એવરેસ્ટના મસાલા વાપરતા હોવ તો સાવધાન થઈ જજો, FSSAIએ આ પ્રોડક્ટ પર પ્રતિબંધ લગાવ્યો

જો તમે તમારા ખાવામાં સ્વાદ વધારવા માટે પેકેજ્ડ મસાલાનો ઉપયોગ કરો છો, તો આ સમાચાર તમારા માટે ઉપયોગી છે. ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI)એ લોકપ્રિય મસાલા બ્રાન્ડ એવરેસ્ટના કેટલાક ઉત્પાદનો સામે કડક કાર્યવાહી કરી છે. આ તપાસમાં હિંગનું ખોટું લેબલિંગ અને અન્ય ગુણવત્તાના મુદ્દાઓ બહાર આવ્યા છે.

આ ઉપરાંત, એવરેસ્ટના એગ કરી મસાલા, ચિકન મસાલા અને ગરમ મસાલા પણ ખાદ્ય સુરક્ષા નિયમોના ઉલ્લંઘનની વાત બહાર આવી છે. આ ઘટના પછી, ફૂડ રેગ્યુલેટરે સંબંધિત કંપનીને નોટિસ મોકલી આપી છે અને જવાબ માંગ્યો છે.

FSSAIની કાર્યવાહીમાં એવરેસ્ટની હિંગમાં કેટલીક અનિયમિતતાઓ જોવા મળી, જેમાં ખોટી બ્રાન્ડિંગ અને નબળી ગુણવત્તાનો સમાવેશ થાય છે. આ ઉપરાંત, આ મસાલાઓમાં પણ નિયમોનું ઉલ્લંઘન થતું જોવા મળ્યું છે, એગ કરી મસાલા, ચિકન મસાલા, ગરમ મસાલા અને આ ઉપરાંત લાલજી ગોધુ એન્ડ કંપનીને પણ કથિત ઉલ્લંઘનો માટે અલગ ચેતવણી આપવામાં આવી છે.

આ મામલો ત્યારે શરૂ થયો જ્યારે એક ગ્રાહકે હિંગની ચોક્કસ બ્રાન્ડની ગુણવત્તા અંગે ફરિયાદ નોંધાવી. આ પછી, FSSAIએ બજારમાં ઉપલબ્ધ તમામ મુખ્ય હિંગ બ્રાન્ડ્સની તપાસ શરૂ કરી.

પ્રારંભિક પ્રયોગશાળા અહેવાલોમાં જાણવા મળ્યું કે, એવરેસ્ટ અને લાલજી ગોધુ દ્વારા ઉત્પાદિત કમ્પાઉન્ડેડ હિંગ નિર્ધારિત ધોરણોને પૂર્ણ કરતી નથી. ત્યારપછી, મુંબઈમાં બંને કંપનીઓના કેન્દ્રીય લાઇસન્સ પ્રાપ્ત એકમોમાંથી નમૂનાઓ એકત્રિત કરવામાં આવ્યા હતા અને પરીક્ષણ માટે મોકલવામાં આવ્યા હતા. આ ઉપરાંત, ગુજરાત રાજ્ય ખાદ્ય વિભાગના સહયોગથી ગુજરાતના ઉમરગામમાં આવેલા અન્ય એવરેસ્ટ એકમમાં નમૂના લેવામાં આવ્યા હતા. આ બધા નમૂનાઓ નબળી ગુણવત્તાના હોવાનું જાણવા મળ્યું હતું.

નિયમો અનુસાર, કમ્પાઉન્ડેડ હિંગ કુદરતી હિંગ ગમ, સ્ટાર્ચ અને લોટ સાથે મિશ્રિત કરવામાં આવે છે, પરંતુ તેને ઓછામાં ઓછા 5 ટકા આલ્કોહોલ-દ્રાવ્ય અર્કની જરૂર પડે છે. તપાસમાં જાણવા મળ્યું કે આ કંપનીઓના ઉત્પાદનોમાં આ માત્રા માત્ર 0 થી 3 ટકા હતી, એટલે કે હિંગનું પ્રમાણ નિર્ધારિત માત્રા કરતા આશરે 30થી 40 ટકા ઓછું હતું.

આ કાર્યવાહી એવા સમયે કરવામાં આવી છે જ્યારે ફૂડ એન્ડ ડ્રગ એડમિનિસ્ટ્રેશન (FSSAI)એ પેકેજ્ડ ખોરાક માટે એક નવું ફ્રન્ટ-ઓફ-પેક ચેતવણી લેબલ પ્રસ્તાવિત કર્યું છે. પેકેજના આગળના ભાગમાં એક તેજસ્વી લાલ ષટ્કોણ ચિહ્ન મૂકવાની યોજના છે. આ પ્રતીક ગ્રાહકોને ખાંડ, મીઠું અથવા સંતૃપ્ત ચરબીવાળા ખાદ્ય ઉત્પાદનો વિશે માહિતી સરળતાથી ઉપલબ્ધ કરાવશે. આનો અર્થ એ છે કે કોઈપણ ઉત્પાદન ખરીદતી વખતે, ગ્રાહકો ફક્ત પેકેજિંગ જોઈને તેના પોષણ જોખમોને સરળતાથી સમજી શકશે.

ખાદ્ય ઉદ્યોગે પણ નવા લેબલિંગ નિયમો અંગે કેટલીક ચિંતાઓ વ્યક્ત કરી છે. કોકા-કોલા, નેસ્લે અને પેપ્સિકો જેવી મોટી કંપનીઓનું પ્રતિનિધિત્વ કરતા જૂથોએ પ્રસ્તાવિત સિસ્ટમના કેટલાક પાસાઓ સામે વાંધો ઉઠાવ્યો છે. આ દરમિયાન, મહારાષ્ટ્ર ફૂડ એન્ડ ડ્રગ એડમિનિસ્ટ્રેશન કમિશનર તુકારામ મુંધેએ ખાદ્ય વ્યવસાય માલિકોને વિનંતી કરી છે કે તેઓ ફક્ત પાલન સુધી મર્યાદિત ન રહે.

આ ગંભીર ગેરરીતિઓને ધ્યાનમાં રાખીને, FSSAIએ બંને કંપનીઓ સામે વેચાણ પ્રતિબંધનો આદેશ બહાર પાડ્યો છે. એવરેસ્ટ અને લાલજી ગોધુના હિંગ પર દેશભરમાં પ્રતિબંધ મૂકવામાં આવ્યો છે. આ પગલું ગ્રાહકોના સ્વાસ્થ્યનું રક્ષણ કરવા માટે એક સાવચેતીભર્યું પગલું છે. બંને કંપનીઓને નિર્દેશ આપવામાં આવ્યો છે કે, તેઓ તેમની ભૂલ કેવી રીતે સુધારશે અને ભવિષ્યમાં ધોરણો અનુસાર હિંગનું ઉત્પાદન કેવી રીતે કરશે તે સમજાવે. કંપનીઓને બજારમાં હાલમાં ઉપલબ્ધ કોઈપણ હલકી ગુણવત્તાવાળી હિંગ પાછી ખેંચવાની પણ સલાહ આપવામાં આવી છે.