બોલિવૂડના શ્રેષ્ઠ અભિનેતાઓમાંના એક, રાજકુમાર રાવ જો કોઈ ડાર્ક કોમેડી લઈને આવે છે તો કોઈ પણ તેની પાસેથી સુંદર અને સારા અભિનયની અપેક્ષા રાખશે. 'ટોસ્ટર' ટ્રેલરના રિલીઝ થયા પછીથી ચાહકો તેની આતુરતાથી રાહ જોઈ રહ્યા હતા. હવે જ્યારે તે આવી જ ગઈ છે, તો ચાલો તેના વિશે વાત કરી લઈએ.
'ટોસ્ટર'એ રમાકાંત પારેખ (રાજકુમાર રાવ) ની વાર્તા છે, જે એક કંજૂસ અને મખ્ખીચૂસ માણસ છે. રમાકાન્ત એક નંબરનો કંજૂસ માણસ છે, જેમ કે ઘણી વખત જોવા મળે છે તેમ, તે માત્ર કંજૂસ જ નહીં પરંતુ તેની સાથે સાથે લોભિયો પણ છે. રમાકાંત અને તેની પત્ની શિલ્પા (સાન્યા મલ્હોત્રા) એક વૃદ્ધ લોકોની કોલોનીમાં ભાડા પર સાથે રહે છે. આ શાંત, ધીમી ગતિવાળી કોલોનીમાં ભાડું ઓછું છે, તેથી રમાકાંત તે છોડીને જવા નથી માંગતો. અહીં તેના પડોશમાં રહેતી તેની મકાનમાલિક, શ્રીમતી ડિસોઝા (સીમા પાહવા), તેનો નશેડી પુત્ર, ગ્લેન (અભિષેક બેનર્જી) અને માલા આંટી (અર્ચના પૂરણ સિંહ) છે.
રમાકાંતની પત્નીના મતે, તેની બીમારી વધુ ખરાબ થઈ રહી છે. તે ટેલિકોમ કંપનીને ફોન કરીને આકસ્મિક રીતે કાપી લીધેલા 6 રૂપિયા પણ રોકડા માંગી લે છે. તેના જીવનનો સૌથી મુશ્કેલ સમય એ છે જ્યારે તેની પત્ની શિલ્પા તેને તેના ગુરુની પુત્રીના લગ્ન માટે 9,000 રૂપિયાનું ટોસ્ટર ખરીદવા માટે મજબૂર કરે છે. તે ખરીદવા માટે તો જાણે કે રમાકાંતનો લગભગ જીવ જ નીકળી ગયો હતો. પરંતુ એક વસ્તુ એવી થઇ કે જેની તેને પણ ખબર નહોતી કે આ ટોસ્ટર તેના જીવનમાં એક જીવતી જાગતી પીડા બની આવી ગયું છે.
હવે ટોસ્ટર પર કેન્દ્રિત આ ડાર્ક કોમેડી ઘણા રહસ્યમય વળાંકો લે છે. અહીં, તમને હત્યા, રહસ્ય, કોમેડી અને ડરાવી નાખે તેવી અર્ચના પૂરણ સિંહ જોવા મળશે. પરંતુ તે છતાં પણ ફિલ્મમાં હજુ ક્યાંક કંઇક ખૂટતું હોય તેવું લાગે છે. ફિલ્મની શરૂઆત મનોરંજક રીતે થાય છે. પહેલા ભાગમાં, તમને રમાકાંત અને તેની આસપાસના લોકો વિશે જાણવા મળે છે. ઘણા મહત્વપૂર્ણ વળાંકો આવે છે અને આ વળાંકો તમારી રુચિને વધારતા રહે છે. જો કે, બીજા ભાગમાં કઈ નવું નથી દેખાતું. વિવેક દાસચૌધરી દ્વારા દિગ્દર્શિત, આ ફિલ્મ તમને ફક્ત થોડા સમય માટે જ હસાવવામાં સફળ રહે છે. તેમાં કેટલીક સારી ક્ષણો અને પંચલાઇન્સ છે, પરંતુ આ ફિલ્મમાં તમારા માટે યાદ રાખવા જેવું કંઈ નથી. અક્ષત ઘિલ્ડિયાલ, અનઘ મુખર્જી અને પરવેઝ શેખ દ્વારા લખાયેલી આ વાર્તા શરૂઆતમાં તમારું ધ્યાન ખેંચે છે પણ અંત આવતા સુધીમાં તે વિખેરાઈ જાય છે. ક્લાઈમેક્સ પણ વિચિત્ર અને તમને સંતોષ થાય તેવો નથી.
અભિનયની વાત કરીએ તો, ફિલ્મના મુખ્ય અભિનેતા રાજકુમાર રાવે સારો અભિનય આપ્યો છે. તેમની પાસેથી આનાથી ઓછાની અપેક્ષા પણ ન કરી શકાય. જોકે, રાજકુમાર કંઈ નવું રજૂ કરતા નથી. એક ક્ષણ પછી, તમને તેના પાછલા અભિનય અને પાત્રો યાદ આવવા લાગે છે. સાન્યા શિલ્પા તરીકે સારી છે. દુઃખની વાત છે કે, તેને તેની ક્ષમતાના આધારે કંઈ વધારે કરવા માટે આપવામાં આવ્યું નથી. બસ ખાલી તે આ ફિલ્મમાં છે. અર્ચના પૂરણ સિંહ ફિલ્મનું સરપ્રાઈઝ પેકેજ છે. તે વિલક્ષણ માલિની તરીકે સારું કામ કરે છે. ફરાહ ખાન, ઉપેન્દ્ર લિમયે, સીમા પાહવા અને અભિષેક બેનર્જી પણ ઉત્તમ છે. આટલા લાંબા સમય પછી ફરાહને ફિલ્મમાં જોવી તાજગીભરી હતી. એકંદરે, જો તમે 'ટોસ્ટર' જોવા જઈ રહ્યા છો, તો વધારે પડતી અપેક્ષાઓ સાથે ન જતા.
