ટ્રમ્પે પામ બીચ ઇન્ટરનેશનલ એરપોર્ટનું નામ પોતાના નામ પર કરી દીધું!

ડોનાલ્ડ ટ્રમ્પે 2025માં બીજી વખત યુનાઇટેડ સ્ટેટ્સના રાષ્ટ્રપતિ તરીકે શપથ લીધા હતા. ટ્રમ્પ એવા રાષ્ટ્રપતિ છે જેમણે સત્તામાં આવ્યા પછી, યુનાઇટેડ સ્ટેટ્સ અને સમગ્ર વિશ્વ માટે ઘણા આશ્ચર્યજનક નિર્ણયો લીધા છે. આમાં અમેરિકાને WHOમાંથી બહાર ખેંચવું, ભારત સહિત અનેક દેશો પર ભારે ટેરિફ લાદવું અને DOGE સ્થાપિત કરવું શામેલ છે. એટલું જ નહીં, ઇરાન સામે ટ્રમ્પના કડક પગલાંએ સમગ્ર વિશ્વને યુદ્ધમાં ધકેલી દીધું છે, જેના કારણે વૈશ્વિક ઇંધણ સંકટ સર્જાયું છે. પરંતુ હવે ટ્રમ્પને એક નવું કારનામું કરવાનું મન થયું છે, તેઓ પોતાના નામ પર એરપોર્ટની ઈચ્છા રાખે છે.

ફ્લોરિડાના પામ બીચ ઇન્ટરનેશનલ એરપોર્ટનું નામ ડોનાલ્ડ ટ્રમ્પ રાખવામાં આવશે. દક્ષિણ ફ્લોરિડા જનારા મુસાફરો ટૂંક સમયમાં US રાષ્ટ્રપતિના નામ પર રાખવામાં આવેલા એરપોર્ટ પર ઉતરશે. ફ્લોરિડાના ગવર્નર રોને ફેડરલ એવિએશન એડમિનિસ્ટ્રેશન (FAA)ની મંજૂરીને આધીન, પામ બીચ ઇન્ટરનેશનલ એરપોર્ટનું નામ 'ડોનાલ્ડ J. ટ્રમ્પ ઇન્ટરનેશનલ એરપોર્ટ' રાખવાના બિલ પર હસ્તાક્ષર પણ કરી દીધા છે. રાષ્ટ્રપતિના પુત્ર, એરિક ટ્રમ્પે X પર આની જાહેરાત કરી હતી, કે પામ બીચ ઇન્ટરનેશનલ એરપોર્ટનું નામ હવે સત્તાવાર રીતે બદલવામાં આવ્યું છે.

ડિસેમ્બર 2025માં દાખલ કરવામાં આવેલા અને જાન્યુઆરી 2026માં રજૂ કરાયેલા આ બિલમાં પામ બીચ ઇન્ટરનેશનલ એરપોર્ટનું નામ બદલીને 'ડોનાલ્ડ J. ટ્રમ્પ ઇન્ટરનેશનલ એરપોર્ટ' રાખવામાં આવશે. 30 માર્ચે હાઉસ બિલ 919 તરીકે મંજૂર કરાયેલ આ બિલ, ફ્લોરિડા રાજ્યને 1 જુલાઈથી વાણિજ્યિક સેવા એરપોર્ટના નામ આપવા માટે અધિકૃત કરે છે. બિલમાં એ પણ ફરજિયાત કરવામાં આવ્યું છે કે, નામ બદલાવ મંજૂર થયા પછી નકશા સહિત સત્તાવાર સરકારી રેકોર્ડમાં નવું નામ અપનાવવામાં આવે. એટલું જ નહીં, ટ્રમ્પ ઓર્ગેનાઇઝેશન દ્વારા એરપોર્ટનું નામ બદલવા માટે ટ્રેડમાર્ક અરજીઓ દાખલ કરવામાં આવી છે. અહેવાલો અનુસાર, ફ્લોરિડા સેનેટે શરૂઆતમાં નામ બદલવા સંબંધિત અપડેટ્સ માટે 2.75 મિલિયન ડૉલરની ભલામણ કરી હતી, જે અગાઉના 5.5 મિલિયન ડૉલરના પ્રસ્તાવથી ઓછી છે.

એરપોર્ટનું નામ બદલવાનો નિર્ણય જાન્યુઆરીમાં માર-એ-લાગોને જોડતા મુખ્ય રસ્તાના એક ભાગનું નામ બદલીને 'રાષ્ટ્રપતિ ડોનાલ્ડ J. ટ્રમ્પ બુલવર્ડ' કરવાના નિર્ણયને અનુસરીને લેવામાં આવ્યો છે. તે સમયે, ટ્રમ્પે આ નિર્ણય પર ખુશી વ્યક્ત કરતા કહ્યું કે, તેમને આ સન્માનથી સન્માનિત કરવામાં આવ્યા છે અને ફ્લોરિડા અને પામ બીચ વિસ્તાર પ્રત્યેનો તેમનો પ્રેમ વ્યક્ત કર્યો છે. તેમણે હજુ સુધી એરપોર્ટના નામ બદલવા અંગે જાહેરમાં કોઈ ટિપ્પણી કરી નથી, પરંતુ તેમના પુત્રએ ટ્વિટર પર એક પોસ્ટમાં આ નિર્ણય પર ગર્વ વ્યક્ત કર્યો છે.