ઈરાનના સૈન્ય કમાન્ડ હેડક્વાર્ટર 'ખાતમ અલ-અંબિયા' (Khatam al-Anbiya) એ તેના વિરોધી દેશોને ગંભીર પરિણામોની ચેતવણી આપી છે. ઈરાને સ્પષ્ટ કર્યું છે કે હવે તે માત્ર હુમલાના જવાબમાં વળતો પ્રહાર કરવાને બદલે, તેના દુશ્મનો પર સતત હુમલા કરવાની રણનીતિ અપનાવશે.
અમેરિકા અને સાથી દેશોના ઓઈલ ટેન્કરો નિશાના પર
સૈન્ય કમાન્ડ હેડક્વાર્ટરના પ્રવક્તા ઈબ્રાહિમ ઝોલફાકારીએ એક નિવેદનમાં જણાવ્યું હતું કે, વોશિંગ્ટન હવે તેલના ભાવને નિયંત્રિત કરવામાં સક્ષમ રહેશે નહીં. તેમણે નીચે મુજબની આકરી ચેતવણીઓ આપી છે. ઝોલફાકારીએ જણાવ્યું કે, અમે અમેરિકા, ઈઝરાયલ અને તેમના ભાગીદાર દેશો સુધી એક લિટર તેલ પણ પહોંચવા દઈશું નહીં. તેમની તરફ જતું કોઈપણ જહાજ કે ઓઈલ ટેન્કર અમારા માટે કાયદેસરનું લક્ષ્ય (Legitimate target) ગણાશે અને તેના પર હુમલો કરવામાં આવશે.
તેમણે વધુમાં ઉમેર્યું કે, ઓઈલના ભાવ 200 ડોલર પ્રતિ બેરલ સુધી પહોંચવા માટે તૈયાર થઈ જાઓ, કારણ કે તેલની કિંમતો પ્રાદેશિક સુરક્ષા પર નિર્ભર છે, જેને તમે (પશ્ચિમી દેશોએ) અસ્થિર કરી દીધી છે.
રણનીતિમાં મોટો ફેરફાર
અત્યાર સુધી ઈરાન 'જેવા સાથે તેવા' (Reciprocal hits) ની નીતિ અપનાવતું હતું, એટલે કે કોઈ હુમલો થાય તો જ તેની સામે વળતી કાર્યવાહી કરતું હતું. પરંતુ હવે ઈરાને આક્રમક વલણ અપનાવીને 'સતત હુમલા' કરવાની જાહેરાત કરી છે.
વૈશ્વિક અર્થતંત્ર પર અસર
જો ઓઈલના ભાવ ખરેખર $200 ના સ્તરને સ્પર્શે, તો ભારત સહિત સમગ્ર વિશ્વમાં પેટ્રોલ-ડીઝલના ભાવમાં અસહ્ય વધારો થઈ શકે છે. સ્ટ્રેટ ઓફ હોર્મુઝ જેવા મહત્વના દરિયાઈ માર્ગો પર તણાવ વધવાથી વૈશ્વિક સપ્લાય ચેઈન ખોરવાઈ શકે છે.
6.jpg)
