દેશના રાજકીય પરિદૃશ્યમાં ફરી એકવાર ચૂંટણીનો મોટો જંગ શરૂ થયો છે. ચૂંટણી પંચે 4 રાજ્યો- પશ્ચિમ બંગાળ, તમિલનાડુ, આસામ અને કેરલમ અને એક કેન્દ્રશાસિત પ્રદેશ પુડુચેરીમાં યોજાનારી વિધાનસભા ચૂંટણીઓની તારીખો જાહેર કરી દીધી છે. આ સાથે, આ રાજ્યોમાં આદર્શ આચારસંહિતા લાગૂ થઈ ગઈ છે.
રાજકીય પક્ષો હાલમાં તેમની ચૂંટણી રણનીતિને અંતિમ સ્વરૂપ આપી રહ્યા છે. જોકે, હવે સૌથી મોટો સવાલ એ છે કે, પશ્ચિમ બંગાળ, તમિલનાડુ, આસામ અને કેરળમાં કોણ સરકાર બનાવશે અને જનતાનો મૂડ કેવો છે? આ જાણવા માટે, MATRIZE-IANSએ આ 4 રાજ્યોમાં ઓપિનિયન પોલ કર્યા હતા અને જાણ્યું કે, પશ્ચિમ બંગાળ, આસામ, તમિલનાડુ અને કેરળમાં કઈ પાર્ટીનું પલડું ભારે છે.
પશ્ચિમ બંગાળ ચૂંટણી પર ઓપિનિયન પોલ
MATRIZE-IANS ઓપિનિયન પોલ મુજબ, પશ્ચિમ બંગાળ વિધાનસભાની 2026ની ચૂંટણીમાં TMC સત્તામાં પાછી ફરી શકે છે. પશ્ચિમ બંગાળમાં સતત ચોથી વખત TMC બહુમતી મળવાનો અંદાજ છે. મેટ્રિઝ-IANSના મતદાન મુજબ, આગામી પશ્ચિમ બંગાળ વિધાનસભા ચૂંટણીમાં TMCને 155-170 બેઠકો, ભાજપને 100 થી 115 બેઠકો, AIMIMને 5-6 બેઠકો અને અન્યને 0-1 બેઠકો મળવાનો અંદાજ છે.
આસામ ચૂંટણી પર ઓપિનિયન પોલ
આગામી આસામ વિધાનસભા ચૂંટણી પર મેટ્રિઝ-INSના ઓપિનિયન પોલ મુજબ, ભાજપ રાજ્યમાં જંગી જીત હાંસલ કરે તેવી શક્યતા છે. આસામમાં ભાજપને 96-98 બેઠકો, કોંગ્રેસને 26-28 બેઠકો, AIUDFને 1-5 બેઠકો અને અન્યને 1-3 બેઠકો મળવાનો અંદાજ છે. આ ચૂંટણીમાં ભાજપની સરખામણીમાં કોંગ્રેસ અને AIUDFને નુકસાન થાય તેવું લાગી રહ્યું છે.
તમિલનાડુ ચૂંટણી પર ઓપિનિયન પોલ
મેટ્રિઝ-IANS ઓપિનિયન પોલ મુજબ, તમિલનાડુ વિધાનસભા ચૂંટણી 2026માં NDAનું પલડું ભારે રહેવાનો અંદાજ છે. AIDMK અને ભાજપના ગઠબંધનવાળું NDA બહુમતી મેળવે તેવી શક્યતા છે. ઓપિનિયન પોલ મુજબ, NDAને 114-127 બેઠકો, DMK 104-114 બેઠકો અને TVK 6-12 બેઠકો મળી શકે છે.
કેરળ ચૂંટણીઓ પર ઓપિનિયન પોલ
આગામી કેરળ વિધાનસભાની ચૂંટણી અંગે MATRIZE-IANSના ઓપિનિયન પોલ મુજબ, LDF અને UDF વચ્ચે કાંટાની ટક્કર જોવા મળી શકે છે. 140 બેઠકોવાળી કેરળ વિધાનસભામાં LDFને 61-71 બેઠકો, UDFને 58-69 બેઠકો અને BJPને 2 બેઠકો મળવાનો અંદાજ છે.
