શું મમતાનો સાથ છોડવાનું યુસુફ પઠાણને ઈનામ મળ્યું? ભાજપ સરકાર 14 વર્ષથી ફસાયેલી જમીન યૂસુફને 'ભેટ'માં આપશે

ભૂતપૂર્વ ભારતીય ક્રિકેટર અને લોકસભા સાંસદ યૂસુફ પઠાણને આખરે તે પ્લોટ મળી જ ગયો, જેના માટે તેઓ વર્ષોથી રાહ જોઈ રહ્યા હતા. તૃણમૂલ કોંગ્રેસ (TMC)ની ટિકિટ પર ચૂંટણી જીતનાર યૂસુફ પઠાણ પર ગુજરાતની ભાજપ સરકાર વિશેષ ઉદારતા દાખવી રહી છે. મમતા બેનર્જીનો સાથ છોડવાની સાથે જ, પઠાણ સાથે જોડાયેલો લાંબા સમયથી પડતર મુદ્દો ઝડપથી 'ઉકેલાઈ' ગયો. વડોદરામાં તેમના ઘરની બિલકુલ બાજુમાં આવેલી સરકારી જમીનનો ટુકડો તેમને સોંપવાની પ્રક્રિયા હવે ચાલી રહી છે. ગુજરાત સરકારની મંજૂરી મળ્યા બાદ, વડોદરા મ્યુનિસિપલ કોર્પોરેશન આ હસ્તાંતરણને આખરી ઓપ આપવા માટે પગલાં લઈ રહ્યું છે.

આ પ્લોટ વડોદરાના તાંદળજા વિસ્તારમાં આવેલી છે, જે પઠાણ પરિવારના જાણીતા સફેદ બંગલાની બિલકુલ બાજુમાં છે. યૂસુફ પઠાણ આ બંગલામાં તેમના નાના ભાઈ અને ભૂતપૂર્વ ભારતીય ક્રિકેટર ઈરફાન પઠાણસ બંનેના પરિવારો અને માતા-પિતા સાથે રહે છે. પશ્ચિમ બંગાળના બહરામપુરના સાંસદ યૂસુફ પઠાણને મળેલી આ રાહત એવા સમયે મળી છે જ્યારે તેમના રાજકીય વલણ અને ભાજપ સાથેના સંભવિત સંબંધો અંગે સવાલો ઉઠી રહ્યા છે. TMC છોડ્યાના માત્ર બે મહિનામાં જ તેમને આ 'ભેટ' મળી છે, જેના મમતા બેનર્જીથી અલગ થવાનું 'ઈનામ' માનવામાં આવી રહ્યું છે.

જૂન 2024માં, ભાજપના નિયંત્રણ હેઠળની વડોદરા મ્યુનિસિપલ કોર્પોરેશને યૂસુફ પઠાણને 978 વર્ગ મીટરની આ જમીન પર અતિક્રમણ કરવા બદલ નોટિસ ફટકારી હતી. રસપ્રદ વાત એ છે કે, બહરામપુર લોકસભા મતવિસ્તારમાંથી ચૂંટણી જીત્યાના થોડા જ દિવસોમાં પઠાણને આ નોટિસ મળી હતી. પરંતુ 2026માં બંગાળમાં ચૂંટણી હાર્યા બાદ પરિસ્થિતિ બદલાઈ ગઈ છે. યૂસુફ પઠાણ તે 20 TMC સાંસદોમાં સામેલ થઈ ગયા, જેમણે TMC છોડીને 'નેશનાલિસ્ટ સિટિઝન્સ પાર્ટી ઓફ ઈન્ડિયા' (NCPI)માં જોડાવાનો નિર્ણય લીધો.

આ ઘટનાક્રમે ભારતીય રાજકારણમાં સૌને ચોંકાવી દીધા હતા. જોકે NCPI એક નોંધાયેલ રાજકીય પાર્ટી તો હતી, પરંતુ તે સમયે મોટાભાગના લોકોએ તેનું નામ પણ સાંભળ્યું નહોતું. રાજ્ય કે રાષ્ટ્રીય રાજકારણમાં તેનું કોઈ અસ્તિત્વ નહોતું. એક પણ સાંસદ કે ધારાસભ્ય નહોતા. એવામાં, TMCના સાંસદોનું અચાનક આવા પાર્ટીમાં જોડાવું રાજકીય વર્તુળોમાં ભારે હલચલ મચાવનાર પગલું હતું.

હવે, યૂસુફ પઠાણના પ્લોટના મામલા પર આવીએ. વડોદરાના તાંદળજા વિસ્તારમાં આવેલી TP-22ના ફાઈનલ પ્લોટ નંબર 90ની જમીનનું કુલ ક્ષેત્રફળ 978 વર્ગ મીટર છે. 'ધ ઈન્ડિયન એક્સપ્રેસ'ના અહેવાલ મુજબ, ગુજરાત સરકારના એક ઠરાવમાં જણાવવામાં આવ્યું છે કે આ જમીનમાંથી 500 વર્ગ મીટર જમીન યૂસુફ પઠાણને ભેટ તરીકે આપવામાં આવશે, જ્યારે બાકીની 478 વર્ગ મીટર જમીન રાહત દરે આપવામાં આવશે. વડોદરા અર્બન ડેવલપમેન્ટ ઓથોરિટી (VUDA)ની મૂલ્યાંકન સમિતિએ 17 માર્ચ, 2026ના રોજ આ કિંમત નક્કી કરી હતી. તે મુજબ, પઠાણે બાકીની 478 વર્ગ મીટર જમીન મેળવવા માટે નક્કી કરાયેલા મૂલ્યના 55 ટકા રકમ ચૂકવવાની રહેશે.

