વડોદરાના પ્રવાસે PM મોદી જ્યાંથી પસાર થયા ત્યાં 12 લાઇટ ખરાબ હતી, અધિકારી પર કાર્યવાહી

વડોદરા જિલ્લાની ડભોઇ નગરપાલિકાના એક અધિકારીને સસ્પેન્ડ કરવામાં આવ્યા છે. કારણ 31 ઓક્ટોબરે વડાપ્રધાન નરેન્દ્ર મોદી, જે રસ્તા પરથી પસાર થયા હતા ત્યાં 12 સ્ટ્રીટલાઇટો ખરાબ હતી. ઘણી બધી સ્ટ્રીટલાઇટો ઝબકતી હતી. PM નરેન્દ્ર મોદીનો કાર્યક્રમ હતો, તે પણ ગૃહ રાજ્યમાં, એટલે નગરપાલિકાના પ્રશાસનિક પ્રમુખ હરકતમાં આવ્યા. તેમણે લાઇટિંગ વિભાગના કારકુન મહેશ વસાવાને સસ્પેન્શન પત્ર જાહેર કરી દીધો.

તેમના પર આરોપ છે કે, નગરપાલિકાના નિર્દેશો છતા તેમણે સ્ટ્રીટલાઇટની જાળવણીમાં બેદરકારી દાખવી. સસ્પેન્શનનો સમયગાળો હાલમાં 6 દિવસનો છે. આ સમય પૂર્ણ થયા પછી તેમણે વરિષ્ઠ અધિકારી સમક્ષ હાજર થઈને પોતાની કથિત બેદરકારીનો ખુલાસો પણ આપવો પડશે. ગુજરાત મ્યુનિસિપાલિટીઝ એક્ટ, 1963 ની કલમ 48 હેઠળ 31 ઓક્ટોબરે સસ્પેન્શનનો આદેશ જાહેર કરવામાં આવ્યો હતો. આ કલમ હેઠળ નગરપાલિકાના કોઇ અધિકારી કે કર્મચારી પર નક્કર અને પૂરતા કારણોસર દંડ અથવા અન્ય સજા થઈ શકે છે.

31 ઓક્ટોબરના રોજ, વડાપ્રધાન નરેન્દ્ર મોદી, ગુજરાતના મુખ્યમંત્રી ભૂપેન્દ્ર પટેલ અને ઘણા VIP, રાષ્ટ્રીય એકતા દિવસની ઉજવણીમાં ભાગ લેવા માટે એકતા નગરમાં સ્ટેચ્યૂ ઓફ યુનિટી પહોંચ્યા હતા. કાર્યક્રમ પછી, PMએ હેલિકોપ્ટરથી વડોદરા એરપોર્ટ જવાના હતા. પરંતુ, સાંજ થઇ જવાને કારણે વડાપ્રધાન અને અન્ય લોકો હેલિકોપ્ટરને બદલે રોડ માર્ગે ગયા હતા. ત્યારબાદ તેમણે લગભગ 90 કિમીનો પ્રવાસ કર્યો અને વડોદરા એરપોર્ટ પર પહોંચ્યા.

ઇન્ડિયન એક્સપ્રેસના અહેવાલ મુજબ, આ સસ્પેન્શનનો આદેશ ડભોઈ નગરપાલિકાના મુખ્ય અધિકારી વિરાજ શાહે જાહેર કર્યો હતો. આદેશમાં જણાવાયું હતું કે VIP લોકોના આવવા-જવાને જોતા, નગરપાલિકાએ પોતાના વિવિધ વિભાગોને ઘણી જવાબદારીઓ સોંપી હતી. તેમાં સ્વચ્છતા, રખડતા પ્રાણીઓ પર નિયંત્રણ અને સ્ટ્રીટ લાઈટોની જાળવણી સામેલ હતા. આદેશમાં જણાવાયું હતું કે લાઇટિંગ વિભાગના પ્રભારી ક્લાર્કના રૂપમાં મહેશ વસાવાની જવાબદારી હતી કે સ્ટ્રીટલાઈટો સારી રીતે કામ કરે. સસ્પેન્શન પત્રમાં કહેવામાં આવ્યું હતું કે, ઓફિસ દ્વારા નિર્દેશ આપવા છતા તમે એ સુનિશ્ચિત કરવામાં સફળ રહ્યા કે જરૂરી સમારકામ સમયસર પૂર્ણ કરવામાં આવે. એટલે, તમને ગુજરાત મ્યુનિસિપાલિટીઝ એક્ટ, 1963ની કલમ 48 હેઠળ સસ્પેન્ડ કરવામાં આવે છે.

વડોદરાથી સ્ટેચ્યુ ઓફ યુનિટીને જોડતો હાઇવે ડભોઈની બહારથી પસાર થાય છે. શહેરના ઘણા રસ્તાઓ આ હાઇવે સાથે જોડાય છે. સસ્પેન્શન ઓર્ડરમાં પ્રભાવિત વિસ્તારની ઓળખ સિનોર ક્રોસરોડ્સથી ભોગોળ થતા સરિતા બ્રિજ સુધી થઇ છે. આ જગ્યા પર 12 સ્ટ્રીટલાઇટો બંધ જોવા મળી હતી, અને કેટલીક લાઇટ ઝબકતી હતી. સસ્પેન્શન ઓર્ડરમાં વસાવા સામેની અગાઉની ઘણી ફરિયાદોનો પણ ઉલ્લેખ છે. સૂત્રો મુજબ આ કાર્યવાહી તેમના કેટલાક કામમાં ચાલી રહેલી તપાસનું પરિણામ છે. એવું કહેવાય છે કે તેમને સોંપવામાં આવેલા વધારાના ચાર્જ અને જવાબદારીઓ પણ પાછી લઇ લેવામાં આવી છે.