કેનેડાના નવા વિદેશ મંત્રીએ ગીતા પર હાથ રાખીને લીધા શપથ, જાણો કોણ છે અનિતા આનંદ

કેનેડાના વડાપ્રધાન માર્ક કાર્નીએ મંત્રીમંડળમાં મોટો ફેરફાર કર્યો છે. તેમણે ભારતીય મૂળની અનિતા આનંદને વિદેશ મંત્રી તરીકે નિયુક્ત કર્યા છે. અનિતા ભૂતપૂર્વ વડાપ્રધાન જસ્ટિન ટ્રુડો સરકારમાં કેબિનેટ મંત્રી પણ રહી ચૂકી છે.

અનિતા આનંદે પવિત્ર હિન્દુ ગ્રંથ ગીતા પર હાથ રાખીને પદ અને ગોપનીયતાના શપથ લીધા. તેમણે કહ્યું કે કેનેડાના વિદેશ મંત્રી તરીકે પસંદગી પામીને હું સન્માનિત અનુભવું છું. હું વડાપ્રધાન માર્ક કાર્ની સાથે મળીને કામ કરવા અને વધુ સારી અને સુરક્ષિત દુનિયા બનાવવા માટે અમારી ટીમ સાથે કામ કરવા આતુર છું. 

તમને જણાવી દઈએ કે તેમને મેલોની જોલીના સ્થાને વિદેશ મંત્રી બનાવવામાં આવ્યા છે. જોલીને ઉદ્યોગ મંત્રી તરીકે નિયુક્ત કરવામાં આવ્યા છે. કાર્નીના મંત્રીમંડળના અડધા સભ્યો મહિલાઓ છે. પીએમ કાર્નીએ કહ્યું કે તેમનું મંત્રીમંડળ કેનેડાના લોકોની ઇચ્છાઓ અને જરૂરિયાતો અનુસાર ફેરફારો લાવવા માટે કામ કરશે.

અનિતાનો ભારત સાથે શું છે સંબંધ?

અનિતા આનંદ ભારતીય મૂળના છે. તેના પિતા તમિલનાડુના છે જ્યારે માતા પંજાબની છે. પરંતુ પાછળથી તેના માતા-પિતા કેનેડામાં જઈને સ્થાયી થયા. તેમણે ગીતા પર હાથ રાખીને વિદેશ મંત્રી તરીકે શપથ લીધા. 

તે ટ્રુડો સરકારમાં પરિવહન અને વેપાર મંત્રી પણ રહી ચૂકી છે. અનિતાનો જન્મ 1967માં નોવા સ્કોટીયામાં થયો હતો. તેના માતા-પિતા બંને ડોક્ટર છે. અનિતા ટોરોન્ટો યુનિવર્સિટીમાં લૉ ના પ્રોફેસર રહી ચૂકી છે. 

તેઓ પહેલી વાર 2019માં ઓકવિલેથી સાંસદ તરીકે ચૂંટાયા હતા. તેઓ 2021 થી 2023સુધી સંરક્ષણમંત્રી અને 2023 થી 2024 સુધી ટ્રેઝરી બોર્ડના પ્રમુખ તરીકે રહ્યા. 2025ની ચૂંટણીમાં તેમણે પોતાની બેઠક જાળવી રાખી અને માર્ક કાર્નીની લઘુમતી સરકારમાં કેબિનેટમંત્રી બન્યા. રાજકારણમાં જોડાતા પહેલા, તે વ્યવસાયે વકીલ અને પ્રોફેસર હતા. 

https://twitter.com/AnitaAnandMP/status/1922431310766727190

અનિતાએ વારંવાર પોતાના ભારતીય વારસાનો સ્વીકાર કર્યો છે. તેમણે પ્રવાસી ભારતીય દિવસ અને પ્રજાસત્તાક દિવસ જેવા પ્રસંગોએ ભારત સાથેના પોતાના સંબંધો પર પ્રકાશ પાડ્યો છે. કેનેડાના સંરક્ષણમંત્રી તરીકે, તેમણે ભારત-કેનેડા સંરક્ષણ સહયોગને મજબૂત બનાવવા માટે કામ કર્યું.

તમને જણાવી દઈએ કેમાર્ક કાર્નીના નેતૃત્વમાં   તાજેતરની સામાન્ય ચૂંટણીઓમાં લિબરલ પાર્ટીએ 343 માંથી 169 બેઠકો જીતી હતી. જોકે, લિબરલ પાર્ટી 172 બેઠકોની બહુમતીથી ત્રણ બેઠકો લાવી શકી નહોતી. પરંતુ આ છતાં પાર્ટીએ સરકાર બનાવી. કેનેડામાં લિબરલ પાર્ટીની આ ચોથી સરકાર છે.