નિમિષા પારેખ દ્વારા રચિત મેહંદીકૃત રામાયણ માટે મોરારી બાપુએ આપ્યા આશીર્વચન

સુરતના વનિતા વિશ્રામ આર્ટ ગેલેરી ખાતે એક અનોખું મેહંદીકૃત એક્ઝિબિશન યોજવામાં આવ્યું હતું. તારીખ 8 ઓક્ટોબર 2026ના રોજ સવારે 10 કલાકથી શરૂ થયેલા આ એક્ઝિબિશનને નિહાળવા માટે મોટી સંખ્યામાં વિઝિટર્સ અને શહેરના મહાનુભાવો પધાર્યા હતા. 

મેંહદીકલ્ચરના કો-ફાઉન્ડર નિમિષા પારેખ દ્વારા આયોજિત આ એક્ઝિબિશનને સારો પ્રતિસાદ મળ્યો હતો. એક્ઝિબિશનમાં ખાસ નિમિષા પારેખ દ્વારા બનાવવામાં આવેલા પેઇન્ટિંગ અને સાથે જ મેહંદીકૃત રામાયણ આકર્ષણનું કેન્દ્ર હતું. 

રામાયણના 51 પ્રસંગોને વારલી ચિત્રકલા સ્વરૂપે મેહંદીમાં રચીને તેને પુસ્તક સ્વરૂપે પ્રકાશિત કરવામાં આવ્યું છે. હાલમાં જ નિમિષા પારેખે  જાણીતા રામકથાકાર પૂજનીય મોરારી બાપુને મેંહદીકૃત રામાયણ ભેટમાં આપીને તેમના આશીર્વાદ મેળવ્યા હતા. રામાયણને આ રીતે મેહંદીના સ્વરૂપે જોઇને મોરારી બાપુએ પુસ્તકને લઇને પોતાની પ્રસન્નતા વ્યક્ત કરી હતી અને પુસ્તકની રચનાને આશીર્વચન આપ્યા હતા અને સાથે જ આ કલાને વધુ વિકસિત કરવા માટે નિમિષા પારેખને પણ આશીર્વાદ આપ્યા હતા. 

એક્ઝિબિશનમાં સવારથી જ કલારસિકોએ આ પેઇન્ટિંગ ઉપરાંત મેહંદીકૃત રામાયણના પુસ્તકને ખરીદવા માટે રસ દાખવ્યો હતો.  આ બાબતે મેહંદીકલ્ચરના સહ-સ્થાપક નિમિષા પારેખે જણાવ્યું હતું કે, આપણી કલા, સંસ્કૃતિ અને વારસાને જાળવી રાખવા માટે આ પુસ્તક એક ઓસ્પિશિયસ ગિફ્ટ માટે બેસ્ટ છે. રામાયણના આ 51 પ્રસંગોને વારલી કલા સ્વરૂપે દર્શાવીને લોકોને અચરજ પમાડી દેનાર નિમિષા પારેખે કેન્વાસ તેમજ અલગ અલગ રીતે મેહંદીને દર્શાવીને પોતાની કલાનું અનોખું પ્રદર્શન કર્યુ હતું. આ એકદિવસીય એક્ઝિબિશનમાં મોટી સંખ્યામાં સુરતના જાણીતા મહાનુભાવો પધાર્યા હતા અને નિમિષા પારેખના આ કલાને બિરદાવી હતી.