શું અદાણી ગ્રુપ મુંબઈ એરપોર્ટ પરથી 14 આંતરરાષ્ટ્રીય ફ્લાઇટ્સ બંધ કરશે? 11 વિદેશી એરલાઇન્સે સરકારને પૂછ્યું- તમે મંજૂરી આપી છે?

મુંબઈ એરપોર્ટ પરથી 14 આંતરરાષ્ટ્રીય શહેરોની ફ્લાઇટ્સ અસ્થાયી રૂપે બંધ કરવાની યોજના અંગે વિદેશી એરલાઇન્સે કેન્દ્ર સરકાર પાસેથી જવાબ માંગ્યો છે. અદાણી ગ્રુપ દ્વારા સંચાલિત મુંબઈ એરપોર્ટના ટર્મિનલ 2 (T2) પરથી આ 14 આંતરરાષ્ટ્રીય શહેરોની ફ્લાઇટ્સ અસ્થાયી રૂપે બંધ કરવાનો પ્રસ્તાવ સામે આવ્યો છે. વિદેશી એરલાઇન્સે નાગરિક ઉડ્ડયન મંત્રાલય (MoCA)ને પૂછ્યું છે કે શું કેન્દ્ર સરકારે આ દરખાસ્તને મંજૂરી આપી છે.

એરલાઇન ઓપરેટર્સ કમિટી (AOC)-મુંબઈએ નાગરિક ઉડ્ડયન મંત્રાલયના સચિવ સમીર સિંહાને પત્ર લખીને પોતાની ચિંતા વ્યક્ત કરી છે. સમિતિએ જણાવ્યું છે કે, મુંબઈ ઇન્ટરનેશનલ એરપોર્ટ લિમિટેડ (MIAL)એ 11 ગલ્ફ દેશોની એરલાઇન્સને અગાઉ નિર્ધારિત ફ્લાઇટ સ્લોટ ફાળવવાનો ઇનકાર કર્યો છે.

આની પાછળ એવું કારણ જણાવવામાં આવ્યું છે કે, એરપોર્ટની ક્ષમતામાં વાર્ષિક 50 લાખ મુસાફરોનો પ્રસ્તાવિત ઘટાડો. આ ફેરફાર માર્ચના છેલ્લા અઠવાડિયાથી શરૂ થતા ઉત્તરીય સમર શેડ્યૂલ 2017થી લાગુ કરવાની યોજના છે.

મુંબઈ એરપોર્ટના આ નિર્ણયથી 11 વિદેશી એરલાઈન્સને અસર થઈ શકે છે. આમાં ગલ્ફ એર, રિયાધ એર, એર અરેબિયા, કુવૈત એરવેઝ, ઓમાન એર, ફ્લાયઅડેલ, સાઉદીયા, કતાર એરવેઝ, જઝીરા એરવેઝ, સલામએર અને ફ્લાયનાસનો સમાવેશ થાય છે.

એરલાઈન ઓપરેટર્સ કમિટીએ આ મામલે કેન્દ્ર સરકારના હસ્તક્ષેપની વિનંતી કરી છે. કમિટી ઇચ્છે છે કે સરકાર મુંબઈ ઈન્ટરનેશનલ એરપોર્ટ લિમિટેડને તેના નિર્ણય પર પુનર્વિચાર કરવા અને અગાઉ સોંપાયેલા તમામ ફ્લાઇટ સ્લોટ તમામ અસરગ્રસ્ત એરલાઈન્સને પરત કરવા સલાહ આપે.

સમિતિએ જણાવ્યું છે કે આ બાબતે નાગરિક ઉડ્ડયન મંત્રાલયના 2013ના સ્લોટ નિયમો અને વિશ્વભરમાં એરપોર્ટ સ્લોટ ફાળવણી માટે ઇન્ટરનેશનલ એર ટ્રાન્સપોર્ટ એસોસિએશન (IATA) માર્ગદર્શિકાનું પાલન કરવું જોઈએ.

એરલાઈન ઓપરેટર્સ કમિટીએ મુંબઈ એરપોર્ટ પર ટર્મિનલ 1Bના પુનઃવિકાસ અને સુધારણાની યોજનાને ટેકો આપ્યો છે. જોકે, સમિતિએ જણાવ્યું હતું કે, એરપોર્ટ ક્ષમતા ઘટાડવાનો કોઈપણ નિર્ણય લેતા પહેલા તમામ હિસ્સેદારો સાથે ચર્ચા કરવી જોઈએ.

