ગુજરાતમાં જાણીતી મહિલા કલાકારોના આંતરજ્ઞાતીય લગ્નોને લઈને વિવાદોનો સિલસિલો યથાવત્ જોવા મળી રહ્યો છે. અગાઉ કિંજલ દવે અને આરતી સાંગાણીના આંતરજ્ઞાતીય લગ્નને કારણે વિવાદ સર્જાયો હતો. ત્યારબાદ હવે રાધનપુરની લોકગાયિકા કિંજલ રબારીના પ્રેમ લગ્નને લઈને ભારે વિવાદ સર્જાયો છે.
પ્રેમ લગ્ન બાદ સિંગરે સોશિયલ મીડિયા પર એક વીડિયો શેર કર્યો છે. જેમાં ગાયિકાએ અન્ય સમાજના યુવક સાથે લગ્ન કરી સોશિયલ મીડિયા પર પોતાની અને પતિની સુરક્ષાને લઈને ચિંતા વ્યક્ત કરી છે. 56 સેકન્ડના વીડિયોમાં સિંગર કિંજલ રબારીએ જણાવ્યું કે, ‘મેં ચૌધરી અશોકકુમાર સાથે લગ્ન કર્યાં છે. પરિવારને મનાવવાના મેં ઘણા પ્રયત્નો કર્યાં હતા, પરંતુ તેઓ મારા લગ્નના વિરોધમાં હતા, એટલે ગઈકાલે મેં મારા પતિને જાણ કરતા તેઓ મને આવીને લઈ ગયા હતા. સોશિયલ મીડિયામાં મારા પતિને બદનામ કરવામાં આવી રહ્યા છે.’
તેણે વધુમાં જણાવ્યું કે, હું રબારી સમાજને કહેવા માગુ છું કે, ‘મેં મારી મરજીથી લગ્ન કર્યાં છે, પરંતુ મને હાલમાં બદનામ કરવામાં આવી રહી છે જે ખોટું છે. મારા તેમજ મારા પતિના જીવનું જોખમ છે જેથી મેં એડવોકેટનો સંપર્ક કરીને પોલીસ પ્રોટેક્શનની માંગણી કરી છે. મારા લગ્નને લઈને કોઈપણ અફવા ફેલાવવી નહીં. મને અથવા મારા પતિને કોઈપણ નુકસાન પહોંચ્યું તો એના માટે મારો પરિવાર જવાબદાર રહેશે.
https://www.instagram.com/reel/DVxSyx2CPac/?utm_source=ig_web_copy_link&igsh=MzRlODBiNWFlZA==
દિવ્યભાસ્કરના અહેવાલ મુજબ, સિંગર કિંજલ રબારી રાધનપુરના નાનકડા સિનાડ ગામની છે તેણે ધો-1થી 8 સુધી ગામની સરકારી પ્રાથમિક શાળામાં અભ્યાસ કર્યો હતો. આજ શાળામાં ભણતા તેના મોટાભાઈ કિરણ રબારી શાળામાં ભજન ગાતા હતા. ત્યારે કિંજલે પણ શાળામાં ભજન ગાવાની ઇચ્છા દર્શાવતા તેના મોટાભાઈએ શિવજીનું ભજન ગાવા માટે આપ્યું હતું હતું.
ત્યારબાદ તેની ગીત સંગીતમાં રુચિ જાગી. ત્યારબાદ શાળાના શિક્ષકોએ પણ વિદ્યાર્થિનીને પ્રોત્સાહન આપ્યું હતું. શાળામાં કિંજલ સહિત 2-3 બાળ કલાકાર દરરોજ પ્રાર્થના કે ગીત સંગીતની સ્પર્ધામાં જરૂર સહભાગી બનતી હતી. તેનું મનોબળ વધે તે માટે શાળાના આચાર્ય તેજાભાઈ જાદવે શાળામાં સાઉન્ડ સિસ્ટમ વસાવ્યું હતું અને કિંજલ સહિતના વિદ્યાર્થીઓને સાઉન્ડ સિસ્ટમના માધ્યમથી માઈક પર ગાવાનો અનુભવ મળ્યો અને ધીમે-ધીમે ઉતાર-ચડાવ બાદ કિંજલ રબારી ગુજરાતની ફેમસ લોક કલાકાર બની ગઈ.
રાધનપુર તાલુકાના નાનકડા સિનાડ ગામની સરકારી પ્રાથમિક શાળાએ ગુજરાતને કોયલ કંઠી સિંગર આપી છે. કિંજલ રબારીએ ‘દેશી લગ્ન ગીતો’, ‘લોકગીતો’, માતાજીના અનેક ગીતો ગાયા છે. કલાકારની કારકિર્દીમાં તેની ગામની સરકારી પ્રાથમિક શાળાની મહત્ત્વની ભૂમિકા રહી છે.
