ચોમાસાની વિદાય વચ્ચે હવામાન વિભાગની આગાહી- ‘હાલ ગુજરાતની આસપાસ એક વેસ્ટર્ન ડિસ્ટર્બન્સ સક્રિય, આગામી 7 દિવસ...’

ગુજરાતમાં ચોમાસાની વિદાયની ઘડીઓ ગણાઇ રહી છે, ત્યારે આગામી દિવસોમાં ફરી હવામાનમાં ફેરફાર જોવા મળી શકે છે. હવામાન વિભાગના વૈજ્ઞાનિક રામાશ્રય યાદવ અને હવામાન વિભાગે ગુજરાતના હવામાનને લઈને મહત્ત્વની આગાહી કરી છે. હવામાન વિભાગના જણાવ્યા અનુસાર, હાલમાં ગુજરાતની આસપાસ એક વેસ્ટર્ન ડિસ્ટર્બન્સ સક્રિય છે. જેના કારણે ગુજરાત રિઝનમાં આગામી 7 દિવસ દરમિયાન હળવાથી મધ્યમ વરસાદની શક્યતા છે. ખાસ કરીને સૌરાષ્ટ્ર અને કચ્છમાં 30 સપ્ટેમ્બરથી 2 ઓક્ટોબર દરમિયાન સામાન્યથી મધ્યમ વરસાદ પડી શકે છે.

ન્યૂઝ18 ગુજરાતીના અહેવાલ મુજબ, સૌરાષ્ટ્ર-કચ્છમાં હાલ ચાર દિવસ સુધી હવામાન શુષ્ક રહેવાની શક્યતા છે. ત્યારબાદ ત્રણ દિવસ સુધી હળવાથી મધ્યમ વરસાદનો રાઉન્ડ આવી શકે છે. અન્ય વિસ્તારોમાં પણ આગામી 7 દિવસ દરમિયાન છૂટોછવાયો વરસાદ પડવાની સંભાવના વ્યક્ત કરવામાં આવી છે. બીજી તરફ ગુજરાતમાં ચોમાસાની વિદાયની શરૂઆત થઈ ગઈ છે. કચ્છના નલિયા તેમજ ડીસા સહિતના કેટલાક વિસ્તારોમાંથી ચોમાસું વિદાય લઈ ચૂક્યું છે. જોકે, ચોમાસાની વિદાય વચ્ચે કેટલાક વિસ્તારોમાં ફરી વરસાદી માહોલ સર્જાવાની શક્યતા છે.

હવામાન વિભાગના વૈજ્ઞાનિક રામાશ્રય યાદવના જણાવ્યા મુજબ, આગામી 7 દિવસ દરમિયાન ગુજરાતના વિવિધ વિસ્તારોમાં છૂટોછવાયો હળવાથી મધ્યમ વરસાદ પડી શકે છે. જ્યારે સૌરાષ્ટ્ર અને કચ્છમાં ત્રણ દિવસ બાદ વરસાદી રાઉન્ડ આવવાની શક્યતા છે.

ઉલ્લેખનીય છે કે, રાજ્યમાં આ વર્ષે વરસાદની ઘટ પણ યથાવત છે. અત્યાર સુધીમાં ગુજરાતમાં સરેરાશ 701 મીમી વરસાદની સામે 637 મીમી વરસાદ નોંધાયો છે. જેના કારણે રાજ્યમાં 9 ટકા વરસાદની ઘટ નોંધાઈ છે. બીજી તરફ સૌરાષ્ટ્ર અને કચ્છ વિસ્તારમાં અત્યાર સુધીમાં વરસાદની 22 ટકા ઘટ જોવા મળી રહી છે.

સંદેશના અહેવાલ મુજબ, ગુજરાતમાં ચાલુ વર્ષે ચોમાસાની મોસમ દરમિયાન વરસાદની મોટી ઘટ નોંધાઈ છે. અત્યાર સુધીમાં રાજ્યમાં સરેરાશ માત્ર 89.16% જેટલો જ વરસાદ થયો છે, જે છેલ્લાં ચાર વર્ષમાં નોંધાયેલો સૌથી ઓછો વરસાદ છે. સમગ્ર રાજ્યમાં એકસરખો વરસાદ ન પડવાના કારણે સ્થાનિક કક્ષાએ ભારે અસમાનતા સર્જાઈ છે. ઉત્તર અને મધ્ય ગુજરાતના કેટલાક વિસ્તારોની સરખામણીએ પશ્ચિમ સૌરાષ્ટ્રના જિલ્લાઓમાં વરસાદનું પ્રમાણ ચિંતાજનક રીતે ઓછું રહ્યું છે, જેના કારણે ચોમાસાના અંતે જળ સંકટના વાદળો ઘેરાવા લાગ્યા છે.

જિલ્લાવાર પરિસ્થિતિ પર નજર કરીએ તો ખાસ કરીને દેવભૂમિ દ્વારકા જિલ્લામાં સ્થિતિ અત્યંત ગંભીર બની છે, જ્યાં અત્યાર સુધીમાં માત્ર 16.45% જ વરસાદ નોંધાયો છે. આ ઉપરાંત પોરબંદર જિલ્લામાં 30.86% અને જામનગર જિલ્લામાં 42.83% જેટલો જ સામાન્ય વરસાદ થયો છે. આ જિલ્લાઓના વિવિધ તાલુકાઓમાં પણ વરસાદની ભારે તંગી જોવા મળી રહી છે. વરસાદ ઓછો થવાના કારણે આગામી દિવસોમાં આ વિસ્તારોમાં પીવાના પાણી તેમજ પશુઓ માટે ઘાસચારાની ભારે અછત અને તંગી સર્જાવાનો ભય ઉભો થયો છે.

વરસાદની આવી ચિંતાજનક પરિસ્થિતિ છતાં રાજ્ય સરકાર દ્વારા સ્પષ્ટ કરવામાં આવ્યું છે કે નિયમ મુજબ 31 ઓક્ટોબર પહેલાં રાજ્યના કે કોઈપણ જિલ્લામાં સત્તાવાર રીતે અછત કે દુષ્કાળની જાહેરાત કરવામાં આવશે નહીં. અછતની જાહેરાત બાદ જ સરકારી રાહત કાર્યો અને ઘાસચારાની સબસિડી જેવી યોજનાઓ અમલમાં આવતી હોય છે. જેથી 31 ઓક્ટોબર સુધી રાહ જોવી પડે તેમ હોવાથી દ્વારકા, જામનગર અને પોરબંદર વિસ્તારના ખેડૂતો અને પશુપાલકોમાં ભારે ચિંતા અને અસંતોષની લાગણી જોવા મળી રહી છે.