 3,000 રૂપિયાને બદલે 3,075 રૂપિયા ચૂકવવા પડશે. આ નવો દર નાણાકીય વર્ષ 2026-27 માટે લાગૂ થશે. આ પાસ ખાનગી (નોન-કોમર્શિયલ) વાહનો માટે હોય છે, જેમાં માન્ય અને ચાલુ FASTag લાગેલો હોય છે. વાર્ષિક ટોલ પાસ માટેનો નવો દર નાણાકીય વર્ષ 2026-27 માટે અમલમાં રહેશે.
200 ટોલ ક્રોસિંગ અથવા 1 વર્ષ માટે માન્ય રહેશે
નવા નિયમો અનુસાર, 3,075 રૂપિયાનો આ પાસ એક વર્ષ માટે અથવા 200 ટોલ ક્રોસિંગ સુધી માન્ય રહેશે. તેમાંથી જે પણ પહેલા પૂર્ણ થશે એટલે કે જો 200 ટોલ ક્રોસિંગની મર્યાદા પૂર્ણ થઈ જાય, તો પાસની માન્યતા સમાપ્ત થઈ જશે, ભલે એક વર્ષનો સમયગાળો હજુ પૂરો ન થયો હોય.
NHAIએ ટોલ પ્લાઝા અને સંબંધિત અધિકારીઓને આપ્યો નિર્દેશ
નેશનલ હાઇવે ઓથોરિટી ઓફ ઇન્ડિયા (NHAI)એ તમામ ટોલ પ્લાઝા અને સંબંધિત અધિકારીઓને 1 એપ્રિલ, 2026 થી નવા દરો લાગૂ કરવા અને મુસાફરો અને અન્ય હિતધારકોને આ જાણકારી આપવાના નિર્દેશ આપ્યો છે. સરકાર અનુસાર, ટોલ દરોની વાર્ષિક સમીક્ષા અને સુધારણા કરવામાં આવે છે. આ પ્રક્રિયા અનુસાર, આ વર્ષે વાર્ષિક પાસની કિંમતમાં નજીવો વધારો કરવામાં આવ્યો છે.
14.jpg)
