પાકિસ્તાનની રાષ્ટ્રીય હોકી ટીમના કેપ્ટન અમ્માદ શકીલ બટ્ટે ઓસ્ટ્રેલિયા પ્રવાસ દરમિયાન ટીમ સાથે થયેલા દુર્વ્યવહાર અને ખરાબ મેનેજમેન્ટ અંગે સનસનાટીભર્યા ખુલાસા કર્યા છે. લાહોર એરપોર્ટ પર મીડિયા સાથે વાત કરતા કેપ્ટને પાકિસ્તાન હોકી ફેડરેશન (PHF) પર માનસિક ત્રાસ આપવા અને ખેલાડીઓને મજૂરોની જેમ રાખવાના ગંભીર આરોપો લગાવ્યા છે. તેમના આરોપોથી પાકિસ્તાનમાં ખળભળાટ મચી ગયો છે.
કેપ્ટન અમ્માદ બટ્ટે ઓસ્ટ્રેલિયાના અહેવાલોની પુષ્ટિ કરી કે, ટીમને મૂળભૂત સુવિધાઓ પણ આપવામાં આવી નહોતી. તેણે જણાવ્યું હતું કે ખેલાડીઓને મેદાનમાં ઉતરતા પહેલા રસોડું સાફ કરવા, વાસણો ધોવા અને ટોઇલેટ પણ સાફ કરવા મજબૂર કરવામાં આવ્યા હતા. ટીમને કહેવામાં આવ્યું હતું કે, તેમણે માત્ર 115 ડોલર દૈનિક ભથ્થામાં દિવસમાં ત્રણ વખત ભોજનમાં મેનેજ કરવું પડશે. અમ્માદે કહ્યું કે મેનેજમેન્ટે ખેલાડીઓને માનસિક બીમાર બનાવી દીધા છે. તેણે તાહિર ઝમાં અને અન્ય અધિકારીઓના નિવેદનોને ખોટા ગણાવીને ફગાવી દીધા.
અમ્માદ બટ્ટે આરોપ લગાવ્યો કે PHFએ ટીમમાં ફૂટ પાડવાનો પ્રયાસ કર્યો છે. ખેલાડીઓને ખાનગીમાં બોલાવવામાં આવ્યા હતા અને પૂછવામાં આવ્યું હતું કે તેઓ કેપ્ટનની સાથે છે કે ફેડરેશન સાથે. જોકે, કેપ્ટને ગર્વથી કહ્યું હતું કે, આખી ટીમ તેની સાથે ઉભી છે. તેણે એવો પણ ખુલાસો કર્યો હતો કે તેને મીડિયા સાથે વાત ન કરવા કહેવામાં આવ્યું હતું, જેનો તેણે ઇનકાર કર્યો હતો.
પાકિસ્તાન સ્પોર્ટ્સ બોર્ડ (PSB)ના ડિરેક્ટર જનરલ નૂરીશ સબાહે એરપોર્ટ પર આ આરોપોની પુષ્ટિ કરી હતી. તેણે જણાવ્યું હતું કે PSBએ ઓસ્ટ્રેલિયામાં હોટેલ બુકિંગ માટે સંપૂર્ણ ચૂકવણી કરી હતી, પરંતુ PHFએ તે બુકિંગ રદ કરી દીધા હતા. ચૂકવણી ન થવાને કારણે, ખેલાડીઓએ કલાકો સુધી ઓસ્ટ્રેલિયાના રસ્તાઓ પર ભટકવું પડ્યું હતું. બાદમાં, સ્થાનિક પાકિસ્તાની સમુદાયની મદદથી રહેવાની વ્યવસ્થા કરવામાં આવી હતી. આ સમગ્ર મામલાનો વિગતવાર અહેવાલ વડાપ્રધાન શાહબાઝ શરીફને મોકલવામાં આવશે. વડાપ્રધાને આ નાણાકીય અને વહીવટી અનિયમિતતાને ધ્યાન લીધી છે અને સંપૂર્ણ તપાસનો આદેશ આપ્યો છે.
7.jpg)
