પ્રયાગરાજ માઘ મેળામાં મૌની અમાસના મુખ્ય સ્નાન પર્વ દરમિયાન સંગમ તટ પર થયેલા હંગામા બાદ શંકરાચાર્ય સ્વામી અવિમુક્તેશ્વરાનંદ સરસ્વતીએ વહીવટીતંત્ર સામે મોરચો માંડ્યો છે. પોલીસ દ્વારા રોકવામાં આવ્યા બાદ આકરા પ્રહારો કરતા શંકરાચાર્યએ પૂછ્યું કે, શું કોઈ બાળકને તેની માતાને મળવા માટે પરવાનગી લેવી પડે?
શું હતી સમગ્ર ઘટના?
રવિવારે સવારે આશરે 9 વાગ્યે શંકરાચાર્ય સ્વામી અવિમુક્તેશ્વરાનંદ 200 જેટલા અનુયાયીઓ, રથ અને પાલખી સાથે સંગમ નોઝ પહોંચ્યા હતા. જોકે, પ્રશાસને અતિશય ભીડનું કારણ આપી તેમને રથ પરથી ઉતરીને પગપાળા જવા જણાવ્યું હતું. આ દરમિયાન સમર્થકો અને પોલીસ વચ્ચે તીખી ઝપાઝપી અને ધક્કામુક્કી થઈ હતી. પોલીસની આ કાર્યવાહીથી નારાજ થઈને શંકરાચાર્ય ત્યાં જ ધરણા પર બેસી ગયા હતા અને સંગમ સ્નાન કર્યા વગર જ પરત ફર્યા હતા.
સોમવારે એક પત્રકાર પરિષદને સંબોધતા શંકરાચાર્યએ વહીવટીતંત્ર પર ગંભીર આક્ષેપો કર્યા હતા:
શંકરાચાર્ય અવિમુક્તેશ્વરાનંદે કહ્યું કે અમે ગંગા સ્નાન માટે પરમિશન નહીં લઈએ. વહીવટીતંત્રએ કાવતરું ઘડીને અમને સમર્થકોથી દૂર કરવાનો પ્રયાસ કર્યો છે. સત્ય બોલનારા સંતો સાથે ભેદભાવ કરવામાં આવી રહ્યો છે.
બીજી તરફ, પ્રયાગરાજ પોલીસ કમિશનર જોગિન્દર કુમારે જણાવ્યું હતું કે, તે સમયે સંગમ પર લાખોની સંખ્યામાં શ્રદ્ધાળુઓ હાજર હતા. સુરક્ષાના કારણોસર VVIP સ્નાન પર પ્રતિબંધ હતો, તેથી સ્વામીજીને માત્ર પગપાળા જવા વિનંતી કરવામાં આવી હતી.
બેરિકેડ તોડવાના આરોપ પર શંકરાચાર્યએ પડકાર ફેંક્યો છે કે વહીવટીતંત્ર CCTV ફૂટેજ જાહેર કરે, જેથી સત્ય બહાર આવે કે બેરિકેડ કોણે ખોલાવ્યા હતા.
આ ઘટના બાદ માઘ મેળામાં આવેલા સાધુ-સંતો અને શ્રદ્ધાળુઓમાં ભારે રોષ જોવા મળી રહ્યો છે. શંકરાચાર્યએ મેળા પ્રશાસનને તાત્કાલિક બદલવાની માંગ કરી છે. હાલમાં આ વિવાદ સમગ્ર મેળા વિસ્તારમાં ચર્ચાનો વિષય બન્યો છે.
