સિલ્વર ઓક યુનિવર્સિટીમાં My Equation રોબોટિક્સ સેન્ટર ઑફ એક્સેલન્સની સ્થાપના

અમદાવાદ (ગુજરાત) [ભારત], 15 ઓક્ટોબર: Tech Analogy Pvt. Ltd. બ્રાન્ડ My Equation, અમદાવાદની સિલ્વર ઓક યુનિવર્સિટી ખાતે રોબોટિક્સ અને AI માટેનું સેન્ટર ઑફ એક્સેલન્સ સ્થાપી રહ્યું છે. આ કેન્દ્ર વિદ્યાર્થીઓ અને અધ્યાપકોને રોબોટ બનાવવાની, તેને વિવિધ કામો માટે તૈયાર કરવાની અને નવા વિચારો પર પ્રયોગો તથા સંશોધન કરવાની તક આપવા માટે વિકસાવવામાં આવી રહ્યું છે.

કેન્દ્રમાં ઉદ્યોગના અનુભવી તાલીમકારો અને વિષય નિષ્ણાતોના માર્ગદર્શન હેઠળ પ્રાયોગિક અભ્યાસ, પ્રોજેક્ટ અને સંશોધનનું આયોજન છે. હાલમાં કેન્દ્રને સજ્જ કરવાની કામગીરી ચાલી રહી છે અને તેમાં પ્રયોગો માટેની નવી વ્યવસ્થાઓ, રોબોટ તથા અન્ય સાધનો તબક્કાવાર ઉમેરવામાં આવી રહ્યાં છે.

નાના કારખાનાના મોડલથી સમજાશે આધુનિક ઉદ્યોગનું કામકાજ
કેન્દ્રનું એક મુખ્ય આકર્ષણ આધુનિક કારખાનાનું નમૂનારૂપ મોડલ હશે. તેમાં કાચો માલ આવવાથી લઈને તૈયાર વસ્તુ રવાના થાય ત્યાં સુધીની કામગીરી ચાર વિભાગમાં સમજાવવામાં આવશે

- માલની આવક અને છટણી: આવતી વસ્તુઓને ઓળખવી અને પ્રકાર પ્રમાણે અલગ કરવી.
- સંગ્રહ અને વ્યવસ્થાપન: માલને યોગ્ય જગ્યાએ રાખવો અને તેની આવકજાવકનો હિસાબ રાખવો.
- ગુણવત્તાની તપાસ અને પ્રક્રિયા: કેમેરા અને અન્ય સાધનોની મદદથી વસ્તુઓની તપાસ કરવી તથા જરૂરી કામગીરી સમજવી.
- પેકિંગ અને રવાનગી: તૈયાર વસ્તુઓનું પેકિંગ, ઓળખ અને આગળ મોકલવાની વ્યવસ્થા સમજવી.
આ વિભાગો વચ્ચે માલની હેરફેર માટે આપમેળે ચાલતા રોબોટનો સમાવેશ કરવાની પણ યોજના છે. આ મોડલ દ્વારા વિદ્યાર્થીઓ સમજી શકશે કે કારખાનામાં મશીનો, કેમેરા, રોબોટ અને કમ્પ્યુટર એકબીજા સાથે જોડાઈને કેવી રીતે કામ કરે છે.

જાતે રોબોટ બનાવીને શીખવાની તક: વિદ્યાર્થીઓને મોટર, કેમેરા, ઇલેક્ટ્રોનિક સાધનો અને આસપાસની સ્થિતિ ઓળખતા સેન્સરની મદદથી રોબોટ તૈયાર કરવાની તક આપવાનો હેતુ છે. તેઓ રોબોટને કામ કરવા માટે સૂચનાઓ આપવી, તેની કામગીરી તપાસવી, ખામી શોધવી અને તેમાં સુધારો કરવો જેવી બાબતોનો પ્રત્યક્ષ અનુભવ મેળવી શકશે. AI એટલે કે કૃત્રિમ બુદ્ધિમત્તાનો ઉપયોગ કરીને વસ્તુઓ ઓળખવી, રોબોટને રસ્તો શોધવામાં મદદ કરવી અને ચોક્કસ કામ આપમેળે થાય તેવી વ્યવસ્થા બનાવવી જેવા વિષયો પર પણ પ્રાયોગિક અભ્યાસનું આયોજન છે.

વિદ્યાર્થીઓ અને અધ્યાપકો માટે સંશોધનનું વાતાવરણ: આ કેન્દ્ર વિદ્યાર્થીઓ અને અધ્યાપકોને પોતાના વિચારોના કાર્યરત નમૂના તૈયાર કરવા, તેનું પરીક્ષણ કરવા અને તેમાં સુધારા કરવા માટેની સુવિધાઓ ઉપલબ્ધ કરાવવાના હેતુથી વિકસાવવામાં આવી રહ્યું છે. ઉદ્યોગના નિષ્ણાતો સાથેના માર્ગદર્શન દ્વારા અભ્યાસને વાસ્તવિક કામની જરૂરિયાતો સાથે જોડવાનો પ્રયાસ કરવામાં આવશે. આ સાથે અધ્યાપકો માટે તકનીકી માર્ગદર્શન, પ્રોજેક્ટ વિકાસ અને સંશોધનને સહાય આપતી પ્રવૃત્તિઓનું પણ આયોજન છે.

આ પહેલ અંગે My Equation સ્થાપક અને મુખ્ય કાર્યકારી અધિકારી રતિક ગુપ્તાનું કહેવું છે: “અમે ઇચ્છીએ છીએ કે વિદ્યાર્થીઓ જાતે રોબોટ તૈયાર કરે, તેને ચલાવે, તેનું પરીક્ષણ કરે અને તેમાં સુધારા કરે. સિલ્વર ઓક યુનિવર્સિટી ખાતેના આ કેન્દ્ર દ્વારા વિદ્યાર્થીઓ, અધ્યાપકો અને ઉદ્યોગના નિષ્ણાતોને સાથે મળીને પ્રાયોગિક કામ અને સંશોધન કરવાની તક આપવાનો અમારો હેતુ છે.”

કેન્દ્રની પ્રગતિ, તાલીમ કાર્યક્રમો અને તેમાં ભાગ લેવાની વિગતો My Equation ના સત્તાવાર માધ્યમો દ્વારા જાહેર કરવામાં આવશે. વિદ્યાર્થીઓ, વાલીઓ, અધ્યાપકો, સહયોગી સંસ્થાઓ અને અન્ય સંબંધિત લોકોની જાણ માટે My Equation વધુમાં સ્પષ્ટ કરે છે કે ગુજરાત યુનિવર્સિટી, અમદાવાદ ખાતે GUSEC ની જે જગ્યાએથી કંપની અગાઉ કામગીરી કરતી હતી, તે સ્થળેથી કંપનીની કામગીરી ઓગસ્ટ ૨૦૨૬માં બંધ કરવામાં આવી હતી. કંપની હાલમાં તે સ્થળેથી કામગીરી કરતી નથી. My Equation હાલના કાર્યક્રમો, સુવિધાઓ અને સિલ્વર ઓક યુનિવર્સિટી ખાતે વિકસાવવામાં આવી રહેલા કેન્દ્ર અંગેની પૂછપરછ માટે કંપનીના સત્તાવાર સંપર્ક માધ્યમોનો ઉપયોગ કરવા વિનંતી છે.