ગર્લ્સ હોસ્ટેલમાં ચીસો, મધ્યરાત્રિએ હોબાળો અને 'ભૂત'ની કહાની... યુનિવર્સિટીમાં આખરે શું થયું?

પંજાબના પટિયાલામાં શુક્રવારની રાત્રે એક ખાનગી યુનિવર્સિટીનું કેમ્પસ અચાનક અફવાઓ, ભય અને અરાજકતા વચ્ચે ઘેરાઇ ગયું. અહેવાલો અનુસાર, મોડી રાત્રે સોશિયલ મીડિયા પર એક વીડિયો વાયરલ થયો, જેના કારણે સેંકડો વિદ્યાર્થીઓ કેમ્પસના રસ્તાઓ પર ઉતરી આવ્યા. આ વીડિયોમાં દાવો કરવામાં આવ્યો હતો કે ગર્લ્સ હોસ્ટેલમાં એક વિદ્યાર્થિનીએ તાજેતરમાં આત્મહત્યા કરી હતી અને હવે તેનો આત્મા ત્યાં રહેતી અન્ય વિદ્યાર્થિનીઓને પરેશાન કરી રહ્યો છે.

વિદ્યાર્થિનીઓનો દાવો હતો કે તેમણે ગર્લ્સ હોસ્ટેલમાંથી ચીસો અને બૂમોનો અવાજ સાંભળ્યો હતો. વાયરલ થયેલા વીડિયોએ આ દાવાઓને વધુ વેગ આપ્યો. થોડા જ સમયમાં હોસ્ટેલમાં 'ભૂત' હોવાની ચર્ચા સમગ્ર કેમ્પસમાં ફેલાઈ ગઈ. ભય અને રોષને કારણે મોટી સંખ્યામાં વિદ્યાર્થીઓ મોડી રાત્રે વિરોધ પ્રદર્શન કરવા લાગ્યા. પરિસ્થિતિ એટલી વણસી ગઈ કે પોલીસને ઘટનાસ્થળે આવવું પડ્યું. વિરોધ પ્રદર્શન દરમિયાન, કેટલાક વિદ્યાર્થીઓએ પોલીસ પેટ્રોલિંગ વાનમાં તોડફોડ કરી અને તેને પલટાવી નાખવાનો પ્રયાસ પણ કર્યો.

https://twitter.com/ANI/status/2103719869040734569?s=20

આ સમગ્ર ઘટનાક્રમમાં સૌથી વધુ ચર્ચા એ એમ્બ્યુલન્સ હતી, જે ગુરુવારે વહેલી સવારે ગર્લ્સ હોસ્ટેલ પહોંચી હતી. સોશિયલ મીડિયા પર ફેલાયેલી કહાનીમાં આને કોઈના મૃત્યુ કે આત્મહત્યા સાથે જોડવામાં આવ્યું હતું. જોકે, યુનિવર્સિટી વહીવટીતંત્રએ આ દાવાનો સ્પષ્ટપણે ઇનકાર કર્યો છે. યુનિવર્સિટીના જણાવ્યા અનુસાર, હોસ્ટેલમાં કોઈ વિદ્યાર્થિનીનું મૃત્યુ કે આત્મહત્યાની ઘટના બની નથી. વહીવટીતંત્રએ જણાવ્યું હતું કે, તે એક એવી વિદ્યાર્થિની માટે બોલાવવામાં આવી હતી, જે હોસ્પિટલથી પરત ફરી હતી. યુનિવર્સિટીનું કહેવું છે કે આ ઘટનાનો કોઈના મૃત્યુ કે આત્મહત્યા સાથે કોઈ સંબંધ નહોતો.

આ મામલે સોશિયલ મીડિયા પર અન્ય એક દાવો પણ સામે આવ્યો. કહેવામાં આવ્યું કે એક પંડિત  ગર્લ્સ હોસ્ટેલ પહોંચ્યા હતા. આ વાત પણ ઝડપથી ફેલાઈ ગઈ અને તેને મૃત્યુની ઘટના સાથે જોડવામાં આવી. યુનિવર્સિટીએ સ્વીકાર્યું કે એક પંડિત હોસ્ટેલ આવ્યા હતા, પરંતુ વહીવટીતંત્રએ આનું કારણ તદ્દન અલગ જણાવ્યું હતું. યુનિવર્સિટીના જણાવ્યા અનુસાર, તે વ્યક્તિ બપોરે 3 વાગ્યાની આસપાસ પોતાની દીકરીને મળવા હોસ્ટેલ આવ્યો હતો, જેને દીકરી યુનિવર્સિટીમાં અભ્યાસ કરે છે. વહીવટીતંત્રએ સ્પષ્ટતા કરી હતી કે તેમનું આવવું એ કોઈના મૃત્યુ કે આત્મહત્યા સાથે કોઈ સાથે લેવા-દેવા નથી.

આ હોબાળા વચ્ચે પરિસ્થિતિ ત્યારે વધુ ગંભીર બની જ્યારે વિદ્યાર્થીઓએ પોલીસ સમક્ષ દાવો કર્યો કે બે વિદ્યાર્થિનીઓ ગુમ છે. પોલીસ અધિકારીઓએ વિદ્યાર્થીઓ સાથે વાત કરી અને તેમની ફરિયાદો સાંભળી. જોકે, તપાસ દરમિયાન એક અજીબ સ્થિતિ ઊભી થઈ; પોલીસના જણાવ્યા અનુસાર, વિદ્યાર્થીઓને ગુમ થયેલી બે છોકરીઓના નામ પણ ખબર નહોતા. પોલીસે વિદ્યાર્થીઓને ખાતરી આપી કે આ ફરિયાદને ગંભીરતાથી લેવામાં આવી રહી છે. અધિકારીઓએ જણાવ્યું કે દરેક વિદ્યાર્થીની ભાળ મેળવવામાં આવશે અને જો ખરેખર કોઈ વિદ્યાર્થી ગુમ હોવાનું જણાશે, તો જરૂરી કાર્યવાહી કરવામાં આવશે.