સમિતિએ પારદર્શિતા અને નિયમોનું પાલન કરવા પર પણ ભાર મૂક્યો હતો. તેમાં કહેવામાં આવ્યું હતું કે, એરપોર્ટ ક્ષમતા ઘટાડવાના નિર્ણયોથી એરલાઈન્સના સુનિશ્ચિત કામગીરી અને તેમના હાલના ફ્લાઇટ સ્લોટ પર પ્રતિકૂળ અસર થવી જોઈએ નહીં.

અત્રે ઉલ્લેખનીય છે કે, એરલાઇન ઓપરેટર્સ કમિટીએ અગાઉ મુંબઈ એરપોર્ટ એડમિનિસ્ટ્રેશનના ટર્મિનલ 2 ક્ષમતા ઘટાડવાના એકપક્ષીય નિર્ણય સામે કેન્દ્ર સરકારના હસ્તક્ષેપની માંગ કરી હતી. ટર્મિનલ 1B પરથી મુસાફરોને ખાલી કરાવવાના દબાણને દૂર કરવા માટે આ નિર્ણય લેવામાં આવી રહ્યો હતો.

છત્રપતિ શિવાજી મહારાજ આંતરરાષ્ટ્રીય એરપોર્ટ (CSMIA)થી નવી મુંબઈ આંતરરાષ્ટ્રીય એરપોર્ટ (NMIA)માં આંતરરાષ્ટ્રીય ફ્લાઇટ્સને ક્રમબદ્ધ રીતે સ્થાનાંતરિત કરવાની યોજના વચ્ચે આ વિવાદ ઉભો થયો છે.

ભારતીય એરલાઇન્સ દ્વારા તેમની પ્રસ્તાવિત યોજનાઓમાં ફ્લાઇટ્સ સ્થાનાંતરિત કરવા માટે વિચારણા હેઠળના 14 આંતરરાષ્ટ્રીય સ્થળોની ઓળખ પહેલાથી જ કરવામાં આવી હતી. આમાં દમ્મામ, રિયાધ, મસ્કત, મદીના, જકાર્તા, જેદ્દાહ, ઢાકા, દોહા, બહેરીન, કાઠમંડુ, કુવૈત, રાસ અલ ખૈમાહ, શારજાહ અને ફુજૈરાહનો સમાવેશ થાય છે.

આ સ્થળોએ આવતી-જતી ફ્લાઇટ્સને નવા એરપોર્ટ પર સ્થાનાંતરિત કરવાની યોજના છે. જો કે, આ ફેરફારથી વિદેશી એરલાઇન્સમાં ચિંતા વધી છે.

મુંબઈ ઇન્ટરનેશનલ એરપોર્ટ લિમિટેડ (MIAL)એ 30 ઓક્ટોબરના રોજ નાગરિક ઉડ્ડયન મંત્રાલયને એક E-mail મોકલ્યો હતો, જેમાં તેની યોજનાઓ અને ક્ષમતા ઘટાડવાના નિર્ણય પાછળનું કારણ જણાવવામાં આવ્યું હતું.

MIAL જણાવે છે કે છત્રપતિ શિવાજી મહારાજ આંતરરાષ્ટ્રીય એરપોર્ટ પરથી આ 14 સ્થળોએ ફ્લાઇટ્સ ખસેડવાથી મુસાફરોને સુવિધા મળશે. આનાથી બધી ફ્લાઇટ્સ બે અલગ અલગ એરપોર્ટ વચ્ચે વિભાજિત થવાને બદલે એક જ એરપોર્ટ પરથી ઓપરેટ થઈ શકશે.

કંપનીના જણાવ્યા મુજબ, આનાથી મુસાફરોને થતી અસુવિધા ઓછી થશે અને આગળની મુસાફરી સરળ બનશે.

હાલમાં, વિદેશી એરલાઇન્સે માંગ કરી છે કે કેન્દ્ર સરકાર પરિસ્થિતિ સ્પષ્ટ કરે અને હસ્તક્ષેપ કરે. આ દરખાસ્ત પર સરકાર શું વલણ અપનાવે છે અને શું અસરગ્રસ્ત એરલાઇન્સ તેમના જૂના ફ્લાઇટ સ્લોટ પાછા મેળવી શકશે કે નહીં તે જોવાનું બાકી છે.