રાજકોટ ક્રાઈમ બ્રાન્ચે આંતરરાજ્ય ગેંગના 3 શખ્સોને ઝડપી પાડ્યા છે. યુપીના આ શખ્સોએ ATM મશીનના ડિસ્પેન્સર બોક્સમાં એલ્યુમિનિયમની પટ્ટી ફિટ કરી મુંબઈ, અમદાવાદ, સુરત, મહેસાણા અને રાજકોટમાં 14 જગ્યાએથી નાણા ચોરી કર્યાની કબુલાત આપી છે. જેથી હાલ પોલીસે અન્ય કોઈ જગ્યાએ ચોરી કરી હોય કે અન્ય કોઈ શખ્સો આ ગેંગ સાથે સંકળાયેલા છે કે કેમ તે અંગે વધુ તપાસ હાથ ધરવામાં આવી છે.
આ મામલે પોલીસે આરોપીઓની ઓળખ અફાસ અહેમદ રિયાઝત અલી (23), અરબાઝ ફૈયાઝ અહેમદ (27) અને શાહિદ ખાન મોહમ્મદ સલીમ (26) તરીકે કરી છે. તમામ આરોપી ઉત્તર પ્રદેશના પ્રતાપગઢ જિલ્લાના વતની છે. પોલીસના જણાવ્યા અનુસાર, તેમને રાજકોટના પૂજારા પ્લોટ વિસ્તારમાં આવેલા 'કાંટા વિકાસ ગૃહ'ની પાછળની ગલીમાંથી ઝડપી પાડ઼વામાં આવ્યા હતા. ધરપકડ સમયે તેઓ અન્ય એક ATM સાથે છેડછાડ કરવાની તૈયારી કરી રહ્યા હતા.
ક્રાઈમ બ્રાન્ચે આરોપીઓ પાસેથી રૂ.1,12,200 રોકડ, રૂ. 33000ની કિંમતના 3 મોબાઈલ ફોન, રૂ.3 લાખની કિંમતની કાર, 4 એલ્યુમિનિયમની પટ્ટીઓ, ફાઈબર રિંગ બ્લેન્ડર ફાઇલ અને બેંક ઓફ બરોડાનું ATM કાર્ડ જપ્ત કર્યું છે. જપ્ત કરાયેલી સંપત્તિની કુલ કિંમત અંદાજે રૂ.4,45.200 છે. પોલીસે જણાવ્યું હતું કે આરોપીઓ સ્ટેટ બેંક ઓફ ઈન્ડિયા અને બેંક ઓફ બરોડાના ATMને નિશાન બનાવતા હતા, ખાસ કરીને બેંકની રજાઓ દરમિયાન અથવા જ્યારે બેંકો બંધ હોય ત્યારે. એવો આરોપ છે કે તેઓ કેશ ડિસ્પેન્સર બોક્સમાં એલ્યુમિનિયમની પટ્ટી લગાવતા પહેલા રેકી કરતા હતા અને પછી સ્થળ પરથી જતા રહેતા હતા.
પોલીસના જણાવ્યા અનુસાર, જ્યારે કોઈ ગ્રાહક પૈસા ઉપાડવાનો પ્રયાસ કરતો, ત્યારે ટ્રાન્ઝેક્શન પૂર્ણ થઈ જતું, પરંતુ રોકડ ડિસ્પેન્સરની અંદર જ ફસાઈ જતી. પોલીસે જણાવ્યું હતું કે ગ્રાહક ટ્રાન્ઝેક્શન ફેઇલ થવાની શંકા સાથે ત્યાંથી ચાલ્યો જાય પછી આરોપીઓ પાછા આવતા અને પોતે મૂકેલી પટ્ટી કાઢીને ફસાયેલી રોકડ કાઢી લેતા હતા. CCTV ફૂટેજ તેમજ ટેકનિકલ અને માનવીય બાતમીના આધારે કરવામાં આવેલી તપાસ બાદ આ ધરપકડ કરવામાં આવી હતી.
પોલીસને શંકાસ્પદ વ્યક્તિઓ વિશે માહિતી મળી હતી અને તેઓ બીજી ચોરી કરે તે પહેલાં જ પોલીસે તેમને ઝડપી લીધા હતા. ક્રાઈમ બ્રાન્ચે જણાવ્યું કે આ ધરપકડોને કારણે 3 કેસો ઉકેલાયા છે. એક કેસ રાજકોટના ભક્તિનગર પોલીસ સ્ટેશનમાં, બીજો માલવિયાનગર પોલીસ સ્ટેશનમાં અને ત્રીજો મહેસાણાના 'A' ડિવિઝન પોલીસ સ્ટેશનમાં નોંધાયેલો હતો. અધિકારીઓના જણાવ્યા અનુસાર, આરોપીઓએ ગુજરાત અને મુંબઈમાં વિવિધ સ્થળોએ આવેલા ATMને નિશાન બનાવ્યા હોવાની કબૂલાત પણ કરી છે.
નોંધાયેલી ઘટનાઓમાં સુરતમાં સચિન GIDC, ઝૂ વિસ્તાર, ઉન અને અડાજણ પાટિયા, અમદાવાદના નારોલ, સરખેજ, છત્રાલ અને રિંગ રોડ બાયપાસ, મહેસાણા રેલવે સ્ટેશન નજીક, રાજકોટમાં ત્રિકોણ બાગ નજીક ABI ATM અને પૂર્વ મુંબઈમાં આવેલા ATMમાંથી રોકડ ઉપાડવાનો સમાવેશ થાય છે. પોલીસે જણાવ્યું હતું કે આરોપીઓએ સુરતમાં એક ઘટનામાં રૂ.7,000 અને અમદાવાદ તથા આસપાસના વિસ્તારોમાં વિવિધ સ્થળો પરથી રૂ.90,000 થી રૂ.1 લાખ સુધીની રકમ કાઢી હતી. પોલીસે સુરતના અડાજણ પાટિયા વિસ્તારમાં આવેલા બે ATMમાંથી રૂ.70,000 થી રૂ.80,000 અને રાજકોટમાં ત્રિકોણ બાગ નજીકના ATMમાંથી રૂ.20,000 કાઢ્ હોવાનો ઉલ્લેખ કર્યો છે.
શું હતી આરોપીઓની મોડેસ ઓપરેન્ડી ?
આરોપીઓ બેંકમાં રજાના દિવસે અથવા બેંક બંધ હોય તે સમયે સ્ટેટ બેંક ઓફ ઇન્ડિયા તથા બેંક ઓફ બરોડાના ATMની રેકી કરતા. ATMમાં કોઈ માણસ હાજર ન હોય ત્યારે ATM મશીનના ડિસ્પેન્સર બોક્સમાં એલ્યુમિનિયમની પટ્ટી ફિટ કરી બહાર જતા રહેતા ત્યારબાદ કોઈ વ્યક્તિ પૈસા ઉપાડવા આવે અને પૈસા ઉપાડવાની સંપૂર્ણ પ્રક્રિયા પૂર્ણ કર્યા બાદ પૈસા બહાર ન આવતા વ્યક્તિ ATMની બહાર નીકળી જતા બાદ આરોપીઓ ATMની અંદર પ્રવેશ કરી ડિસ્પેન્સર બોક્સમાં પોતે અગાઉથી રાખેલ એલ્યુમિનિયમની પટ્ટી હટાવી તેમાં ફસાયેલા પૈસા ચોરી કરવાની પદ્ધતિ અપનાવતા હતા.
5.jpg)