'ઈન્ડિયા ટૂડે'ના અહેવાલ મુજબ, વડોદરા મ્યુનિસિપલ કોર્પોરેશનની સ્થાયી સમિતિએ ગત જુલાઈ મહિનામાં આ જમીનની કિંમત 2.10 લાખ રૂપિયા પ્રતિ વર્ગ મીટરના હિસાબે લગભગ 20.53 કરોડ રૂપિયા આંકી હતી. આ, પ્લોટ માટે ન્યૂનતમ આધાર કિંમત (અપસેટ વેલ્યૂ) નક્કી થયા બાદ, તેના ફાળવણીનો પ્રસ્તાવ મ્યુનિસિપલ કોર્પોરેશનની સ્થાયી સમિતિ સમક્ષ રજૂ કરવામાં આવશે. વડોદરા મ્યુનિસિપલ કમિશનર અરુણ બાબીએ પુષ્ટિ કરી છે કે રાજ્ય સરકારની મંજૂરી મળી ગઈ છે. હવે આ પ્રસ્તાવ સ્થાયી સમિતિ સમક્ષ મૂકવામાં આવશે, ત્યારબાદ આગળની પ્રક્રિયા હાથ ધરવામાં આવશે.

યૂસુફ પઠાણ અને સરકારી જમીન વચ્ચે વિવાદ લગભગ 14 વર્ષ જૂનો છે. વર્ષ 2012માં, યૂસુફ પઠાણે વડોદરા મ્યુનિસિપલ કમિશનરને પત્ર લખીને તેમના બંગલાની બાજુમાં આવેલો 978 વર્ગ મીટરનો પ્લોટ ફાળવવાની માંગ કરી હતી. 30 માર્ચ અને 8 જૂન, 2012ના રોજ યોજાયેલી બેઠકોમાં આ પ્રસ્તાવ પર આગળ કાર્યવાહી કરવામાં આવી હતી. તે સમયે, ખુલ્લી હરાજી કર્યા વિના આ જમીન યૂસુફને 99 વર્ષના લીઝ પર આપવાની પ્રક્રિયા શરૂ કરવામાં આવી હતી. વર્ષ 2014માં, ગુજરાત સરકારે ખુલ્લી હરાજી વિના જમીન ફાળવવાના આ પ્રસ્તાવને મંજૂરી આપી નહોતી. આમ છતા યૂસુફ પઠાણ દ્વારા આ જમીન પર કથિત કબજો જમાવી રાખવા અંગેનો વિવાદ ચાલુ રહ્યો હતો.

વર્ષ 2024માં વડોદરા મ્યુનિસિપલ કોર્પોરેશને પ્રસ્તાવને મંજૂરી ન મળી હોવાનો ઉલ્લેખ કરીને યૂસુફ પઠાણ દ્વારા પ્લોટ પર કરવામાં આવેલા 'દબાણ'ને દૂર કરવાનો આદેશ આપ્યો. ત્યારબાદ યૂસુફ પઠાણે આ નિર્ણયને ગુજરાત હાઈકોર્ટમાં પડકાર્યો હતો. 21 ઓગસ્ટ, 2025ના રોજ, ગુજરાત હાઈકોર્ટની સિંગલ-જજ બેન્ચે તેમની અરજી ફગાવી દીધી હતી. ત્યારબાદ, યૂસુફ પઠાણે આ નિર્ણય વિરુદ્ધ ડિવિઝન બેન્ચ સમક્ષ અપીલ દાખલ કરી હતી.

8 જૂન, 2026ના રોજ થયેલી સુનાવણી દરમિયાન, હાઈકોર્ટે પ્રશ્ન કર્યો કે જ્યારે જમીનની કોઈ કાયદેસરની ફાળવણી થઈ નથી અને ન તો તેના માટે કોઈ ચૂકવણી પણ કરવામાં આવી છે, ત્યારે સરકારી જમીનનો કબજો કેવી રીતે હાંસલ કરવામાં આવ્યો? કોર્ટે આ મામલે મ્યુનિસિપલ કોર્પોરેશનના અધિકારીઓની ભૂમિકા અંગે પણ સવાલો ઉઠાવ્યા હતા.

આ વિવાદમાં 31 ઓગસ્ટ, 2026ના રોજ એક મહત્ત્વપૂર્ણ વળાંક આવ્યો, જ્યારે યૂસુફ પઠાણે હાઈકોર્ટમાં દાખલ કરેલી અપીલ પાછી ખેંચી લીધી. આ સાથે જ, જમીનને લઈને ચાલી રહેલું જૂનું ચેપ્ટર બંધ થઇ ગયું. ગુજરાત સરકારની મંજૂરી મળ્યા બાદ હવે પ્લોટ ફાળવણીની પ્રક્રિયા આગળ વધી રહી છે. મ્યુનિસિપલ કોર્પોરેશનની સ્ટેન્ડિંગ કમિટી દ્વારા મંજૂરી આપવામાં આવે અને ચૂકવણીની શરતો પૂર્ણ થાય ત્યારબાદ જ સ્પષ્ટ થશે કે યૂસુફ પઠાણને આ જમીનનો કબજો ક્યારે મળશે.